1 Want'hu weze waone Musa hakusunguza kuusela kulawa kwo mnima, wamzungulukaga Haluni niyo wamgamba, "So ukidamanyile milungu ikuunga ikilongweele. Kwaviya hakimanyize icho kimpatile mbuya yetu Musa uyo akigale aha kulawa Misili."

2 Ivo Haluni awagambaga, "Hambuleni heleni ze zahabu za wavele wenyu na wana wenyu wa kilume na wa kike niyo mwanigaila." 3 Ivo, want'hu wahambulaga ziheleni niyo wamwigaila Haluni. 4 Azihokelaga niyo adamanya hili dikeigile ndama niyo asongola kwa unt'handa ne kilama.

Niyo want'hu awo wagamba. "Uyu niye mnungu wenyu nyuwe Waizilaeli uyo awalaveni ukwo Misili!"

5 Haluni eze aone ayo azengaga kilingo cha nt'hambiko aho he ndama ye zahabu, niyo alalika, "Luvi nokunde na zuwa dya kinyemi kwajili ya Zumbe." 6 Ivo zuwa ditimile kilokilo, want'hu wenukaga wakalava malavo yo kokwa na malavo yo utondowazi. Want'hu wekalaga hasi no kudya no kunywa niyo wakimala na kuseiga kila mnt'hu na mtuhu. 7 Zumbe Mnungu niyo amgamba Musa, "Seela hasi kwaviya want'hu wako uwaletile kulawa kwe isi ya Misili wakezaganya wenye. 8 Wasunguza kuile isila niwagambile, niyo wakedamanyila kadama ka kusana, niyo wakavikila na kulava malavo wakagamba, ‘Izilaeli, uyu niye mnungu ywetu akilavile mwe isi ya Misili.’ 9 Hiwamanya want'hu awa, nawo wana kigungumtwi. 10 Haluse, usekugeza kunikindila. Hiwaihia, name neniwabanange kwa maya yatendese. Aho nohutende weye ne vyeleko vako kunda isi nk'hulu."

11 Mna Musa niyo amlombeza Zumbe, Mnungu ywakwe, akagamba, "Zumbe, nii maya yako yanda makali mwa want'hu wako uwalavile mwe isi ya Misili kwa ludole na udahi wako mkulu? 12 Unadamnya ivo, kindedi Wamisili nawagambe, Nakawalava kwa kuwatendela uwihi, vileke awokome kwo mnima na kuwabananga pele mwe isi? Zumbe seleza maya yako na kuleka mbuli iyo ihile idyo noukaunga kuwadamanyila want'hu wako. 13 Wakumbukile wandima wako, Ibulahimu na Isaka na Izilaeli awo uwaikile kilapi kwa moyo wako mwenye ukagamba, ‘neniwongezele welekwa wenyu wande enga nt'hondo za kwo ulanga. Hiwalagana kuwenk'ha isi yose ino naho nekinde kipe chawe.’ " 14 Ivo, Zumbe niyo aleka kuwadamanyila want'hu wakwe idya mbuli ihile nakaunga adamanye.

15 Niyo Musa aseela kulawa kwo mnima akanda na vibao viidi va lagano mwe mikono yakwe viwandikwe sigilizi za Mnungu nt'hendelo zose. 16 Vihant'hi ivo vadamanyagwa ni Mnungu mwenye niyo ayawandika mawandiko ayo.

17 Yushua eze eve lwasu lwa want'hu niyo amgambila Musa, "Kuna lwasu lwa nk'hondo kwe nk'hambi."

18 Mna Musa niyo amhitula, "Hiyo lwasu lwa uhumi hegu kuhumwa, mna lwasu hulwiva ni lwasu lwa want'hu wakukema."

19 Weze wabule hagihi ye nk'hambi naona kadama na want'tu wakaseiga, aho maya ya Musa yakwelaga enga moto, niyo aviduula hasi viya vibao vandaga mwe mikono yakwe, niyo vabwagazuka hadya hasi yo mnima. 20 Ivo, aguhaga ako kadama na kukoka moto, niyo akasitigint'ha no kunda enga luvumbi, niyo auhanganya unga mwa mazi na kuwatigiza Waizilaeli wanywe. 21 Musa niyo amuuza Haluni, "Wakudamanyilai want'hu awo mpaka kuwagela mwo wavu mkulu uno?" 22 Haluni niyo amhitula, "Nakulombeza zumbe ywangu maya yako yasekunda mwangu miye mndima ywako. Kuwamanya ivo weli want'hu awa mwo kudamanya wavu. 23 Neweza wakanigamba, ‘Kidamanayile milungu iyo ikilongoze kwaviya hakimanyize icho kimpatile Musa uyo akilavile mwe isi ya Misili.’ 24 Miye name niyo nawagamba kila yumwenga mta vint'hu va zahabu avilete. Ivo niyo wanigaila, name niyo navilungumla mwo moto niyo naidamanya indama ino."

25 Ivo Musa eze aone want'hu wahituka na kudamanya ivo wakuunga kwaviya Haluni kawatenda wahituke na kudamanya ivo wakuunga, na kukeletela soni hameso ya wak'hondo wawe. 26 Musa niya akimala kulongole mwo lwivi lwe n'khambi no kuuza, "Ni ani eli mwa Mnungu? Eze kwangu." Wana wose wa Lawi niyo wakeduganya hamwenga hameso hakwe. 27 Akawagamba, "Zumbe Mnungu, Mnungu ywa Izilaeli agamba ivi. ‘Kila mnt'hu akekake bamba mwe kigudi chakwe, azunguluke kila hant'hu he nk'hambi, kulawa mwo lwivi lumwenga mpaka mwo lwivi lutuhu, naho kila yumwenga amkome nduguye na mbwiyaye na miyawe.’ " 28 Wana kilume wa Lawi nawadamanya enga ivo Musa awasigiile. Zuwa idyo nawakomwa want'hu wakubula magana milongo mitatu. 29 Musa niyo alonga, "Dyelo mkeika ukuki nyuwe wenye kumdamanyila ndima Zumbe Mnungu, kwaviya hamnekile hata kuwakoma wana wenyu hegu ndugu zenu. Mnungu kawavikilani ivi dyelo." 30 Luvi yakwe Musa awagambilaga want'hu, "Mnidamanyila wavu mkulu! Haluse nenimwitile Zumbe Mnungu mwo mnima, mafani nenidamanye mwiivano kwaajili yo wavu wenyu." 31 Ivo Musa niyo auya kwa Zumbe Mnungu akamgamba, "Naihiwa want'hu awa wanidamanyila wavu mkulu, wakedamanyila wenye milungu ya zahabu. 32 Mna haluse, nakulombeza uwausile wavu wao. Hunawalekele, nakulombeza uniuse miye mwe kitabu chako uwawandike want'hu wako."

33 Mna Zumbe Mnungu niyo amgamba Musa, "Nenimuuse mwe kitabu changu mnt'hu yeyose anidamanyile wavu. 34 Mna haluse ita ukawalongoze want'hu mpaka hant'hu hugambile. Kaula watumigwa wangu nawakulongoele. Hata ivo, zuwa neniwezile, neniwasengele kwo uwavu wawe."

35 Zumbe Mnungu niyo awegaila want'hu unyonge wa tauni, kwaviya nawamlombeza Haluni awadamanyile kadya kadama ka zahabu.