1 Zumbe Mnungu amgambaga Musa, 2 Wagambe Waizilaeli wakwigaile mavuta yedi ya zeituni vileke uvikwelezele vimuli mwe Dihema Dikukile, vikweele haheina kuzima mazuwa yose. 3 Haluni naavikweleze vimuli kila kisingi naho naavileke vikweele mpaka mtondo ho ha Zumbe kuse ye dipazia kulongole ye Disanduku dye Ndagano idyo dikwitangwa Hant'hu Hakukise. Sigilizi ino neinde ni ya mazuwa yose kwe vyeleko venyu vikwiza. 4 Haluni naaviike vimuli mnanga mwe kinala cho kwiikila vimuli kidamnywe kwa zahabu yedi. Vimuli vaungwa kukweela haheina kuzima ha Zumbe Mnungu.

5 Guha makopo mlongo na maidi ya nt'hifu ya unga niyo woka mikate mlongo na miidi. 6 Wiike mwe misafa miidi, kila msafa mikate mtandatu, wiike ha Zumbe mnanga mwe meza idamanywe kwa zahabu yedi. 7 Kila safa ika vikombe va zahabu vina ubani wedi vileke wokigwe kunda malavo kwangu hant'hu he mikate. 8 Kila mwe adizuwa dyo Kuhumula, Haluni naaiike mikate mihya ino ha Zumbe Mnungu kwajili ya wana wa Waizilaeli, kunda lagano dya mazuwa yose. 9 Mikate ino neidigwe ni Haluni na wanawe du, nawaidiile hant'hu hakukile kwaviya ni fungu dyawe dikukise dya nk'hande akulavilwa Zumbe Mnungu kwa kokwa.

10 Kwandaga na mnt'hu andaga na ise Mmisili, nine naye andaga Mwizilaeli etangagwa Shelomiti. 11 Mbwanga naye andaga Mwiizilaeli, nine etangagwa Shelomiti mwana Dibili ywe dikabila dya Dani. Hadya he nk'hambi alemanaga na Mwiizilaeli. Mwo kulemana uko adihomolaga dizina dya Zumbe Mnungu, kwa ivo want'hu wamwigalaga mbwanga uyo kwa Musa. 12 Niyo wamvugailaga mwe nyumba uyo mbwanga vileke wagoje Zumbe Mnungu awagambile cho kumtenda.

13 Niho Zumbe Mnungu amgamba Musa, 14 "Mwigale kuse ye nk'hambi. Kila yudya amwivile uyo mbwanga akadihomola na kudiligita nawageleka mikono yawe mwo mtwi wakwe niyo mdugano wose umtowe maiwe mpaka abanike. 15 Wagambile Waizilaeli. Uneva mnt'hu yeyose naamligite miye Mnungu ywakwe, naasulumizwe kwo wavu wakwe. 16 Yeyose naadihomole dizina dya Zumbe Mnungu vaungwa akomigwe. Mdugano wose noumtoe maiwe. Uneva ni mta kwiza hegu mkaya, akadibela zina dya Zumbe, vaungwa akomigwe.

17 "Uneva mnt'hu yeyose naamkome mnt'hu mtuhu, uyo naye vaungwa akomwe. 18 Mnt'hu yeyose naakome mfugwa wa mnt'hu mtuhu naye aungwa alihizwe mfugwa una ugima.

19 "Uneva mnt'hu yeyose anamlumiza miyawe, chochose icho amtendile naye naatendelwe iivo. 20 Uneva kagogojola mavuha naye naagogojolwe mavuha, ziso kwa ziso naho zino kwa zino. Enga ivo amtendile miyawe iivo naye niivo naatendelwe. 21 Yeyose akukoma mfugwa ywa miyawe aungwa alihizwe, mna yeyose naakome mnt'hu, uyo naye vaungwa akomwe. 22 Nomnde na miko iiyo kwa mta kwiza na kwa mkaya. Ni miye Zumbe Mnungu ywenyu."

23 Umwo Musa eze alonge na Waizilaeli, woho nawo wamwigalaga kuse ye nk'hambi yudya amhomole Zumbe Mnungu niyo wamtowa maiwe no kubanika. Ivo Waizilaeli wadamanya enga ivo Zumbe amsigiilaga Musa.