1 Mnt'hu yeyose analeta malavo ya unga ha meso ha Zumbe Mnungu, naande kuutigint'ha yande malavo yakwe yande unga msisili, naye naugele mavuta ya zeituni na kugela ubani mnanga mwakwe. 2 Akajika naawegaile awo walavant'hambiko we mp'huga ya Haluni. Naaguhe fumba dya unga uwo una mavuta ya zeituni na ubani na kumwigaila mlava nt'hambiko yumwenga, uyo naawoke mnanga mwe he kilingo cha kutambikila unde malavo ya nk'humbukila kwa Zumbe Mnungu. Ayo ni malavo yo kokwa yana mhemp'he wedi ukumwelela Zumbe Mnungu. 3 Malavo yo unga yasigale nayande ya Haluni na wanawe, ni kint'hu kikukise alavilwe Zumbe Mnungu kwa kokigwa.

4 Uneva ni malavo ya mkate wambikwe usekunda na ugwadu. Wadaha kunda mkate we ngano uhanganywe na mavuta ye zeituni, hegu mikate misisili heihakigwe mavuta naho heiina ugwadu.

5 Uneva ni malavo yo mkate wambikwe mwe nyungu, iyo yaungwa ihanganywe na mavuta ye zeituni haheina ugwadu. 6 Mikate iyo neikant'hwekant'hwe na kugidilwa mavuta, nayo nayande malavo ya unga.

7 Uneva malavo ayo ukulava ni ya mikate yambikilwe mwe nyungu, iyo neidamanywe na unga msisili uhanganywe na mavuta ye mizeituni. 8 Nowigale malavo ayo ya unga yadamanywe kwa vint'hu ivo ha Zumbe Mnungu, mlava nt'hambiko naye nayegale he kilingo cha kulavila nt'hambiko ya kokwa. 9 Mlava nt'hambiko naaguhe malavo ayo ikanda ni malavo ya nk'humbukila yo unga na kuyoka he kilingo cha kutambikila. Ayo ni malavo yo kokwa yana mhemp'he wedi wa kumwelela Zumbe Mnungu. 10 Malavo yo unga yasigale nayande ya Haluni na wanawe, ni kint'hu kikukise kilavigwe kwa Zumbe Mnungu kwa kokigwa.

11 Malavo yoyose ya unga ukumwigaila Zumbe Mnungu, yaungwa yadamanywe haheina ugwadu, kwaviya havikuungwa kudamanya kwa ugwadu hegu uki mwa malavo ya kokwa yakulavilwa Zumbe Mnungu. 12 Wadaha kuvigala kwa Zumbe Mnungu enga malavo ya k'hongo yo ulozo, mna yasekokwa mnanga mwa he kilingo cha kutambikila enga mhemp'he ukumwelela. 13 Nougele munyu mnanga mwa malavo yako yose yo unga. Munyu walagisa lagano idyo Mnungu adamanye na nyuwe ivo msekujala kugela munyu mwa malavo yenyu yose. 14 Ukamlavila Zumbe Mnungu malavo yo ulozo wa nk'hongo mlave ulozo ufizigwe. 15 Weye nawe nougele mavuta na ubani mnanga mwakwe, ayo ni malavo ya unga. 16 Mlava nt'hambiko naayoke malavo ayo yo unga utigint'we na mavuta hamwenga na ubani wakwe wose, inde nt'hambiko ya nk'humbukila, ayo ni malavo akulavilwa Mnungu kwa kokigwa.