1 "Use kubwelekeza lulimi naho usekumwamila mnt'hu akalava uwona wo udant'hi. 2 Usekuwatimila want'hu wengi mwo kudamanya wiihi hegu wakalava uwona kwa kuzaganya ikindedi. 3 Use kwazagula mwo kulamula masa ya mnt'hu mkiwa.

4 "Unabwiila ngo'mbe hegu mp'hunda ya mnk'hondo ywako yaganika uivuze kwa mwenye. 5 Unabwiila mp'hunda ya mnt'hu akukwihiya igwa na nt'wika, usekumwasa mna umwambize aikimalise.

6 "Usekuzaganya uwedi wa mkiwa mwa masa yakwe. 7 Usekumlongeleza mnt'hu kwa lulimi naho use kuwakoma heweina masa kwaviya henimlekele mnt'hu mwavu. 8 Usekuhokela matundu ya soni kwaviya matundu ya soni yawagela wakulu unt'hunt'hu niyo wazaganya mbuli zo uwedi.

9 "Usekuwatendela vihile watakwiza, nyuwe mmanya watakwiza ivo wakukeiva, kwaviya nyuwe wenye nomnda watakwiza mwe isi ya Misili.

10 "Uhande mbeyu mwe isi no kuvuna ulozo wakwe kwa miaka mtandatu. 11 Ikabula mwaka wa mfungate uileke isanga ihumule, naho usekwaha chochose kikuhota umwo vileke wakiwa mwa want'hu wako wadahe kudya naho kiya wakusigaza kidigwe ni makala mbago. Utende iivo mwe zink'honde ze mizabibu na mwe mizeituni.

12 "Damanya ndima mazuwa mtandatu, ikabula zuwa dya mfungate uhumule vileke mp'hunda zako na majeku yako na watumwa welekwe mwe nyumba yako na watakwiza wakehumuze.

13 "Udamanye ayo yose miye Zumbe husigiile. Mazina ye milungu mituhu usekuyatambula naho yasekwivika mwo mnomo wako'

14 "Nomnidamanyile mila mikulu mitatu mwo mwaka. 15 Nomdamanye wila we mikate heigeligwe ugwadu enga ivo nisigiile. Nomdye mikate hegeligwe ugwadu kwa mazuwa mfungate mwo mwezi wa Abibu, kwaviya nulo lupisi mwalawaga Misili. Mnt'hu yeyose ase kwiza kunivika heena cha kunilavila.

16 "Damanyeni wila wa ulozo wa nk'hongo we zindima zenyu.

"Damanyeni wila wo kuduganya ulozo ulawile mwe nk'honde mwo uheelo wo mwaka, umwo mkaduganya ulozo mwo ulozo wenyu kulawa mwe zink'honde. 17 Wagosi wa kwenyu waungwa kwiza hameso hangu miye Zumbe Mnungu, nk'hanana nt'hatu mwo mwaka.

18 "Usekunilavila nt'hambiko ya sakame ihanganywe ne mikatene igeligwe ugwadu, naho mavuta ye nyama yo wila wangu yasekuikwa mpaka mtondo ukwiza.

19 "Umwo ukajika ukuvuna, ulozo wako wa nk'hongo uwedi nouwigale kwe nyumba ya Zumbe Mnungu ywako.

"Use kunyemsa kabehela ka mbuzi hegu kagoto mwe mele ya nine.

20 "Nenimtume mtumigwa ywa kwe mbingu ywangu akulongoele vilkeke akwamile mwe sila no kukubuza kudya nikwiikile lumwe. 21 Mumtegeleze na kutimila ayo akulonga, msekutenda wavu kwakwe, haawausileni wavu wenyu kwaviya ananadyo dizina dyangu. 22 Mna, mnamwiva no kudamanya yose hulonga neninde mnk'hondo ywa wank'hondo wenyu no kuwasulumiza wakuwasulumizani.

23 "Mtumigwa ywa kwe mbingu ywangu naawalongoeleni mwe isi za Waamoli na Wahiti na Wapelizi na Wakaanani na Wahivi na Wayebusi naho neniwabanange. 24 Msekwinamila milungu yawe, naho mse kuivika. Mna mwiibanange pele milungu yawe no kumola mikola yawe. 25 Nomnidamanyile ndima miye Zumbe Mnungu ywenyu name neniivikile nk'hande yenyu na mazi yenyu, naho neniyause manyonge yose mwenyu. 26 Hokunde na mvele mwe isi yako naabanange ubovu wakwe, naho neni watendeni mwikalise mwe isi.

27 "Wogofi wangu nouwalongoeleni, naho neniwatende wose wakuwahigani waganike, naho wank'hondo wenyu nawawanyilikeni. 28 Nohulongozele malondoza yakuunga yawakulumbuze Wahivi na Wakanani na Wahiti wahalawe hameso yako. 29 Heniwaguluse hameso yenyu mwo mwaka umwenga kwaviya isi heinde na want'hu niyo makala yagenyela no kuwahumani. 30 Neniwaguluse mp'halahole mpaka aho nyuwe nomgenyele no kunda wata isi. 31 Mihaka yenyu neinde ni kulawa kwe bahali ya Shamu mpaka kwe bahali ya Wafilisiti, na kulawa kwe dijangwa dya sinai mpakakwo mto wa Fulati, neniwatendeni muwatahe want'hu wakwikala mwe isi iyo, nanywe nomuwakulumbuze. 32 Msekuzumilana nawo hegu milungu yawe. 33 Mse kuwaleka want'hu awo wekale mwe isi yenyu, want'hu awo nawaleke mnitendele wavu, kwaviya mnaivika milungu yawe neinde lwinika lwa kuwakomani."