1 Zumbe niyo awagamba Musa na Haluni, 2 uneva mnt'hu yeyose ananda na uvimbe hegu uhele hegu balo ding'aile mwe nk'handa yakwe iyo ikudaha kunda unyonge wa nk'handa wa kukehakiza, aungwa egalwe kwa Haluni mlava nt'hambiko hegu kwa wanawe. 3 Mlava nt'hambiko naamkaule iyo ink'hwenge imwe nk'handa yakwe naho uneva fili za hant'hu aho zihituka kunda zing'aile ikanda ink'hwenge ibonyela kundani ye nk'handa, ivo neinde unyonge wa kukehakiza. Mlava nt'hambiko naamkaule na kumbwelekeza mnt'hu uyo kunda msavu. 4 Uneva kiwalo kimnanga mwakwe kingala mna hakioneke kwingila kundani na fili hazioneke kunda zingala, mlava nt'hambiko naamkaule, naho naampagule mnt'hu uyo kwa mazuwa mfungate. 5 Mwe dizuwa dya mfungate, mlava nt'hambiko naamkaule uneva haone uhituzi wa idya ink'hwenge naho hongezekela mwe nk'handa, naampagule naho kwa mazuwa mfungate. 6 Mwe mazuwa mfungate namkaule naho uneva ink'hwenge neisinyale na hakigenyele mwe nk'handa, mlava nt'hambiko nambwelekeze mnt'hu uyo kunda ni ywedi, ni uhele du. Naho vaungwa mnt'hu uyo afigise suke zakwe, na yehe naye naande kazumilwa kwa Zumbe Mnungu. 7 Mna inanda ni udya uhele nougenyele mwe nk'handa yakwe umwo yehe akelagise kwa mlava nt'hambiko na kubwelekezwa kazumilwa kwa Zumbe Mnungu, vaungwa auye naho kwa mlava nt'hambiko. 8 Mlava nt'hambiko naamkaule naho, uneva uhele ugenyela mwe nk'handa, nambwelekeze kunda msavu kwaviya ni unyonge wa nk'handa wa kukehakiza.

9 Mwo lupisi lwolwose mnt'hu ananda na unyonge wa nk'handa, vaungwa egalwe kwa mlava nt'hambiko. 10 Mlava nt'hambiko naamkaule naho uneva ana uvimbe ung'aile mnanga mwe nk'handa utendile fili kunda zing'aile naho uneva kuna nyama mbisi mndani mwo uvimbe, 11 ni unyonge wa leme wa nk'handa, mlava nt'hambiko naambwelekeze kunda msavu, haampagule naho kwaviya kanda ni msavu kale. 12 Uneva unyonge umwenela mwe nk'handa nyakwe, enga ivo mlava nt'hambiko naaone nt'hambiko naadahe kuona kugamba ugenyela mwe nk'handa yose ya unyonge kulawa mwo mtwi mpaka kwe viga, 13 mlava nt'hambiko naamkaule naho uneva unyonge ugenyela mwo mwili wose naambwelekeze mnt'hu uyo kunda hiyo msavu. Kwaviya mwili wose nounde ung'ala yehe ni naande hiyo msavu. 14 Mna uneva nk'wenge mbisi inaoneka mwo mwili wa mnt'hu uyo naande msavu. 15 Mlava nt'hambiko anaona uvimbe naambwelekeze mnt'hu uyo kunda msavu kwaviya ayo ni matana . 16 Uneva uwo uvimbe unahituka na kunda ung'ala, aungwa auye naho kwa mlava nt'hambiko. 17 Mlava nt'hambiko naamkaule, uneva uvimbe uhituka ung'aile, mlava nt'hambiko naambwelekeze mnt'hu uyo kunda ywedi.

18 Mna mnt'hu ananda na ihu mwe nk'handa yakwe nadyo niyo dyahona, 19 naho hant'hu handile ne dihu hahituka uvimbe ung'aile hegu kiwalo kina unk'hundu na ungaile, aungwa akakelagise kwa mlava nt'hambiko. 20 Mlava nt'hambiko naamkaule uyo mnt'hu, mlava nt'hambiko anaona hahituka kunda habonyela, fili zaahant'hu aho nazo zihituka kunda zing'ala mlava nt'hambiko naambwelekeze mnt'hu uyo kunda msavu. Uno ni unyonge wa kukehakiza ulaile mwe diihu. 21 Mna uneva mlavant'hambiko anamkaula niyo aona hahana fili zing'aile mndani mwakwe hegu kubonyela, mna hahunguka, mlava nt'hambiko naamwazagule kwa mazuwa mfungate. 22 Akajika aho uneva wagenyela mwe nk'handa, mlava nt'hambiko naambwelekeze kunda msavu, nounde ni unyonge wa kukehakiza. 23 Mna uneva hadya hant'hu hahagenyele, idyo nedinde kovu du dye diihu, mlava nt'hambiko naambwelekeze kunda ywedi.

24 Uneva mnt'hu anahya mwe nk'handa yakwe no kulaila nk'hwenge ing'aile naho nk'hwenge iyo inanda ink'hundu hegu ing'ala, 25 mlava nt'hambiko naakaule idya ink'hwenge, uneva fili mwe nk'hwenge iyo zihituka kunda zing'ala naho habonyela uwo nounde unyonge wa kuhakizana ulekile hakalaila kukeukiza. Mlava nt'hambiko naambwelekeze kunda msavu. 26 Mna uneva mlava nt'hambiko naakaule na kuona kugamba hakuna fili zing'aile mwe nk'hwenge hegu haibonyele naho hakonga kuhunguka, ivo mlava nt'hambiko naampagule kwa mazuwa mfungate. 27 Mwe dizuwa dya mfungate mlava nt'hambiko naamkaule naho, uneva wagenyela mwe nk'handa, mlava nt'hambiko naambwelekeze kunda msavu, ni unyonge wa nk'handa wa kukehakiza. 28 Mna uneva nk'hovu iyo haigenyele mwe nk'handa naho hahunguka, ni uvimbe ulaile kwa moto, mlava nt'hambiko naambwelekeze kunda ywedi, ni nk'hovu du ilaile mwo kuhya.

29 Mgosi hegu mvele ananda na nk'hwenge mnanga mwo mtwi hegu kilevula, 30 mlava nt'hambiko naakaule nk'hwenge, naho uneva naaone kunda ibonyela fili nazo zi mnanga zina manjano naho sisili, mlava nt'hambiko naambwelekeze mnt'hu uyo kunda msavu, kwaviya ni uhele naho ni unyonge wa nk'handa wa kukehakiza umwo mtwi hegu kilevula. 31 Mna uneva mlava nt'hambiko anakaula nk'hwenge enga iyo, inaoneka kugamba hahabonyele naho hana hafili nt'hitu mnanga mwakwe niho naampagule mnt'hu uyo kwa mazuwa mfungate. 32 Mazuwa mfungate mlava nt'hambiko naakaule nk'hwenge idya, uneva ink'wenge haigenyele naho hahana fili za manjano naho hahabonyele hohose, 33 mntu uyo vaungwa amogwe mna asekumogwa hadya he nk'hwenge, naho mlava nt'hambiko naampagule kwa mazuwa mfungate matuhu. 34 Mazuwa mfungate mlava nt'hambiko naakaule naho udya uhele, unanda haugenyele mwe nk'handa naho hakuna habonyele, mlava nt'hambiko naambwelekeze kunda ywedi. 35 Mna ikanda uhele unagenyela mnanga mwe nk'handa aho ajike kubwelekezwa kunda ywedi, 36 mlava nt'hambiko naamkaule uneva uhele ugenyela mwe nk'handa mlava nt'hambiko haungwe kukaula kugamba ana fili za manjano, ikindedi mnt'hu uyo naande msavu. 37 Mna, hata ivo, uneva mlava nt'hambiko anaona kugamba uhele haugenyele naho fili nt'hitu zakula kulawa hadya, ink'hwenge neinde ihona. Mlava nt'hambiko naabwelekeze kugamba mnt'hu uyo ni ywedi. 38 Uneva mgosi hegu mvele ananda na kiwalo kingaile mnanga mwe nk'handa yakwe, 39 mlava nt'hambiko naawakaule, uneva viwalo ivo vina ung'azi houkuoneka vedi, ni vihele heviina wiihi vikelavilize du mwe nk'handa, mnt'hu uyo ni ywedi. 40 Mwa mgosi heena fili mna ana hala, yehe ni ywedi. 41 Inanda hana fili kwekibongolo hegu kwekihanga mnt'hu uyo ana kihala du naho ywedi. 42 Mna uneva ana nk'hwenge ina unk'hundu na ung'aile mwo mtwi wakwe une kihala hegu mwe kihanga, ni unyonge wa nk'handa wa kukehakiza ukulaila mwawe. 43 Mlava nt'hambiko, naamkaule naho uneva nk'hwenge ivimbile mnanga mwo mtwi wakwe hegu mwe kihanga chakwe inda ink'hundu hegu ing'ala enga unyonge wa nk'handa wa kukehakiza, 44 mnt'hu uyo ni mnyonge na yehe ni msavu. Mlava nt'hambiko naambwelekeze kunda msavu kwaajili ya nk'hwenge mwo mtwi wakwe.

45 Mnt'hu mta unyonge enga uwo wa kukehakiza vaungwa avale suke zibunt'hike, asekukucha zifili zakwe, aike mikono mwo mnomo wakwe wa kulanga niyo agutila akagamba, "Miye ni msavu naho miye ni msavu!" 46 Kwa mazuwa yose naande na unyonge uwo wa kukehakiza naasigale kunsa msavu, vaungwa ekale ekedu, naho aungwa ekale kuse ye nk'hambi.

47 "Uneva valo dyodyose dihakizwa bwibwi, dikanda valo dya mazoya ya ngoto hegu kitambala king'aile" 48 dyodyose disumigwe hegu kulukigwa dikanda dya kitambala king'aile hegu dya mazoya ya ngoto, nk'hingo yoyose hegu kidamanywe kwa nk'hingo, 49 naho uneva bwibwi iyo ina langi ikwani hegu ink'hundu mwe divalo idyo, valo idyo dina bwibwi ivo vaungwa mlavant'hambiko alagiswe. 50 Mlava nt'hambiko naakaule bwibwi iyo niyo aika kunk'handa isuke iyo kwa mazuwa mfungate. 51 Mwe dizuwa dya mfungate naaukaule naho, uneva bwibwi ugenyela mwe suke hegu kint'hu kisumigwe kwa mazoya ya ngoto hegu nk'hingo hegu kidamanywe kwa vovose viya, ni bwibwi ukubananga suke, suke iyo savu. 52 Mlavant'hambiko naayoke moto isuke iyo kwaviya ina bwibwi ikuhakiza.

53 Uneva mlava nt'hambiko naakaule niyo aona kugamba bwibwi igenyele mwe suke hegu mwe vint'hu va nk'hingo, 54 naasigiile kugamba kint'hu icho kisunt'hwe. Na kukipagula kwa mazuwa mfungate. 55 Uneva kint'hu kihakizwe kikeza kunda kisunt'higwa, mlava nt'hambiko naakikaule naho. Uneva bwibwi haihituke hata uneva haigenyele icho kint'hu nnekinde kisavu. Suke iyo nouyoke moto hata uneva bwibwi iyo ikunyuma hegu ikulongole. 56 Uneva mlava nt'hambiko naaone kugamaba diwalo dihunguka aho isuke ize ifigiswe, yehe naatatule hadya hane bwibwi. 57 Mna uneva ikelavanya mwe suke hegu kint'hu kisumigwe hegu kilukigwe, hegu kint'hu cha nk'hingo, udya bwibwi igenyela, chochose kina bwibwi chaungwa chokigwe. 58 Uneva Suke hegu kint'hu kisumigwe hegu kulukigwe hegu kint'hu chochose cha nk'hingo kisunt'hwe na kuuswa bwibwi, chaungwa naho kusunt'hwa nacho nekinde chedi.

59 Ivo aya nayo malagizo mwe mbuli ye zisuke za mazoya ya ngoto na suke yedi ing'aile, yasumigwe hegu kulukigwa, hegu kint'hu chochose cha nk'hingo, kwaajili ya kuvibwelekeza kunda vedi hegu visavu.