1 Niyo zumbe amgamba Musa, 2 "Wagambe Waizilaili wauye kunyuma waike nk'hambi halongole ha Pi Hahilothi, hagati ya Migodoli ne Bahali ya Shamu, waike nk'hambi hagihi ne bahali kuhinga kunyuma kwe Bahali Zefoni. 3 Kwaviya Falao naafanyanye kugamba Waizilaeli wazaganywa ni dijangwa, naivo watwangadikaga. 4 Nenimtende Falao kunda mk'hani, naawatimileni. Uhumi wangu kwakwe na watoani wakwe nounink'he uwedi utendese. Aho niho Wamisili nawamanye kugamba ni miye Zumbe." Ivo Waizilaili niyo wadamanya enga ivo wagambilwe.

5 Falao eze eve kugamba Waizilaeli wanyilika, yehe na vilongozi weyawe wahitulaga zifanyanyi zawe wakagamba, "Kidamanyai? Kileka Waizilaeli wanyilika, kiwaswesa hawande watumwa wetu!" 6 Falao niyo aika lumwe magali ya nk'hondo yakugendezwa na falasi hamwenga na watowani wakwe. 7 Aguhaga magali ya nk'ondo yabuile magana mtandatu na magali matuhu ya Misili na vilongozi weyawe mwa magali ayo. 8 Zumbe amtendaga Falao kunda mk'hani niyo awabasa waizilaeli awo wahalawaga Misili kwa uhumi. 9 watowani wa Wamisili ne zifalasi zose za Misili na magali na ayo wakuzilongoza na watowani wakwe wawabwiilaga Waizilaeli waikile nk'hambi hagihi ne bahali hagihi na Pi Hahilothi ukahinga Baali Sefoni.

10 Waizilaeli weze wamuone Falao na watowani wakwe wandaga hagihi nawo, wogohesaga niyo wamwiila Zumbe vileke awambize. 11 Niyo wamgamba Musa, "Togola, kukigala uku kwe kwedijangwa vileke kibanike kwaviya kudya hakwandaga na vikuta va kumosela msanga? Nii kukidamanyila aya kwa kukilava Misili! 12 Togola, hachakugambile kudya Misili kugamba nayalaile? Nekigamba ukileke kinde watumwa wa Wamisili. Kwaviya nevinda vedi kunda watumwa kudya Misili kujink'ha kubanika aha hedijangwa."

13 Niyo Musa awagamba Waizilaeli, "Msekogoha mtoge! Dielo nomuone ukombola wa Zumbe, awa Wamisili mkuwaona dielo homuwaone naho. 14 Zumbe naawatowanile, nanywe nomhumule du."

15 Zumbe niyo amgamba Musa, "Nii waniila? Wagambe Waizilaeli wagendeele kulongole. 16 Inula ingoda yako ukailoloteze kwe bahali ikepange, Ivo Waizilaeli nawadahe kwomboka haheina mazi. 17 Neni watende Wamisili kunda wak'hani vileke wawatimileni, miye nenikeguhile ukulu kwo uhumi wangu kwa Falao na watowani wakwe wose na magali yakwe na awo wakuyagendeza. 18 Nize niwahume, Wamisili nawamanye kugamba ni miye Zumbe, aho heza kuguha ukulu wangu kwa Falao na magali yakwe na awo wakuyagendeza."

19 Mtumigwa ywa Zumbe awalongoele watowani wa Waizilaeli asogela no kukimala kunyuma kwawe. Udya mnala we divunde wasogelaga kulawa kulongole kwawe niyo wakimala kunyuma kwawe. 20 Niyo dyekala mgati mwa watowani wa Waizilaeli na Watowani wa Wamisili, divunde diya dyatendaga ziza kwa Wamisili mna nekilo dyegalaga ung'azi kwa Waizilaeli, ivo mafyo aya maidi fyo dya Wamisili na fyo dya Waizilaeli hawabwiilane kilo icho chose.

21 Musa alolotezaga mkono wakwe kwe bahali, niyo Zumbe ayasukumizila hale mazi kwa nk'hung'unt'ho nk'hulu kulawa ulailo wa zuwa kilo icho chose. Mazi niyo yakepanga mgati mwe bahali ikepangile niyo mwanda hemwiina mazi, 22 niyo Waizilaeli womboka hemwiina mazi mwe bahali, mazi yadamanyaga nk'handula mbili kulume na kumoso. 23 Wamisili wawatimilaga mwe bahali ne zifalasi zawe na magali yawe na awo wakuyagendeza. 24 Kilokilo, Zumbe awakaulaga watowani wa Wamisili mwo mnala udya wo moto ne divunde, niyo adigela kizingizo kikulu. 25 Ayatendaga makuludumu ya magali niyo yadidimila. Wamisili niyo wagamba, "Kiwanyilikeni Waizilaeli kauleni, Zumbe awatowanila!" 26 Zumbe niyo amgamba Musa, "Loloteza mkono wako kwe bahali vileke mazi yawagubike Wamisili, na magali yawe na awo wakuyagendeza." 27 Musa niyo aloloteza mkono wakwe kwe bahali, kilokilo amazi ye bahali yauyaga enga ivo yandaga aho nk'hongo. Wamisili wagezaga kuyanyika amazi, mna Zumbe awatubwikaga mwe bahali. 28 Amazi yahitukaga niyo yagubika magali na awo wakuyagendeza na watoani wose wa Falao wandaga wakawatimila Waizilaeli mwe bahali. Hakwandaga na yeyose mwawe asigalaga. 29 Mna Waizilaeli wagendaga hemwiina mazi mwe bahali, amazi yadamanyaga nk'handula mbili, kulume na kumoso. 30 Nivo Zumbe awakombola Waizilaeli kulawa mwa watoani wa Wamisili, naho Waizilaeli waonaga Wamisili wabanike mnk'handa mwe bahali. 31 Waizilaeli waonaga ndima nk'hulu adamanyaga kuwahiga Wamisili. Ivo want'hu wamogohaga Zumbe na wamhuwila Musa na Zumbe.