1 Zumbe Mnungu amgambaga Musa kwo mnima Sinai, 2 Longa na Waizilaeli uwagambe. Aho nomwize mwingile mwe isi huunga niwewenk'heni, homlime isi mwo mwaka wa mfungate, ni mwaka wa kuhumula wa kumtunya Zumbe. 3 Kwa miyaka mtandatu nomhande zimbeyu mwe migunda yenyu, naho kwa miyaka mtandatu nomhogole imizabibu yenyu matambi na kuvuna ulozo wakwe. 4 Mna mwaka wa mfungate ni mwaka wa kuhumuza migunda umwo mwe isi ni mwaka wa Zumbe. Msekuhanda zimbeyu mwe migunda yenyu naho msekuhogola mizabibu yenyu amatambi. 5 Msekuvuna vihotile venye naho msekulogota zabibu za mwe mizabibu homwiihogowele. Ni mwaka wa kuhumula ukint'hile kwa isi. 6 Chochose isi ikulava mwo mwaka wa mfungate nekinde nk'hande yenyu nyuwe wenye na watumwa wenyu wa kilume na wakivele na wandima wako na wata kwiza. 7 Iviya iviya kwe mifugwa yenyu na mkala ya kwe mbago mwe isi yenyu. Chochose nechelekwe mwe isi nekinde nk'hande yenyu.

8 Nomuwaze wenye miaka mfungate ya kuhumula nomtende ivo nk'hanana mfungate. Miaka yo kuhumula yose kwa hamwenga neinde milongo mine na kenda. 9 Naho mwe dizuwa dya mlongo dya mwezi wa mfungate dizuwa dyo kudamanya mwivano, nomtume mnt'hu atowe gunda kila hant'hu mwe isi yose. 10 Mwaka wa milongo mishano neniike ukuki na kubwelekeza ulekelwa mwe isi na wekazi wakwe wose. Neinde ni Yubile kwenyu, kila yumwenga ywenyu naauwiye ugoli wakwe naho kila yumwenga naauye kwe mp'huga yakwe. 11 Mwaka wa milongo mishano neinde mwaka wa kinyemi kwenyu, msekuhanda hegu kuvuna kiya kihotile chenye naho msekulogota zabibu kulawa mwe mizabibu hemwiihogowele. 12 Kwa viya ni mwaka wa kinyemi ukwitangwa jubilii naho neinde ukuka kwenyu, nomdye du kiya kilaile mwe migunda.

13 Mwo mwaka uwo kila mgunda uguligwe waungwa kuvuzwa kwa mwenye. 14 Uneva noutage mgunda kwa miyao hegu unagula mgunda kulawa kwakwe, yumwenga mwa nyuwe ase kumhujila miyawe. 15 Yombe nedilongwe vikaligana no uwazilo we miaka iyo isigale umwo mwaka we kinyemi mtuhu ukanda ukei mpaka Yubile nt'huhu. 16 Miaka ikanda mingi, noukweze diyombe, naho miyaka ikanda migeke, nouhungule diyombe, kwa viya kiya akukutagila ikindedi ni uwazilo wa ulozo. 17 Msekuhujilana, mna mmwogohe Mnungu ywenyu. Ni miye Zumbe Mnungu ywenyu.

18 Timileni sigilizi zangu ne miko yangu vileke mwikale kwa utondowazi mwe isi. 19 Niho isi neyeleke matunda yakwe, nanywe nomdye na kwiguta na kwikala umwo vedi.

20 Mwadaha kuuza, nekidyei mwo mwaka wa mfungate ikanda hekihande hegu kuvuna ulozo wetu. 21 Zumbe Mnungu naivikile isi kwa miaka mtandatu vileke yelekese nk'hande neiwakikint'heni mwe miaka iyo imitatu. 22 Aho nomhande mwe migunda yenyu mwo mwaka wa mnane, nomnde mkei kudya mmbili mwo mwaka wa mtandatu, naho nomnde na nk'hande ya kuwakint'hani mpaka mkeza kuvuna kiya mhandile mwaka uno.

23 Naho migunda isekutagwa kwa Ndagano ya mazuwa yose, kwa viya isi ni ugoli wangu, nyuwe nanywe mwi watafi naho mwi want'hu wangu.

24 Uneva mnt'hu anataga mgunda wakwe uwagilwa wo uyo atagile wo kuukombola naho mgunda wakwe waungwa uzumilwe. 25 Uneva yumwenga ywa welekwa we isi yako kanda mkiwa naho kataga mgunda wakwe, ndugu ywa lukuvu niye akudaha kuukombola. 26 Uneva mnt'hu uyo hana ndugu ywa lukuvu kukombola ugoli uwo kwaajili yakwe, mna yehe mwenye niyo apata sila ya kuikombola, 27 naawaze miaka kukongela aho autagaga naho naaungwe avuze kiya akugaha naho yudya agulaga naaungwe kumvuzila. 28 Mna uneva hakudaha kuukombola, mgunda uwo utagigwe nousigale kwo mguzi mpaka mwo mwaka we Kinyemi. Mgunda uwo nouvuzwe mwo mwaka wa Kinyemi, yehe naye naadahe kuuvuzilwa mgunda wakwe.

29 Uneva mnt'hu naatage nyumba imndani mwo mzi uzungulusilwe lukazi, yehe ana uwagilwa wa kuikombola mwo mwaka umwenga kukongela aho uguzi uwo udamanyike. Mwo lupisi ulwo adaha kuikombola. 30 Uneva haikombolwe mpaka mwo mwaka umwenga ukint'hile komboka, nyumba imndani mwo mzi izungulukwe ni lukazi, lupisi lwose neinde ugoli wa awo waguile na welekwa wawe. Heivuzwe mwo mwaka we Kinyemi. 31 Nyumba zimwe vijiji hevizungulusilwe uwa neviwazwe enga migunda. Zadaha kukombolwa, naho zivuzwe mwo mwaka we Kinyemi. 32 Mna mazuwa yose Walawi wana uwagilwa wa kukombola nyumba zawe mwe mizi ya walawi wakuikaila. 33 Kwa ivo ugoli wa Mlawi wadaha kukombolwa, nyumba itagigwe mwo mzi wowose wakuwikaila, nouvuzwe mwo mwaka wa Yubile, kwa viya nyumba zimwe mzi wa walawi ni ugoli wawe wa mazuwa yose mwe isi ya Waizilaeli. 34 Mna isi ya madimo ikuzunguluka mizi ya Walawi isekutagwa, ni ugoli wawe wa mazuwa yose.

35 Uneva yumwenga mwa wanduguzo Waizilaeli kanda mkiwa naho hakudaha kukezunguila, nyuwe mwaungwa mmwambize enga ivo mkuwaambiza wata kwiza, vileke adahe kwikala mwenyu. 36 Use kuguha kikusump'hula mwo upati hegu chochose kwa nduguyo, mna noumwogohe Mnungu ywako, vileke nduguyo adahe kwikala hagihi na weye. 37 Ukakopesha usekulihwa kisump'huule kulawa mwe matundu ukukopesha hegu mwe nk'hande ukutaga. 38 Ni miye Zumbe Mnungu ywenyu niwalavileni mwe isi ya Misili no kuwenk'hani isi ya Kanaani ninde Mnungu ywenyu

39 Uneva yumwenga mwa welekwa wa isi yako kanda mkiwa mgati mwako yehe naye niyo aketaga kunda mtumwa kwako, usekumwink'ha ndima ze kitumwa. 40 Nowikale naye naho nadamanye ndima enga mndima ywa kulihwa, naye naadamanye ndima mpaka mwo mwaka we Kinyemi. 41 Niho yehe na wanawe nawalekelwe, yehe naye naauye mwe mp'huga yakwe na kwo ugoli wa wababa zakwe. 42 Kwaviya Waizilaeli ni wandima wangu niwalavile mwe isi ya Misili, wasekutagwa kunda watumwa. 43 Usekuwatendela kwa luhahila, mna unde na wogofi kwa Mnungu ywako. 44 Ukaunga watumwa wadaha kuwagula kulawa mwa si nt'huhu zikuwazunguluka. 45 Nyuwe mwadaha kugula wana wa watakwiza wakwikala hamwenga na nyuwe awo nawande wenyu. 46 Nyuwe mwadaha kuwenk'ha watumwa awo wana wenyu kunda ukipe wawe mwo kmwajika nyuwe kubanika. Awo wawadamanyile ndima wana wenyu, naho usekumtendela Mwiizilaeli kwa luhahila.

47 Uneva mgeni akwikala mwa nyuwe kanda mgoli mna Waizilaeli watuhu wanda wakiwa naho niyo waketaga kwa uyo mtakwiza hegu kwa yumwenga mwe mp'huga yawe, 48 ana uwagilwa wa kukombolwa ananda katagwa. yumwenga mwa wanduguze. 49 naho mtumbawe hegu soviye hegu yeyose eli nduguye mwo lukolo lwakwe adaha kumkombola. hegu inanda naadahe, naaungwe kukekombola mwenye. 50 Yehe na uyo amguwile nawawaze lupisi kukongela mwaka waketagile mpaka mwaka wa Milongo mishano. Naho nawahime diyombe dyo kulekelwa kwawe viligane na maliho ya wandima wa maliho. 51 Uneva isigala miaka mingi, aungwa alihile ukombolwa wakwe fungu kulu dya yombe kumgula yehe, 52 uneva miyaka isigale ni migeke mpaka maka milogo mishano, naawaze uwazilo wakwe yehe naye naalihe maliho yakuungwa kwaajili ya ukombolwa wakwe. 53 Naadamanyilwe enga mndima wa kulihwa mwaka kwa mwaka, yudya awaguile hakuungwa awatendele kwa luhahia. 54 Hata uneva hakombolwe mwa sila yoyose mwe izi, yehe na wanawe nawalekelwe mwo mwaka wa milongo mishano, 55 kwaviya Waizilaeli ni ugoli wangu enga wandima. Kwaviya Waizilaeli ni wandima wangu niwalavile mwe isi ya Misili. Miye ni miye Zumbe Mnungu ywenyu.