1 Zumbe Mnungu amgambaga Musa, 2 Awagambile want'hu wa Izilaeli kugamba mnt'hu yeyose anetukila adamanye wavu hegu kubananga sigilizi yeyose ya Mnungu naaungwe atende ivi.

3 Uneva Mlava nt'hambiko Mkulu anadamanya wavu no kuwegaila want'hu masa, uyo naalave njeku heiina lema na kulava nt'hambiko kwa Zumbe Mnungu inde malavo ya kuusila wavu wakwe. 4 Neegale injeku iyo ho lwivi lwe Dihema Dikukile ha Zumbe Mnungu yehe naageleke mkono wakwe mwo mtwi we njeku iyo no kuichinja ha Zumbe Mnungu. 5 Uyo Mlava nt'hambiko Mkulu naaguhe wasakame ludodo we njeku heiina lema na kuigala mndani mwe Dihema Dikukile. 6 Naachank'hize kadole kakwe mwe sakame no kudimyagila dipazia dya hant'hu hakukile dya ha Zumbe Mnungu k'hanana mfungate. 7 Naho mlava nt'hambiko naaguhe sakame ludodo na kuhakiza mwe zimp'hembe za he kilingo cha kulavila nt'hambiko za kufunk'hizila ubani una mhemp'he kwa Zumbe Mnungu, mwe Dihema Dikukile. Sakame ikusigala naaitile hasi kwe kisimiko cha hant'hu hokulavila nt'hambiko ho kokela malavo hho mwingiilo we Dihema Dikukile. 8 Naho na ayause amavuta yose ye njeku ya malavo yo kuusila wavu na mavuta yagubike vint'hu va kundani, 9 figo mbili na mavuta yakwe, ne diini, izi ni izia zikuuswa kwa mfugwa ywa malavo yo utondowazi. 10 Enga ivo mavuta yakulavigwa mwe njeku ikulavigwa kunda malavo ya kuusila wavu. Mlava nt'hambiko naayokele mnanga mwe kilingo che nt'hambiko yo kokwa. 11 Mna nk'hingo ya iyo ing'ombe ne nyama no mtwi ne viga no utumbo wakwe. 12 Ivo ng'ombe yose isigale naaigale kuse ye nk'hambi hant'hu hazumilwe ni Zumbe Mnungu kwa kukupuilwa maivu, naho naavokele aaho mnanga mwe zink'huni.

13 Inanda want'hu wose wa Izilaeli wadamanya wavu no kunda na masa niyo wetukila wabananga sigilizi imwenga ya Zumbe Mnungu, 14 uneva wavu uwo unamanyika, want'hu wose na walave njeku inde malavo ya kuusila wavu. Nawaigale kwe Dihema Dikukile. 15 Wadala wo mdugano wa want'hu nawaigeleke mikono mwo mtwi we njeku no kuichinja ha meso ha Zumbe Mnungu. 16 Yudya Mlava nt'hambiko Mkulu naegale wasakame ludodo we njeku kundani ye Dihema Dikukile. 17 Naachank'hize kadole kakwe mwe sakame no kudimyagila dipaziya dya hant'hu hakukile dya ha Zumbe Mnungu k'hanana mfungate. 18 Niyo sakame isigale naaihake mwe zimp'hembe za he kilingo cha kulavila nt'hambiko zo mhemp'he kulongole ye Dihema Dikukile. Sakame yose ikusigala naaitile hasi mwe hant'hu ha kulavila nt'habiko no kuyokela int'hambiko ihagihi ne nk'hili ye Dihema Dikukile. 19 Mavuta yose ye nyama iyo naaviguhe na kuvoka mwa he kilingo cha kutambikila. 20 Kwa ivo naaitende iyo injeku enga ivo akutendaga kwa idya int'huhu ye nt'hambiko ya kuusila wavu. Ivo uyo mlava nt'hambiko naawadamanyile want'hu mwivano kwajili yo wavu, nawo nawausilwe. 21 Niho naaiguhe injeku iyo na kuigala kuse ye nk'hambi na kuyoka pele enga ivo akutendaga mwa idya int'huhu. Iyo ni nt'hambiko ya kuusa wavu mwa want'hu.

22 Uneva kilongozi kadamanya wavu haheina kumanya kwa kudamanya kint'hu kilemezwe ni miko ya Zumbe Mnungu ywakwe, na ivo niyo anda na masa, 23 no kugambilwa uwavu uwo adamanye, naalete malavo yakwe ye divulata hediina lema. 24 Nageleke mkono wakwe mnanga mwo mtwi we divulata na kumchinja hant'hu wa kuchinjila nt'hambiko na kokwa ha Zumbe Mnungu. Iyo ni nt'hambiko ya kuusa wavu. 25 Mlava nt'hambiko naachank'hize kadole kakwe mwe sakame ya kuusa wavu na kuzihaka mwe mp'hembe mwa he kilingo cha kulavila nt'hambiko ya kokigwa. Sakame ikusigala naitile kwe kisimiko che nt'hambiko yo koka. 26 Mavuta yose ye divulata naayoke mwa he kilingo cha kutambikila enga ivo ayatendile mavuta ya malavo yo utondowazi kwajili yo wavu wakwe. Kwaivo mlava nt'hambiko namdamanyile mwivano kwajili yo wavu wakwe naye naausilwe.

27 Uneva mnt'hu yeyose anetukila kadamanyama wavu kwa kudamanya kint'hu kilemezwe ni miko ya Mnungu niyo anda na masa, 28 naho anagambilwa kugamba kadamanya wavu, neegale nt'hambiko ya nt'hogota heiina lema enga malavo kwajili ya kuusa wavu uwo adamanye. 29 Naageleke mkono wakwe mnanga mwo mtwi we nt'hogota iyo ye nt'hambiko yo kuusa wavu na kuichinja hant'hu ha kuchinjila malavo yo kokwa. 30 Mlava nt'hambiko naachank'hize kadole kakwe mwe sakame na kuihaka sakame mwe zip'hembe he kilingo cha kutambikila, ikusigala naaitile mwe kisimiko che kilingo cho kutamikila. 31 Mavuta yose ye nt'hogota iyo nayahause enga ivo akuhausa mavuta ye nyama ye nt'hambiko yo utondowazi mlava nt'hambiko naye navoke mnanga hant'hu hakulaviala nt'hambiko naho mhemp'he wedi noumwelela Zumbe Mnungu. Ivo mlava nt'hambiko naamdamanyile mnt'hu uyo mwivano, naho yehe naausilwe wavu wakwe.

32 Uneva mnt'hu uyo neegale mwana ngoto kwajili ya nt'hambiko ya kuusa wavu, ivo naalete nt'hogota heena lema. 33 Nageleke mkono wakwe mnanga mwo mtwi wo mwana ngoto ywe nt'hambiko yo kuusa wavu, no kumchinja ahadya wakuchinjila nyama za malavo yo kokwa. 34 Mlava nt'hambiko naachank'hize kadole kakwe mwe sakame na kuzihaka mwe mp'hembe mwa hant'hu ha kulavila malavo ya nt'hambiko yo kokwa. Sakame ikusigala naitile mwe kisimiko che kilingo cho kutambikila. 35 Mavuta yose nayahauswe enga ivo akuhausa mavuta ya mwana ngoto ywa malavo yo utondowazi, naho mlava nt'hambiko naavokele he kilingo cho kutambikila hamwenga na malavo ya kokwa kwa Zumbe Mnungu. Ivo mlava nt'hambiko namdamanyile mnt'hu uyo mwivano, naho yehe naausilwe wavu wakwe.