1 Zumbe Mnungu alongaga na Musa akamgamba, 2 Wagambile Haluni na wanawe na want'hu wose malagizo ayo Zumbe Mnungu alagize. 3 Mnt'hu yeyose mwa Izilaeli anachinja njeku hegu ndolome hegu mbuzi mndani hegu kuse ye nk'hambi, 4 mnt'hu ywa Izilaeli akuunga achinjile ng'ombe hegu ngoto hegu mbuzi hant'hu hatuhu naho hiyo he nk'hili ye Dihema Dikukile kunda malavo ha Zumbe, mnt'hu uyo naande kabananga mwiko, naande na masa ya kwitila sakame, haagendeele kufanyanywa kunda yumwenga mwa want'hu wa Zumbe Mnungu. 5 Sigilizi ino ni kugamba, Haluse Waizilaeli waungwa kwigala kwa Zumbe Mnungu malavo ye zinyama zawe wakuuunga wachinje kwe zink'honde. Vaungwa wazigale kwa walava nt'hambiko nuko kugamba kwa Zumbe Mnungu aho he nk'hili ye Dihema Dikukile niyo wachinja kunda nt'hambiko ya malavo ya utondowazi. 6 Mlava nt'hambiko naamyagile sakame mnanga mwe he kilingo cha kutambikila hagihi ne nk'hili ye Dihema Dikukile niyo oka mavuta ayo kunda mhemp'he wa kumwelela Zumbe Mnungu. 7 Hawagendeele naho kunda hi wahuilwa kwa Zumbe Mnungu kwa kuchinja nyama zawe na kulava nt'hambiko kwa mahili enga mbuzi. Ino neinde sigilizi ya mazuwa yose kwawe na kwe vyeleko vawe vose.

8 Uwagambe Waizilaeli kugamba mnt'hu yeyose hegu mtakwiza yeyose hegu akwikala mwa nyuwe naalave malavo ya kokwa hegu nt'hambiko, 9 naho hanaviletile mwe nk'hili ye Dihema Dikukile vileke alave nt'hambiko kwa Zumbe, mnt'hu uyo naapagulwe mwa want'hu wakwe.

10 Mwizilaeli yeyose, hegu mta kwiza yeyose, hegu akwikala mwa nyuwe, akudya sakame yeyose, nenimuihie mnt'hu uyo akudya sakame naapagulwe ni want'hu wangu. 11 Kwaviya ugima wa kiumbwa umndani mwe sakame naho miye hiwenk'hani iyo sakame vileke mdamanye mwivano kwaajili yenyu hat'hu ha kulavila nt'hambiko, ugima umwe sakame iyo nuwo ukudamanya mwivano kwajili yo wikazi wa mnt'hu. 12 Kwaivo nehiwagambila Waizilaeli, kugamba woho hegu mtakwiza akwikala kwawe haadye nyama ifile kibudu.

13 Mwiizilaeli yeyose hegu mta kwiza yeyose hegu akwikala mwenyu noongole nyama hegu madege yakudigwa vaungwa aitile sakame niyo aisiliza isakame ye nyama iyo kwa sanga. 14 Kwaviya ugima wa kila kiumbwa umwe sakame yakwe. Nivo vikuleka hiwagambila Waizilaeli kugamba msekudya sakame ya kiumbwa chochose, kwaviya ugima wa kiumbwa kimwe sakame yakwe, yeyose naadye sakame vaungwa azagulwe mwa want'hu wakwe.

15 Mnt'hu yeyose, ande mkaya hegu mta kwiza naadye kimba chochose hegu kikomigwe na makala ya kwe mbago vaungwa afigise suke zakwe naho ahake mazi, naho naande msavu mwe kihendo cho mviko mpaka kisingi, niho naande kakuka.

16 Mna uneva hafigise suke zakwe naho hahakile mazi, naasengelwe.