1 Zumbe Mnungu alongaga na Musa akamgamba, 2 "Mwitange Haluni na wanawe wadugane halongole he Dihema Dikukile, guha mavalo yakukile na mavuta ya kuhaka na njeku ya malavo ya nt'hambiko ya kuusila wavu na ndolome mbili na nt'hangulu ya mikate heigeligwe ugwadu. 3 Akajika uwaduganye want'hu wose wa Izilaeli kulongole ye nk'hili ye Dihema Dikukile."

4 Musa niyo adamanya enga ivo asigilwe ni Zumbe Mnungu, awaduganyaga want'hu wose he nk'hili ye Dihema Dikukile. 5 Musa alongaga na want'hu wose akawagamba, "Izi nizo zimbuli Zumbe Mnungu akuunga mdamanye."

6 Ivo Musa awegalaga Haluni na wanawe niyo awahaka mazi. 7 Niyo amvala Haluni shati nt'hali no kunyinya msipi mwe kigudi ne nk'hazu ya buluu. Niyo amvala kizibao na kukinyinya mwe kigudi kwa msipi ufumigwe vedi ulunganywe kwe kizibao. 8 Aikaga kafuko mwe kifua cha Haluni no kugela mwa kafuko ako maiwe maidi ya ulamuzi yakwitangwa Ulimu na Thumimu. 9 Naho amvalaga Haluni kilemba mwo mtwi, kulongole mwe kilemba icho amamikaga kilama cha zahabu, taji ikukile, enga ivo Zumbe Mnungu asigiile.

10 Niyo Musa aguha mavuta ya kuhaka niyo adimyagiila Dihema ne vint'hu vose vimndani mwakwe na kuvikukiza. 11 Mavuta yamwenga ayamyagilaga mnaga mwa he kilingo cha kutambikila nk'hanana mfungate. Avimyagilaga mavuta ne vit'hu vakwe vose ne dikanga ne kisimiko chakwe no kuviika kwa ndima ya Zumbe Mnungu du. 12 Iviyaiviya Musa amwiikaga Haluni kwa ndima ya Zumbe Mnungu kwa kumgidilaga mavuta yakukile. 13 Niyo Musa awaleta wana wa Haluni kulongole na kuwavala k'hazu na kuwanyinya msipi mwe vigudi na kuwavala kilemba enga ivo Zumbe Mnungu amsigiile Musa.

14 Niyo Musa aileta njeku ya malavo ya kuusila wavu. Haluni na wanawe niyo wageleka mikono yawe mwo mtwi uwo we njeku iyo. 15 Musa niyo achinja iyo injeku, na kuguha sakame na kuzihaka mp'hembe zose mwe kilingo cho kutambikila kwa kadole kakwe na kuhakukiza. Niyo aguha sakame isigale na kwiitila hasi he kilingo cha kutambikilaa kwa kuidamanyila mviko wo mwivano. 16 Niyo, aguha mavuta yose ya mwo utumbo wakwe, na hant'hu hedi he diini hamwenga na figo zose mbili na mavuta yakwe na kuvokela mwe kilingo cho kutambikila. 17 Mna dijeku idyo na nyama yakwe na nk'hingo yakwe na kitole chakwe, nakavokela kuse ye nk'hambi enga ivo Zumbe Mnungu amsigiile Musa.

18 Niyo Musa amlavila ndolome ya malavo ya kokwa. Haluni na wanawe wagelekaga mikono yawe mwo mtwi we ndolome iyo. 19 Musa niyo aichinja na kunyunyizila sakame mwe kilingo cho kutambikila nt'hendelo zose. 20 Nakaikant'ha indolome iyo vihendohendo na kuvoka hamwenga no mtwi wakwe na mavuta yakwe. 21 Umwo andaga akei kuyoka nakusunt'ha vint'hu va kundani ne viga kwa mazi niyo ayoka indolome yose mnanga mwe hant'hu ho kulavila nt'hambiko enga malavo ya kokwa, ni malavo yakumwelela Zumbe Mnungu yakulavigwa kwa kokwa enga ivo Zumbe amsigiilaga Musa.

22 Niyo aleta ndolome ya kaidi kwajili ya kuikilwa mwo undima. Haluni na wanawe waikaga mikono yawe mwo mtwi we ndolome iyo. 23 Musa aichinjaga niyo aguha sakame kudodo ye ndolome iyo na kumhaka Haluni mwe digutwi dyakwe dya kulume na kadole kakulu mwo mkono wa kulume na dye kiga chakwe cha kulume. 24 Wana Haluni niyo weza, Musa nae awahakaga sakame mwa magutwi yawo ya kulume, na madole yawe ya mwe mikono va kulume na viga vawe va kulume. Sakame nt'huhu anyunyizilaga mwe zint'hendelo zose za he kilingo cha kutambikila. 25 Niyo, aguha mavuta yose ye ndolome ya komkila hamwenga na mavuta yakugubika utumbo ne diini hamwenga na figo zose zimbili na mavuta yakwe ya mwe kiga cha kulume che nyama iyo ye ndolome. 26 Niyo, mwe idya nt'hangulu ye mikate heigeligwe ugwadu iikigwe ha Zumbe Mnungu, aguhaga mkate umwenga uhanganywe na mavuta no mkate umwenga msisili no kuiika yose mnanga mwa mavuta ye iyo indolome na mnanga mwe kiga cha kulume. 27 Musa kaviika mwe mikono ya Haluni na mwe mikono ya wanawe, na kuvinula ha meso ha Zumbe Mnungu kunda malavo yakulavigwa kwa Zumbe. 28 Niyo Musa aviguha vint'hu ivo vose kulawa mwe mikono yawe na kuvoka mnanga mwe he kilingo cha kutambikila kwa malavo ya kumwiika mnt'hu na vinthu mwo undima, ni mhemp'he wa kwelela, malavo alavilwe Zumbe Mnungu kwa kokwa. 29 Naho Musa kaguhaga kifuwa ni fungu dya Musa dye ngoto ya malavo yo kwinulwa no kwiikwa mwo undima niyo ainula ha Zumbe Mnungu. Ni malavo ya kwinulwa enga ivo Zumbe Mnungu amsigilaga Musa.

30 Niyo Musa aguha mavuta ya kuikila vint'hu mwo undima na sakame ludodo kulawa mwe he kilingo cha kutambikila na kumnyunyizila Haluni na wanawe na mavalo yawe. Ivo Musa kawaika Haluni na wanawe hamwenga na mavalo yawe mwo undima wa Zumbe.

31 Musa niyo awagamba Haluni na wanawe, "Yambikeni inyama idya kudya kulongole hagihi ne nk'hili ye Dihema Dikukile, mwidiile aho he nk'hili hamwenga ne mikate kulawa mwe nt'hangulu ya malavo ya nyuwe kuikwa mwo undima enga ivo Zumbe Mnungu asigiile kugamba Haluni na wanawe nawadye. 32 Nyama yeyose hegu mikate yeyose neisigale vokwe moto. 33 Msekuhalawa he nk'hili ye Dihema Dikukile mpaka mazuwa yo kuikwa kwenyu mwo undima yakint'he, kwaviya kuikwa kwenyu mwo undima kwaguha mazuwa mfungate. 34 Zumbe Mnungu kasigiila kidamanye enga ivo kigambilwe dielo vileke Zumbe awausileni wavu wenyu. 35 Nomwikale aaha mwo lwazo lwe Dihema Dikukile kilo na msi kwa mazuwa mfungate mkadamanya mbuli asigiile Mnungu, cheivo nombanike. Nivo Zumbe Mnungu anisigiile." 36 Ivo, Haluni na wanawe niyo wadamanya mbuli izo zose wasigiilwe ni Mnungu kwa sila ya Musa.