1 Aya nayo maIagizo mwa malavo yo kulihiza. Malavo ayo yakukisa. 2 Malavo ya masa nayachinjigwe hadya hant'hu malavo yo kokwa yakuchinjilwa, sakame yakwe nenyunyizilwe nt'hendelo zose za he kilingo cha kutambikila. 3 Mavuta yakwe yose yo mkila na yadya yakugubika utumbo nayalavigwe na kokwa pele, 4 hamwenga ne zifigo zakwe mbili na mavuta yakwe yazigubika hant'hu hedi ne diini. 5 Mlava nt'hambiko navyokele mnanga mwa he kilingo cha kutambikila kunda malavo yo kokwa kwa Zumbe Mnungu. Aya ni malavo ya malihizo. 6 Wakuungwa kudya malavo ayo ni wagosi wa lukolo lwa walava nt'hambiko du neidilwe hant'hu hakukile, kwaviya ni malavo ya kukise.

7 Mwiko ni umwenga du wa malavo ya kuusa wavu na malavo ya kuusa masa. Nyama iyo neidigwe ni mlava nt'hambiko akudamanya mviko wo mwivano. 8 Mlava nt'hambiko akulava malavo ya kokwa kwajili ya mnt'hu yeyose naaguhe nk'hingo ya nyama ilavigwe. 9 Kila malavo ya yambikwe mwe nyungu hegu yokigwe mwe kikalango nayande ya mlava nt'hambiko akuyalava. 10 Kila malavo ya unga houkwambikwa unde uhanganywa na mavuta hegu unyaile, nounde wa welekwa wa Haluni na wose wapangilane viligane.

11 Izi nizo zisigilizi zint'huhu mwo kulava malavo ayo want'u nawadamanye kunda na utondowazi akulavilwa Zumbe Mnungu. 12 Uneva mnt'hu alava malavo ya nt'hogola kwa Zumbe Mnungu naalave nyama na maandazi heyegeligwe ugwadu, naho naalave mikate izamile ihanganywe mavuta ye zeituni ne mikate misisili ihakigwe mavuta ya zeituni hegu maandazi yahanganywe na mavuta ya zeituni. 13 Hamwenga na malavo yakwe ya utondowazi ya kumtogola Mnungu neegale maandazi yageligwe ugwadu. 14 Mwa maandazi ayo, naamlavile Zumbe Mnungu andazi dimwenga kulawa mwe kila malavo, maandazi ayo nayande ya mlava nt'hambiko akuhanyunyuzila he kilingo cha kutambikila sakame ya malavo yo utondowazi. 15 Nyama iyo ya malavo yo utondowazi ichinjigwe kwaajili ya nt'hogola kwa Zumbe Mnungu neidigwe mwe dizuwa iidyo ikulavilwa, naho haikuungwa kusigazwa mpaka mtondo.

16 Mna uneva malavo ayo ya utondowazi ni kwajili yo kukint'hiza kilapi hegu ya kuunga, nayadigwe mwe dizuwa iidyo naaletele malavo yakwe, mna chochose nekisigale nekidigwe zuwa dikutimila. 17 Mna nyama yose ya malavo neisigale mpaka mwe dizuwa dya katatu neyokwe. 18 Uneva nyama yeyose ya malavo yo utondowazi inadigwa mwe dizuwa dya katatu neimuihize, naho malavo ayo hayahokelwe kwa wambizi wakwe. Nyama iyo yaihiza naho akuunga aidye naayaguhe masa yakwe. 19 Uneva manda yoyose mwe nyama ya malavo yo utondowazi inakwafa kint'hu kisavu isekudigwa, nyama iyo neyokwe. Nyama int'huhu yadaha kudigwa ni mnt'hu yeyose akukile mwo kumvika Zumbe. 20 Mna mnt'hu akuunga adye nyama ya malavo yo utondowazi ilavigwe kwa Zumbe Mnungu, naaguhe usavu wakwe, naazagulwe mwa want'hu wakwe. 21 Mnt'hu yeyose anakwafa kint'hu chochose kisavu hegu kint'hu kisavu cha mnt'hu, hegu mfugwa msavu niyo adya nyama iyo ya malavo yo utondowazi alavilwe Zumbe Mnungu, naazagulwe mwa want'hu wakwe.

22 Zumbe Mnungu niyo alonga naho na Musa, 23 Wagambile wana wa waizilaeli wasekudya mavuta ya ng'ombe na ndolome hegu mbuzi. 24 Mavuta ya mfugwa wowose ubanike hegu kala dya kwembago dikomigwe yadaha kudamanyila ndima nt'huhu, mna msekuyadya. 25 Mnt'hu yeyose akudya mavuta ya mfugwa alavilwe kwa Zumbe Mnungu malavo yo kokwa naazagulwe mwa want'hu wakwe. 26 Naho mwe nyumba zenyu msekudya sakame yeyose idya, inde ya kadege hegu ya mfugwa. 27 Mnt'hu yeyose anadya sakame, naalemelwe ni want'hu wa Mnungu.

28 Zumbe Mnungu amgambila Musa, 29 Wagambile want'hu wa Izilaeli, mnt'hu yeyose analava malavo ya utondowazi kwa Zumbe Mnungu, egale malavo ayo kwa Mnungu kulawa mwa malavo yakwe ya utondowazi. 30 Kwa mikono yakwe mwenye naamletele Zumbe Mnungu malavo ya kokwa. Neegale mavuta hamwenga ne kifua neenule kifua ha Zumbe kulagisa kugamba ni malavo kwa Zumbe. 31 Mlava nt'hambiko naayoke mavuta yose mnanga mwe kilingo cho kutambikila, mna nyama ye kifua neinde ya Haluni na wanawe. 32 Kiga cha kulume cha kunyuma nomwink'he mlava nt'hambiko kunda malavo ya kumwink'ha Zumbe kulawa mwa malavo yenyu yo utondowazi. 33 Kiga icho nekinde cho mlava nt'hambiko mwelekwa ywa Haluni akulava malavo ya sakame yo utondowazi na mavuta yakwe. 34 Zumbe Mnungu kawalagiza want'hu wa Izilaeli kifua cha malavo kwa Zumbe ne kiga icho cho mfugwa wa malavo yawo ya utondowazi, wamwink'he mlava nt'hambiko Haluni na wanawe, kwaviya hant'hu aho haikigwa kwa awo walava nt'hambiko mazuwa yose. 35 Idi ni fungu dya nk'hande kulawa mwa malavo yo kokwa yakulavigwa kwa Zumbe Mnungu enk'higwe Haluni na wanawe kukongela mwe dizuwa watendagwa kunda walava nt'hambiko kwa Zumbe Mnungu.

36 Zuwa diya weze wahakigwe mavuta, Zumbe asigiilaga kugamba Waizilaeli wank'higwe fungu idi enga dya mazuwa yose kwa vyeleko vikwiza. 37 Ivo, ayo ni malagizo mwe malavo ya kokwa na malavo ya uhule na malavo ya kuusa wavu na malavo ya kulihiza malavo ya kumwiika mnt'hu mwo undima na malavo ya utondowazi, 38 ayo Zumbe Mnungu amsigiilagai Musa mwo mnima Sinai mmwe dizuwa Zumbe awasigiilaga want'hu wa Izilaeli wegale malavo yawe kwa Zumbe Mnungu kudya kwe dijangwa dya Sinai.