1 "Bezaeli na Oholiabu hamwenga na kila mnt'hu enk'higwe kunda na udahi na umanyi wa kudamanya ndima zose mwo uzesi we Dihema Dikukile, nawadamanye ndima kuligana na ivo Zumbe Mnungu amsigiile."

2 Musa awetangaga Bezaleli na Oholiabu na kila mnt'hu mta umanyi enk'higwe ni Zumbe udahi naho aungile mwenye eze adamanye ndima. 3 Awo wahokela kulawa kwa Musa vint'hu vose vilavigwe na Waizilaeli kwa ndima yo kuzengela Dihema Dikukile. Naho want'hu wagendeelaga kwigala malavo yawe kwa kuunga wenye kila mtondo. 4 Want'hu wose wata umanyi wandaga wakadamanya ndima zihengi za uzesi we Dihema Dikukile wafosaga, kila yumwenga mwe ndima yakwe wakamwiitila Musa, 5 na kumgamba Musa, "Want'hu wegala vint'hu vingi kujink'ha viya vaungagwa kwa ndima akilagize Zumbe Mnungu kiidamanye."

6 Ivo Musa alagizaga kugamba, "Mnt'hu yeyose ande mgosi hegu mvele asekwigala malavo vitendese kwaajili ya Dihema Dikukile." Want'hu niyo walemezwa kwigala vint'hu, 7 kwaviya viya vint'hu waletaga nevikint'ha kwa ndima iyo na kusigala.

8 Wagosi wose wata umanyi wadamanyaga Dihema Dikukile kwa mapazia mlongo ya kitambala king'aile yedi ibilingwe, na kwa mazoya ya ngoto ya langi ya bluu na langi ya zambalau na langi ink'hundu na kuyahamba kwa viumbwa vina mawawa. 9 Utali wa kila pazia wandaga mp'hima milongo miidi na kane na uzangalamu wakwe mp'hima nne. Mapazia yose yandaga kihimo kimwenga. 10 Ayalunganyaga mapazia mashano kunda dimwenga naho adamanyaga iivo mwa yadya mashano matuhu. 11 Aguhaga nyuzi za buluu niyo adamanya vitasi va mazoya ya ngoto ya buluu mwe mp'hindilo ye dipazia dya nk'hongo, naho adamanyaga enga iivo mwe dipazia dya kaidi. 12 Naho adamanyaga vitasi milongo mishano mwe dipazia dya nk'hongo akajika niyo adamanya vitasi milongo mishano mwe dipazia dya kaidi vika kaulana. 13 Niyo adamanya nduwano milongo mishano va zahabu vileke avilunganye vipande viidi ve Dihema no kunda kint'hu kimwenga.

14 Naho adigubika dihema kwa vipande va mapazia mlongo na imwenga vidamanywe kwa mazoya ya mbuzi. 15 Mapazia yose mlongo na imwenga yandaga na utali mp'hima milongo mitatu kila dimwenga na uzangalamu wakwe wandaga mp'hima nne kila dimwenga. 16 Niyo ayalunganya mapazia mashano hamwenga, yadya mtandatu nayo hamwenga. 17 Naho adamanyaga vitasi milongo mishano mwe ph'indilo dye dipazia dya nk'hongo enga ivo adamanyaga naho mwe zip'hindilo ze dipazia dituhu. 18 Naho adamanyaga nduwano milongo mishano va shaba kulunganya vipande viidi va Dihema na kutenda kint'hu kimwenga. 19 Naho wadamanyaga ngubiko nt'huhu mbili imwenga ya nk'hingo ink'hundu ya dolome yakaidi nayo nk'hingo ihuhile ya kala dya kwebahalikunda ngubiko ya kuse. 20 Ivo niyo adamanya fulemu zikimale wima ze Dihema zo mti wo msaji. 21 Kila fulemu yandaga na utali mp'hima mlongo, uzangalamu wakwe nawo wandaga mp'hima imwenga na nusu. 22 Kila fulemu yandaga na vilunganyilo viidi va kulunganyila, fulemu sose ze Dihema azidamanyilaga vilunganyilo. 23 Naho wadamanyaga fulemu milongo miidi kwe nt'hendelo ya Kwa mwenye mzi ye dihema 24 niyo wadamanya visimiko milongo mine va masawa, mbili ya hasi ya kila fulemu vileke vitozeleze viya vilunganyilo vakwe viidi. 25 naho wadamanyaga fulemu milongo miidi nt'hendelo ya kaidi, mkoma mahanya ye dihema, 26 na visimiko milongo mine va masawa, visimiko viidi kwa kila fulemu. 27 Kwa kunyuma ye dihema uko usweelo wa zuwa we Dihema wadamanyaga fulemu mtandatu, 28 naho fulemu nt'huhu mbili zadamanyagwa mwe zint'huzi kwa kunyuma ye Dihema. 29 Naho fulemu izo zakelunganyaga kwa hasi, naho enga iivo zakelunganyaga mpaka kwe mp'hembe ya kulanga. Ivo nivo zilunganywe izo fulemu zimbili. 30 Ivo elo kwandaga na fulemu mnane na visimiko mlongo va masawa na mtandatu, viidi kwa kila fulemu.

31 Wadamanyaga mapao mlongo na shano ya msaji, pao shano kwajili ye nt'hendelo imwenga ye dihema, 32 zishano zint'huhu kwajili ye nt'hendelo ya kaidi ye dihema, na pao shano kwaajili ya zifulemu ze nt'hendelo ya kunyuma ye dihema, ili usweelo wa zuwa. 33 Adamanyaga pau ya hagati ibuile hant'hu ha imwenga ye dizengo dye dihema iyo yomboke hagati kulawa kwo uheelo mpaka kwo uheelo. 34 Fulemu zose nezikizigwa zahabu na kudamanyilwa mp'hete za zahabu za kutozeleza zipau, izo nazo azikizigaga zahabu. 35 Adamanyaga pazia kwa suke ing'aile dihambwa kwa picha za viumbwa waidi wata mawawa, kwa nyuzi za langi ya buluu na zambalau na ink'hundu na nyuzi zedi zibilingwe. 36 Adamanyaga mikimailo mine ya mti wa msaji, no kuihaka zahabu na kudamanyila nduwano. Iviyaiviya avidamanyilaga visimiko vine va masawa. 37 Iviaivia kwe nk'hili ye Dihema adamanya pazia kwa suke ing'aile na kuihamba kwa nyuzi za langi ya buluu na zambalau na zink'hundu, 38 naho nawadamanya mikimailo mishano ikanda na nduwano zakwe zose nezikizigwa zahabu, mna visimiko vakwe nevinda va shaba.