1 Zumbe niyo amgamba Musa, 2 Longa na Waizilaeli uwagambe, mwo lupisi mgosi yeyose akakoza ufila, uwo wamtenda ande usavu. 3 Naho uno nuwo umwiko mwo usavu uwo mwo lupisi lwose akalawa ufila hegu ufila unasita mndani mwakwe, mnt'hu uyo naande msavu. 4 Lusazi lwolwose naagonele mnt'hu akulawa ufila nolunde lusavu naho chochose neekaile nekinde kisavu. 5 Yeyose naakwafe lusazi lwakwe vaungwa afigise zisuke zakwe naho ahake mazi mwo mwili, yehe naye naande msavu mpaka kisingi, 6 naho yeyose neekale mwe difumbi dyodyose ekaile mta kulawa ufila, aungwa afigise zisuke zakwe naho ahake mazi mwo mwili, yehe naye naande msavu mpaka kisingi. 7 Yeyose naamkwafe mnt'hu akulawa ufila aungwa afigise zisuke zakwe naho ahake mazi yehe naye naande msavu mpaka kisingi. 8 Uneva mnt'hu anatweelwa mate ni mnt'hu akulawa ufila, mnt'hu uyo atweelwe mate aungwa afigise zisuke zakwe naho ahake mazi mwo mwili, naho naande msavu mpaka kisingi. 9 Kilago chochose ekaile mnt'hu akulawa ufila nekinde kisavu, 10 naho yeyose naakwafe kilago icho andile akekaila naande msavu mpaka kisingi. Yeyose neenule vint'hu ivo aungwa afigise suke zakwe naho ahake mazi mwo mwili, yehe naye naande msavu mpaka kisingi. 11 Yeyose akulawa ufila ana mkwafa mnt'hu haheina kuhaka mikono yakwe kwa mazi, akwafigwe aungwa afigise suke zakwe naho ahake mazi, yehe naye naande msavu mpaka kisingi. 12 Nyungu ya ulongo neikwafigwe ni mnt'hu uyo, yaungwa itulwe mna kint'hu chochose cha mti nekisunt'hwe kwa mazi.

13 Mwo lupisi mnt'hu naakukizwe kulawa kwa ufila wakwe, aungwa kuwaza mazuwa mfungate za mwo ukuki, aungwa afigise suke zakwe naho ahake mazi ya kwo mto na yehe naakuke. 14 Mwe dizuwa dya mnane, naaguhe suwa mbili hegu makinda maidi ya suwa, eze ha Zumbe mwe nk'hili ye Dihema Dikukile na kumwink'ha mlava nt'hambiko. 15 Mlava nt'hambiko naalave madege, dimwenga kunda malavo ya kuusa wavu dituhu nadyo kunda malavo yo kokwa. Naadamanye mwivano ha Zumbe Mnungu kwaajili ya uyo mnt'hu akulawa ufila.

16 Mwo lupisi mnt'hu akalawa mbeyu za cheleko chakwe, vaungwa ahake mazi mwo mwili wose, yehe naye naande msavu mpaka kisingi. 17 Kila suke hegu chochose kidamanywe ne nk'hingo inetikilwa na mbeyu za cheleko yaungwa ifigiswe kwa mazi na neinde na usavu mpaka kisingi. 18 Uneva mgosi anagona na mvele na kulawa mbeyu za cheleko, waungwa wose wahake mazi na woho nawande wasavu mpaka kisingi.

19 Uneva mvele ananda mwe mazuwa yakwe ya kila mwezi, naande hakuzumilwa hameso ha Mnungu kwa mazuwa mfungate. Naho mnt'hu yeyose naamkwafe naande hakuzumilwa hameso ha Mnungu mpaka kisingi. 20 Mnt'hu yeyose anakwafa lusazi umwo akanda mwa mazuwa yakwe uyo mvele naaungwe afigise suke zakwe na kuhaka mazi mwo mwili naye naande hakuzumilwa hameso ha Mnungu mpaka kisingi. 21 Yeyose naakwafe lusazi lwakwe vaungwa afigise suke zakwe naho ahake mazi na yehe naande hakuzumilwa hameso ha Mnungu mpaka kisingi. 22 Yeyose naakwafe kint'hu chochose neekaile vaungwa afigise suke zakwe naho ahake mazi na yehe naande hakuzumilwa hameso ha Mnungu mpaka kisingi. 23 Yeyose anakwafa lusazi hegu kint'hu chochose icho akikaile mvele uyo naande hakuzumilwa hameso ha Mnungu mpaka kisingi. 24 Uneva mgosi naagone na mvele mwa mazuwa yakwe, naande hakuzumilwa hameso ha Mnungu kwa mazuwa mfungate, lusazi lwolwose naagonele uyo mgosi nolunde haluzumilwe hameso ha Mnungu.

25 Uneva mvele anajink'hiza mazuwa mwa mazuwa yakwe ya kila mwezi naande msavu enga ivo akundagaga mwa mazuwa yakwe. 26 Lusazi lwolwose akulugonela mwo lupisi ulwo hegu difumbi dyodyose akudikaila nekinda hakikuzumilwa hameso ha Mnungu enga viya akundagaga mwa mazuwa yakwe. 27 Mnt'hu yeyose naakwafe vint'hu ivo naande hakuzumilwa hameso ha Mnungu, vaungwa afigise suke zakwe naho ahake mazi yehe naye naande hakuzumilwa hameso ha Mnungu mpaka kisingi. 28 Mwo lupisi akabinda mazuwa yakwe vaungwa awaze mazuwa mfungate na akajika aho naazumilwe hameso ha Mnungu. 29 Mwe dizuwa naaguhe suwa mbili hegu suwa manga mbili na kuyegala kwa mlava nt'hambiko mwe nk'hili ye Dihema Dikukile. 30 Mlava nt'hambiko naalave suwa imwenga kwaajili ya malavo ya kuusila wavu, int'huhu nayo kwajili malavo ya kokwa. Kwa sila ino naadamanye mwivano kwaajili yakwe ha Zumbe Mnungu kwa kunda mwa mazuwa yakwe.

31 Nivo nomulangilize Waizileli na usavu wawe, wanase kuihomola Nyumba ank'hulu ya Mnungu ikukile i mwawe wekengila umwo na usavu wawe, wanadamanya ivo nawakomigwe.

32 Aya ni malagizo ya mgosi akulawa ufila, na kwaajili ya yeyose naalawe na mbeyu za cheleko, 33 iviya iviya kwa mvele mwe mazuwa yakwe, kwaajili ya mgosi hegu mvele yeyose na kunda hakuzumilwa ha Zumbe Mnungu naafoswe na ufila na kwaajili mgosi akugona na mvele akanda hakuzumilwa ha Zumbe Mnungu.