1 Zumbe niyo amgamba Musa, 2 Izi nizo zsigilizi mwo mnyonge uyu mwo lupisi lwa kumdamanyila mviko wa kumkukiza umwo akaletwa kwo mlava nt'hambiko. 3 Mlava nt'hambiko naaite akamkaule kuse ye nk'hambi. Uneva mnt'hu uyo naande kahona unyonge wakwe we nk'handa wa kukehakiza, 4 mlava nt'hambiko naalagize vint'hu viletigwe kwaajili ya mnt'hu akuunga akukizwe, madege maidi yedi magima na mti wa mweleti na kitambala kik'hundu na hisopo. 5 Mlava nt'hambiko naalagize kugamba mwa madege yadya maidi dimwenga dichinjigwe mwe nyungu ina mazi yatekigwe kwo mto. 6 Akajika mlava nt'hambiko naadiguhe didege digima na kuditubwika hamwenga no mti wa mwelezi ne kitambala kink'hundu na hisipo mndani mwe sakame ya diya didege dichinjigwe mwa mazi yatekigwe kwo mto. 7 Naamnyunyizile sakame iyo nk'hanana mfungate yudya akukukizwa na kumbwelekeza kugamba kakukizwa. Niho naadilekele didege diya digima dikeitile. 8 Uyo mnt'hu anakukizwa vaungwa afigise zisuke zakwe, naho amoge fili zakwe zose naho ahake mazi na kunda ywedi. Akajika neengile kwe nk'hambi, mna neekale kuse ye dihema dyakwe kwa mazuwa mfungate. 9 Mazuwa mfungate naamoge naho fili zakwe zose za mwo mtwi na mwe kilevula na makumbitu na fili nt'huhu zose, naho afigise suke zakwe zose na kuhaka mazi mwo mwili naho naande ywedi.

10 Zuwa dya mnane, vaungwa egale ndolome mbili na mwate umwenga zose za mwaka umwenga heziina malema hamwenga na makopo matatu ya unga wedi uhanganywe na kikombe kimwenga cha mavuta kwaajili ya malavo ya unga. 11 Akajika mlava nt'hambiko akuunga amkukize uyo mnt'hu naamkimalise ha Zumbe akanda na vint'hu viya vose hagihi ne nk'hili ye Dihema Dikukile. 12 Niho mlava nt'hambiko namguhe yumwenga mwe ziya zindolome na kuilava malavo ya kuusa masa hamwenga na lita imwenga ya mavuta, naaviinule ha Zumbe kulagisa kugamba ni malavo kwa Zumbe. 13 Naaichinje iyo ingoto hant'hu hakukile ayo ni malavo ya kuusa wavu na yadya yo kokwa hokuchinjilwa. Enga ivo yeli malavo ya kuusa wavu na malavo ya masa ni ya mlava nt'hambiko, nayo yakukisa. 14 Mlava nt'hambiko naaguhe sakame ludodo ya malavo ya kuusila masa na kugela mwe mp'hembe ye digutwi dya kulume dya yudya nakukizwe, na mwe didole dikulu dya kulume na dole kulu dya kiga cha kulume. 15 Mlava nt'hambiko naaguhe ludodo ya mavuta niyo agela mwe kifumba cha mkono wakwe wa kumoso, 16 naachank'hize kadole kakwe mwo mkono wa kulume mwe mavuta ye mwe kifumba chakwe na kwa kadole ako naamnyunyizile mnt'hu yudya akukukizwa nk'hanana mfungate ha Zumbe. 17 Mlava nt'hambiko naaguhe mavuta yasigale ye mwe kifumba chakwe no kumhaka uyo mnt'hu akukukizwa mwe mp'hembe ye digutwi dyakwe dya kulume nakadole dikulu dyo mkono wakulume we didole dikulu ahadya amhakile isakame yo kuusila masa. 18 Mlava nt'hambiko naayahake mavuta yasigale mwe kifumba chakwe mnanga mwo mtwi wa yudya akukizwe naho naatende mwivano ha Zumbe Mnungu.

19 Niho mlava nt'hambiko naalave nt'hambiko ya malavo ya wavu na kudamanya mwivano kwajili ya yudya naakukizwe kulawa mwo usavu wakwe. Yakajika ayo, mlava nt'hambiko naachinje malavo ya kokwa, 20 na kulava mnanga mwe he kilingo cha kutambikila, hamwenga na malavo ya unga vileke amdamanyile mwivano, yehe naye naande hiyo msavu.

21 Mna uneva mnt'hu uyo mkiwa naho hakudaha kupata vint'hu ivi, neegale ndolome imwenga enga malavo ya kuusa masa na kuinula kulagisa kugamba kamdamanyila mwivano. Neegale kopo dimwenga dya unga uhanganywe na mavuta kwajili ya malavo ya unga na imwenga ya nt'hatu ye lita, 22 na suwa mbili hegu makinda maidi ya suwa, kiya naadahe kupata, yumwenga kwa malavo ya kuusila wavu na mtuhu kwa malavo ya kokwa. 23 Mwe dizuwa dya mnane vaungwa avigale vint'hu ivo kwa mlava nt'hambiko, kwaajili ya kukukizwa kwakwe mwe nk'hili ye Dihema Dikukile ha Zumbe. 24 Mlava nt'hambiko naamguhe ndolome kwaajili ya malavo yakuusila masa hamwenga ne lita ya mavuta no kuvinula kulanga kulagisa kugamba amlavila Zumbe, 25 naye naaichinje iyo indolome ya malavo ya kuusila masa naho naaguhe sakame ludodo ya malavo ya kuusila masa na kuihaka mwe digutwi dya kulume dya yudya akukukizwa, naaihake mwe didole dya mkono wa kulume na kadole kakulu ka mwe kiga cha kulume. 26 mlava nt'hambiko naaigide mavuta ludodo mwe kifumba chakwe cho mkono wa kumoso, 27 naho naachank'hize kadole kakwe no kumnyunyizila mnt'hum uyo mavuta yai ye kwe kifumba chakwe cha kumoso nk'hanana mfungate ha Zumbe Mnungu. 28 Mlavant'hambiko naamhake mnt'hu uyo mavuta akukukizwa mwe mp'hembe ye digutwi ndyakwe dyo kulume mwa kadole dikulu dya kulume na he didole dikulu dye kiga dya kulume. Naamhake hant'hu aadya amhakile idya isakame ya malavo kuusila masa 29 Mavuta yasigale mwo mkono wakwe, naamhake mnt'hu uyo mwo mtwi vileke amdamanyile mnt'hu uyo mwivano ha Zumbe Mnungu. 30 Akajika mlava nt'hambiko ye suwa imwenga hegu suwa manga mbili hegu makinda ya suwa, ayo mnt'hu akuyadaha kuyapata, 31 yumwenga kwaajili ya malavo ya kuusa wavu mtuhu naye kwa malavo ya kokwa, hamwenga na malavo ya unga. Kwa sila ino mlava nt'hambiko naamdamanyile mwivano mnt'hu uyo ha Zumbe Mnungu. 32 Izi nizo zisigilizi kwa mnt'hu yeyose mta unyonge wa nk'handa kwa heena malavo kwaajili ya kukukizwa kwakwe.

33 Zumbe niyo amgamba Musa na Haluni, 34 Aho mkengila mwe isi ya Kanaani iyo huwenk'hani inde yenyu, name niyo naika bwibwi mwe isi, 35 ivo mta inyumba iyo aungwa akamgambile mlava nt'hambiko kugamba kaona bwibwi mwe nyumba yakwe. 36 Mlava nt'hambiko naalagize want'hu walave kila kint'hu mwe nyumba ikanda akei kugenda kukaula unyonge, chaivo kila kint'hu nekinde kisavu. Yakajika ayo mlava nt'hambiko naaiite akaikaule inyumba iyo. 37 Naakaule bwibwi iyo mwe nk'handula za mwe nyumba, uneva zina langi ya manjano hegu ink'hundu naho kuna malanga mwo lukandula, 38 mlava nt'hambiko naafose na kuuvugala ulwivi lwe nyumba iyo kwa mazuwa mfungate. 39 Mwe dizuwa dya mfungate mlava nt'hambiko naauye kuikaula inyumba. Uneva unyonge ugenyela mwo lukandula, 40 mlavant'hambiko naalagize want'hu walave maiwe yose yahakizwe yahauswe na kuduulwa hant'hu hasavu kuse yo mzi. 41 Nk'handula zose za kundani ye nyumba iyo nezikwangulwe niyo disanga dyakwe dyaduulwa hant'hu hasavu kuse yo mzi. 42 Akajika nawaguhe maiwe mahya na kuzenga hakandulwe kwa ulongo mhya no kuikiziga vedi inyumba iyo.

43 Uneva bwibwi iyo neilaile naho aho ikeza kumoligwa maiwe ayo kanda yalavigwa kale kukwangulwa no kuikiziga, 44 mlava nt'hambiko naaikaule, uneva bwibwi igenyela kundani kwe nyumba iyo, ni bwibwi ikubananga, nyumba iyo heizumilwe kwa Mnungu. 45 Yaungwa imolwe, maiwe yakwe na mizengo yakwe na ulongo wakwe vikaduulwe kuse yo mzi hant'hu hasavu. 46 Yeyose neengile mwe nyumba iyo ikanda ivugalwa naande msavu mpaka kisingi. 47 Yeyose naagone hegu kudya mndani nk'hande mwe nyumba iyo aungwa afigise zisuke zakwe. 48 Mna inanda mlava nt'hambiko neeze kuikaula na kubwiila bwibwi haigenyele naho ize yajike kukizigwa, naaibwelekeze nyumba iyo kunda yedi, kwaviya bwibwi isila. 49 Vileke nyumba iyo ikukizwe, mta nyumba aungwa egale madege maidi na mti wa mwelezi na kitambala chedi king'aile nyuzi zink'hundu za mazoya ya ngoto na tambi dya mti wa hisipo. 50 Mlavant'hambiko naachinje dege dimwenga mwa yadya madege maidi mwe nyungu ina mazi yedi yatekigwe kwe nc'hoko, 51 naho naaguhe mti wa mwelezi na hisipo na nyuzi za kitambala chedi king'aile nyuzi za mazoya ya ngoto yek'hundu na dege gima na kuvitubwika mndani mwe sakame ya didege dichinjigwe mwa mazi ya kwe nc'hoko na kuvinyunyizila mwe nyumba idya nk'hanana mfungate. 52 Naho naaikukize inyumba kwa sakame ye didege na mazi yatekigwe kwe nc'hoko ne didege digima na mbao za mti wa mwelezi na hisipo na nyuzi zink'hundu za mazoya ya ngoto. 53 Niho naadilekele diya didege digima diite kuse yo mzi mwe migunda. Kwa sila ino naadamanye mwivano kwaajili ye nyumba idya, nayo neinde yedi.

54 Izi nizo zisigilizi mwa maine ye hengi ya nk'handa ya kukehakiza, 55 bwibwi mndani mwe zisuke hegu mndani mwe nyumba, 56 kwa uvimbe, vihele hegu balo kikung'ala. 57 Imiko ino yakilagisa, kint'hu iki kisavu hegu hicho kisavu.