1 Bezaleli adamanyaga Disanduku kwa mabao ya msaji, utali wakwe nounda mp'hima nt'hatu, uzangalamu wakwe mp'hima mbili, na kimo chakwe mp'hima mbili. 2 Nakadihaka zahabu yedi kundani na kuse, na kudizungulusila zahabu nt'hendelo zose. 3 Niyo adamanya mikimailo mine ya zahabu ya kudiinuila no kuzigela mwe mp'hembe zakwe, kila mp'hembe mp'hete imwenga. 4 Adamanyaga mikimailo ya msaji no kuihaka zahabu. 5 Mikimailo iyo niyo ayombosa mgati mwe ziya zi mp'hete zili mwe mp'hembe mbili ye Disanduku, kwa kudiinuila. 6 Adamanyaga hant'hu he zimbazi ha zahabu yedi, utali wakwe mp'hima nt'hatu, na uzangalamu wakwe mp'hima mbili. 7 Naho adamanyaga viumbwa waidi wata mawawa kwa kusana zahabu. 8 Adamanyaga makelubi maidi, dimwenga kwo uheelo uno, dimwenga nadyo kwo uheelo mhtuhu. Adamanyaga makelubi ayo mwo uheelo we ngubiko iyo yakanda yalunganywa hamwenga. 9 Makelubi ayo yenula mawawa yawe kulanga, na kuhagubika hant'hu he zimbazi naho yandaga yahitukilana no kuhahitukila hant'hu he zimbazi.

10 Iviaivia wadamanyaga meza kwa mbao za msaji ina utali wa mp'hima mbili na uzangalamu wakwe mp'hima imwenga, kuita kulanga kwakwe mp'hima imwenga na nusu. 11 Ahakaga na kuizungulusila zahabu yedi nt'hendelo zose no kwiikila nk'hindilo nt'hendelo zose. 12 Aizungulusilaga lupapi luna uzangalamu wa nyanda milongo mfungate na shano no kuizungulusila nk'hindilo ya zahabu. 13 Aidamanyilaga imeza mp'hete nne no kuizigela mwe zi mp'hembe izine umwo mwandaga na matengu ye meza. 14 Zimp'hete izo nezigeligwa hagihi no lupapi luzunguluswe kwinula imiti yo kwinuila imeza. 15 Mikimailo iyo yokwinuila imeza nawaidamanya kwa msaji no kuikiziga zahabu. 16 Naho adamanyaga vint'hu ve meza va zahabu yedi enga via kihungu na kanga na bilauli zakwe zo kugidila malavo ye divai.

17 Iviaivia adamanyaga kinala cha kuikila lumuli kwa kusana zahabu yedi. Kisimiko chakwe no lupapi lwe kinala icho valunganywagwa hamwenga ne vikombe vakwe ne zint'humba zakwe na mabwali yakwe.

18 Kwandaga na matambi mtandatu yakelavilizaga kulawa nt'hendelo ze kinala che vimuli, zint'hatu mwe nt'hendelo imwenga, zint'hatu zint'huhu nazo mwe nt'hendelo int'huhu. 19 Mwe kila tambi nokunda na viyamp'ha vitatu vikale enga mabwali ya mlozi kila kimwenga na nt'humba yakwe na bwali dyakwe. 20 Naho mnanga mwe nk'holo nokunda na viyamp'ha enga mabwali yo mlozi hamwenga ne zint'humba zakwe na mabwali yakwe. 21 Kila hadya halaile matambi maidi handaga na nt'humaba imwenga. 22 Nt'humba izo na matambi vandaga kint'hu kimwenga naho vose nevisanikwa kwa zahabu yedi. 23 Adamanyaga vimuli mfungate na vitozelo vakwe na vihungu vakwe. Vose vidanaywe kwa zahabu yedi. 24 Adamanyaga kinala cho lumuli ne vint'hu vakwe, vose vidamanywa kwa kilo milongo mitatu na shano za zahabu yedi.

25 Naho adamanyaga hant'hu ha kufunk'hizila ubani kwa maziti ya msaji. Utali wakwe wandaga mp'hima imwenga, uzangalamu wakwe nawo wandaga mp'hima imwenga, vandaga viligane kosekose. Utali kwita kulanga kwawe handaga mp'hima mbili. vihembe vakwe ivine ne zimp'hembe zakwe zitenda kint'hu kimwenga. 26 Zint'hendelo zose ne zimp'hembe ze hant'hu ho kulavila nt'hambiko azigubikaga na zahabu yedi, naho niyo avizungulusila nk'hindilo ya zahabu nt'hendelo zose. 27 Naho akidamanyilaga mp'hete mbili za zahabu kwa hasi ye imp'hapi kwe zint'hendelo zimbili zikukaulana. Ndima ye zimp'hete izo ni kutozeleza mikimailo yo kwinuila hant'hu aho kulavila nt'hambiko. 28 Naho adamanyaga mikimailo miidi ya msaji niyo aikiziga zahabu.

29 Iviaivia adamanyaga mavuta yakukile yo kuhaka na ubani una mhemp'he uhanganywe vedi enga mhemp'he.