1 Uwagambile Waizilaeli Miko ino.

2 "Uneva unamgula mtumwa ywa Kiibulania, naakudamanyile ndima miaka mtandatu. Mwaka wa mfungate noumlekele haheina maliho yoyose. 3 Uneva ezaga heina mkaziwe naahalawe ekedu iivo heina mkaziwe, mna uneva ezaga na mkaziwe naahalawe hamwenga na mkaziwe.

4 "Uneva mkulu ywakwe amwink'haga mvele niyo weleka wana, mvele uyo na wana awo ni wo mkulu ywakwe, yehe naahalawe ekedu. 5 Mna uyo mtumwa analonga haheina kifiso kugamba amuunga mkulu ywakwe na mkaziwe na wanawe naho hakuunga kuhalawa, 6 mkulu ywakwe naamwigale hant'hu hokumvika Mnungu ho lwivi niyo aguha mtunga no kudiponk'hola digutwi dyo mtumwa kwa kuika kilapi, naye naande mtumwa mazuwa yakwe yose.

7 "Uneva mnt'hu anamtaga mwanawe ywa kike ande mtumwa, mwana uyo haalekelwe enga ivo mtumwa ywe kigosi akulekelwa. 8 Uneva mkulu ywakwe amgulaga ande yumwenga ywa wakaziwe niyo yanda helelwe naye, ise dya uyo mwana kike aungwa amkombole mwanawe. Kwaviya uyo mkulu ywakwe hana uwedi wo kumtaga kwa want'hu watakwiza kwaviya hamdamanyile uwedi. 9 Uneva mnt'hu mtuhu anaunga kumloza kwa mwanawe ywe kigosi naamtende uyo mwana enga mwanawe ywa kike. 10 Uneva mnt'hu analomba mvele mtuhu aungwa kugendeela kumwink'ha yudya ywa nk'hongo suke na nk'hande no uwedi wose we ndoza yakwe. 11 Uneva hana kint'hize aya yose amatatu naaungwe kumwasa uyo mvele haheina uyo mkulu kulihigwa chochose."

12 "Yeyose akumtoa miyawe niyo amkoma yehe naye naakomwe. 13 Mna uneva hamkomile kasidi, ataga kwitukila du, nohulagise uko naanyilikile uyo mkomi. 14 Mna uneva kamkoma kwa nyambi noumuuse hata uneva kanyilikila kilingo cha kutambikila vileke asekukomwa.

15 "Yeyose akuwatowa welesi wakwe vaungwa akomwe.

16 "Yeyose akumbawa mnt'hu veleke amtage hegu amtende mtumwa ywakwe, uyo naye naakomwe.

17 "Yeyose akuwaligita welesi wakwe naakomwe.

18 "Uneva want'hu waidi wanatoana niyo yumwenga amlumiza miyawe ne diiwe hegu mkono, hamkomile mna emwo lusazi, 19 uyo amnlumize miyawe haalihe amasa uneva alumizwe neengule niyo adaha kugenda ne nk'home, mna naaungwe kumliha uyo miyawe kwa kumwazila mazuwa yakwe, naho naaungwe kaule kugamba ahona ngungulu.

20 "Uneva mnt'hu anamtowa nk'home mtumwa ywakwe ywa kilume hegu ywa kike niyo amkoma, naande na masa. 21 Mna uneva uyo mtumwa ana hona mwe dizuwa dya nk'hongo na dya kaidi, uyo amtoile mtumwa ywakwe haande na masa kwaviya mtumwa uyo ywakwe.

22 "Uneva want'hu wakutowana wanamlumiza mvele mbovu, niyo abanaga ubovu wakwe mna hakunalaile wiihi mtuhu, yudya amlumize naalihe viligane na ivo mgosi dya yudya mvele ivo naaunge na ivo walamuzi nawalamule. 23 Mna uneva uyo mvele analumilisa, maliho nayande ni ugima kwa ugima, 24 ziso kwa ziso naho zino kwa zino naho mkono kwa mkono naho kiga kwa kiga 25 kwokigwa moto kwa kwokigwa moto naho nk'wenge kwa nk'hwenge naho nk'hong'ont'ho kwa nk'hong'ont'ho.

26 "Mnt'hu anamtowa mtumwa ywakwe ywa kike hegu ywa kigosi niyo amtula diziso aungwa kumlekela kwaajili ye diziso dyakwe. 27 Naho ana mgombola dizino mtumwa ywa kike hegu ywe kigosi, aungwa amlekele mwo utumwa uwo kwajili ye dizino dyakwe.

28 "Uneva jeku dinamtunga hembe mgosi hegu mvele niyo abanika, neditoigwe maiwe niyo dyafa, inyama yakwe isekudigwa. Mta dijeku idyo naalekelwe. 29 Mna uneva dijeku idyo dizoela kuwakump'hukila want'hu, naho uneva mta dijeku akanyagwa mna hadivugaile niyo dyakoma mnt'hu, idyo neditoigwe maiwe niyo dyafa, mta dijeku naye naakomwe. 30 Mta dijeku uneva anaungwa kuliha aukombole ugima wakwe, naaungwe kuliha maliho yakint'hile viligane na ivo asengelwe. 31 Umwiko uuno nounde kwa jeku dikomile mwana kilume hegu mwana kike. 32 Uneva jeku dina mtunga hembe mtumwa mgosi hegu mvele, mta mtumwa naalihigwe ni yudya mta dijeku matundu milongo mitatu yakwitangwa shekeli, dijeku nadyo neditoigwe maiwe niyo dyafa.

33 "Uneva mnt'hu anasimba bome niyo hadisilize, ng'ombe hegu mp'hunda inahubugila, 34 uyo asimbile idyo dibome naaungwe kuliha iyo imp'hunda hegu iyo ing'ombe, mna icho kifile nekinde chakwe yudya asimbile dibome. 35 Uneva jeku dya mnt'hu dinakoma jeku dya mtuhu, awo waidi nawatage diya idigima niyo wapanga amatundu ayo, naho akajika nawapange inyama ya diya dikomigwe. 36 Mna uneva imanyika kugamba jeku idyo dizoela kukoma weyawe mna mta dijeku hadivugaile, mta dijeku naaungwe kuliha jeku kwa jeku, mna diya dikomigwe naadiguhe.