1 Zumbe niyo amgamba Musa, 2 alonge na Waizilaeli naho uwagambile mwa mazuwa ya kinyemi yakukile ayo niyasagule ayo wakuungwa kudugana hamwenga wanivike.

3 Kuna mazuwa mtandatu mkudaha kudamanya ndima, mna mwe Dizuwa dya mfungate ni zuwa dya kuhumula dikuka kwangu miye Zumbe Mnungu, mwaungwa kudugana mnivike hohose aho nomnde. 4 Aya nayo mazuwa ya kinyemi ya Zumbe Mnungu. Ni midugano ikukile iyo nomwiibwelekeze kwa lupisi lwakwe.

5 Pasaka ya Zumbe yakonga kisingi cha mwe dizuwa dya mlongo na kane ya mwezi wa nk'hongo. 6 Mwe dizuwa dya mlongo na shano ya mwezi uwo wa nk'hongo Zuwa dye Kinyemi dya Zumbe dye mikate heigeligwe ugwadu yakonga, kwa mazuwa mfungate nomdye mikate heigeligwe ugwadu. 7 Mwe dizuwa dya nk'hongo nomdamanye mdugano ukukile naho msekudamanya ndima zenu za mazuwa yose. 8 Mwe kila dizuwa dya mfungate nomumwigaile Zumbe malavo ya kokwa kwa moto. Mwo lupisi lwa mazuwa mfungate nomdamanye mdugano ukukile naho msekudamanya ndima zenu za mazuwa yose.

9 Zumbe Mnungu niyo amgamba Musa, 10 Longa na Waizilaeli na uwagambile, mkeza kwingila mwe isi iyo neniwenk'he na kulozola ulozo we isi iyo, igaleni kwa mlava nt'hambiko hant'hu ha nk'hongo ha ulozo. 11 Mlava nt'hambiko naadamanye kilagiso cha kunilavila Zuwa dikutimila dya kuhumula vileke mzumilwe. 12 Dizuwa idyo nomwinule hant'hu ho ulozo, mwaungwa mumlavile Zumbe ndolome ya mwaka umwenga heiina lema kunda malavo ya kokwa kwa Zumbe Mnungu. 13 Hamwenga na malavo ya unga hant'hu haidi mwo mlongo hamwenga na lita nt'hatu ya unga uhanganywe na mavuta ya zeituni kunda malavo ya kokwa kwa Zumbe Mnungu inde mhemp'he wedi wa kumwelela Mnungu, hamwenga na lita imwenga ya divai inde malavo yo kunywa. 14 Naho msekudya mkate wowose, hegu chochose kikazingwe hegu unga mhya mpaka mwe dizuwa diya no mumletele Mnungu ywenyu malavo. Ino neinde sigilizi ya mazuwa yose kwa vyeleko vikwiza, hohose nomwikale.

15 Nomuwaze majuma mfungate yakint'hile kukongela dizuwa diya ditimile Dizuwa dyo kuhumula diya mwegalaga malavo yenyu ya ulozo ya kwinulwa nayakint'he mazuwa ya kuhumula mfungate. 16 Mwe dizuwa dya milongo mishano mwa majuma yadya mfungate dye Dizuwa dya kuhumula dya mfungate nomuwaze mazuwa milongo mishano, niho nomwigaile Zumbe malavo ya unga mhya. 17 Kulawa hohose nomwikale, igaleni mikate miidi yambikwe kwa unga wedi kunda malavo ya kwinulwa hamwenga ne mikate idamanywe kwa lita nt'hatu za unga wedi ugeligwe ugwadu, mikate iyo neinde malavo kulimula kwa Zumbe mnungu. 18 Laveni hamwenga na iyo mikate na wana ngoto mfungate, kila yumwenga wo mwaka umwenga na jeku dodo na ndolome mbili nawande malavo yo kokwa kwa moto ilavigwe kwa Zumbe, hamwenga na malavo ya unga na malavo yo kunywa ni malavo yana mhemp'he wedi ukumwelela Zumbe Mnungu. 19 Naho laveni vulata dimwenga kunda malavo ya wavu na ndolome mbili kila imwenga ya mwaka umwenga, kwajili ya malavo yo utondowazi. 20 Mlava nt'hambiko naalave mkate wa kulimbula ne zindolome zimbili kunda malavo ya kwinulwa ha Zumbe Mnungu kwajili ya walava nt'hambiko, hamwenga na mikate ya kulimbulwa. Ni malavo yakukile kwangu. 21 Zuwa idyo nomleke kudamanya ndima zenyu za mazuwa yose, nomdugane mnivike. Ino neinde sigilizi ya mazuwa yose kwa vyeleko vikwiza hohose nomwikale.

22 Aho nomvune ulozo wenyu, msekuvuna mpaka mwe mihaka yo mgunda wenyu naho msekuuya niyo mwasokoza ulozo udya usigale. Uwo nomuuleke kwajili ya wakiwa na watakwiza. Ni miye Zumbe Mnungu ywenyu.

23 Zumbe Mnungu niyo amgamba Musa, 24 Wagambile Waizilaeli kugamba. Mwe dizuwa dya nk'hongo dyo mwezi wo mfungate nomnde na zuwa dyo kuhumula, mdugano ukukile kwa nk'humbukila aho gunda dikeza kutoigwa. 25 Msekudamanya ndima zenyu zose za mazuwa yose, mna Mumlavile Zumbe Mnungu ywenyu malavo ya kokwa.

26 Zumbe niyo amgamba Musa, 27 Zuwa dyo mlongo dyo mwezi wa mfungate ni zuwa dyo mwivano nomdamanye mdugano ukukile, mfunge, naho mumlavile Zumbe Mnungu ywenyu malavo ya kokwa. 28 Msekudamanya ndima mwe dizuwa idyo, kwaviya ni zuwa dyo mwivano, mwivano ukudamanyika kwajili yenyu ha meso ha Zumbe Mnungu ywenyu. 29 Mnt'hu yeyose he kufunga zuwa idyo aungwa alemelwe na want'hu wakwe. 30 Mnt'hu yeyose naadamanye ndima zuwa idyo nenimkome amlawe mwa want'hu wakwe. 31 Homdamanye ndima naho, ino neinde sigilizi ya mazuwa yose kwa vyeleko vikwiza hohose nomwikale. 32 Naho Zuwa dyo mfungate dyo kuhumula kwenyu, mwaungwa mfunge. Kukongela kisingi zuwa dya kenda dyo mwezi mpaka kisingi kikutimila, nomtoze zuwa dyo mfungate kwenyu.

33 Zumbe niyo amgamba Musa, 34 Wagambile Waizilaeli, mwe dizuwa dya mlongo na shano dyo mwezi wa mfungate zuwa dya kinyemi dya Zumbe dye viheha nedikonge, nayo neinde kwa mazuwa mfungate. 35 Zuwa dya nk'hongo ni dyo mdugano ukukile, msekudamanya ndima zenyu za mazuwa yose. 36 Kila zuwa mwa mazuwa ayo mfungate mlavileni Zumbe Mnungu malao ya kokwa, mwe dizuwa dyo mnane nomumlavile naho Zumbe Mnungu malavo ya kokwa, uwo nounde mdugano ukukile naho msekudamanya ndima yoyose mwe dizuwa idyo.

37 Aya nayo mazuwa ye kinyemi nomnde nayo, mwa ayo nombwelekeze kudamanya mdugano ukukile wa kumlavila Zumbe malavo ya kokwa malavo ya nk'hande na malavo ya kunywa. Kila malavo neyegalwe kwa zuwa dyakwe. 38 Malavo aya hiyo enga yadya ya Mazuwa yo Kuhumula ya Zumbe, naho hiyo enga yadya ya mageleko, naho hiyo enga yadya ye vilapi venu, naho hiyoenga yadya mkulava kwa kuunga wenye, ayo mkumlavila Zumbe.

39 Ivo kukongela zuwa dyo mlongo na shano ya mwezi wa mfungate, mkajika kuvuna ulozo wenyu we isi, nomdamanye wila wa kinyemi kwa Zumbe kwa mazuwa mfungate, zuwa dya nk'hongo nedinde dyo kuhumula, na hata zuwa dyo mnane. 40 Mwe dizuwa dya nk'hongo nomguhe matunda yedi ya mti na matambi ye mitende na matambi yana mahuto mengi ya mielebi naho mdamanye viheha, nyuwe nanywe nomwange ha meso ha Zumbe ywenyu kwa mazuwa mfungate. 41 Nomditende dizuwa idyo kunda zuwa dya kinyemi dya Zumbe Mnungu kwa mazuwa mfungate kila mwaka. Idi nedinde lagizo dya mazuwa yose kwa vyeleko vikwiza, mwidamanye mwo mwezi wo mfungate. 42 Nomwikale mwe viheha kwa mazuwa mfungate. Welekwa wose wa Waizilaeli nawekale mwe viheha mwo lupisi ulo. 43 Mbui ino neiwatende vyeleko vyenyu vimanye kugamba nehiwatenda Waizilaeli wekale mwe viheha umwo nawalavaga mwe isi ya Misili. Miye ni miye Zumbe ywenyu.

44 Kwa ivo Musa naka wabwelekezela Waizilaeli zuwa dya kinyemi disigiilwe ni Zumbe Mnungu.