1 Zumbe niyo agamba, "Msekukedamanyila mahili hegu kuika hili dya kusongola hegu iwe dya kuvikila, naho msekukeikila iwe dya kusongola mwe isi yenyu na kudivika. Ni miye Zumbe Mnungu ywenyu. 2 Tozeseni mazuwa yangu ya kuhumula na kuhogoha Dihema Dikukile. Ni miye Zumbe Mnungu.

3 "Uneva nomtimile sigilizi zangu na kunda na wengele mwa malagizo yangu, 4 fula neinye mwe misimo yakwe, sanga nayo neilave ulozo wakwe miti ya kwembago nayo neyeleke matunda yakwe. 5 Ulozo wenyu nounde mwingi, nomnde mkei mwahuta nk'hande mwo lupisi lwo kwaha zabibu, nomnde mwagendeela kwaha zabibu hata msimo wo kuhanda ukanda ubula. Nomnde na kila kint'hu nomuunge mdye, naho nomwikale kwa utondowazi mwe isi yenyu.

6 "Neniwenk'he utondowazi mwe isi, mgone hokunde naawatiseni. Neniwausileni makala yaihile mwe isi, naho hokunde na nk'hondo kwenyu. 7 Nomuwakulumbuze wank'hondo wenyu, nanywe nomuwakome na sime zenyu. 8 Want'hu wenyu washano nawawahume wank'hondo gana imwenga, naho want'hu wenyu gana dimwenga nawawahume wank'hondo alufu mlongo. Wank'hondo wenyu nawo nawakomwe kwa bamba iivi mkasinya. 9 Neniwavikile na kuwenk'hani wana wengi, name neni ikint'hize Ndagano yangu kwenyu. 10 Mwo lupisi lwa kuvuna nomnde mkei mwadya ulozo wo lupisi lwomboke. Naho nomuuse yadya ya kale vileke mgele amahya. 11 Nenikale mwenyu mwa Dihema dyangu Dikukile naho heni walekeni. 12 Nenigende mgati mwenyu ninde Mnungu ywenyu, nyuwe nanywe nomnde want'hu wangu. 13 Ni miye Zumbe Mnungu ywenyu niwalavile mwe isi ya Misili, vileke msekugendeela kunda watumwa wa Wamisili, naho nehiuusa udahi wandile ukawekailani niyo nawatenda mgende kwa weduvi."

14 "Mna uneva hamna nitegeleze na kudamanya aya yose huwasigiilani, 15 naho niyo mwazilemela zisigilizi zangu na kuihiya imiko yangu, naho mnadunduga kukint'hiza miko yangu na kubananga Ndagano yangu, 16 niho neni watendeni ivi. Neniwegaileni wogofi wa kwituka na lukolola helwiina ulaguzi na maine yakuunga yawegaileni meso yenyu kunda mant'hunt'hu na kuwahausila ugima wenyu. Nomhande mbeyu haheziina upati, kwaviya wank'hondo wenyu naweze wazitahe na kuzidya. 17 Neniwahitukile kunk'handa vileke mhumwe ni wank'hondo wenyu, wadya wakuwaihiya nawawekaileni, nanywe nomnyilike haheina mnt'hu akuwagulusani.

18 "Enga mwa ayo yose hamnanitegeleze, neniwasulumize nk'hanana mfungate kwajili yo wavu wenyu. 19 Nenibanange kukeduvya kwenu, hokunde na fula mwe isi yenyu, sanga neinyaile na kunda itogile enga kilama. 20 Ludole lwenyu nolunde helwiina kint'hu, kwaviya sanga yenyu heiwalavile ulozo wakwe, hegu miti heiwelekele matunda.

21 "Uneva mnagendeela kunda wank'hondo wangu na kulemela kunitegeleza, neniwegaileni makunt'ho nk'hanana mfungate, enga viya wavu wenyu ukuunga. 22 Neniwegaileni makala ya kwe mbago mwe migunda yenyu, nayawakome wana wenyu na kuibananga mifugwa yenyu nanywe nomnde wageke hata sila zenyu nezinde hazina want'hu wakuzigendela.

23 "Uneva hamwenga na masulumizo aya homnitegeleze mna mwagendeela kuhigana na miye, 24 miye name neniike uwihi na nyuwe na kuwasulumiza kwaajili ya wavu wenyu nk'hanana mfungate. 25 Neniwegaileni nk'hondo vileke nilihize kwa kubananga Indagago yangu. Aho nomwize mgulukile mwo mzi wenyu, nenigale maine heyekuhona, nanywe nomwikailwe ni wank'hondo wenyu. 26 Nk'hande yenyu neniihungule, wavele mlongo nawoke mikate yawe yose mwe diziko dimwenga, woho nawaupange mkate vihendo kwa kuhima. Nomdye mna homwigute.

27 "Uneva aya yose yanomboka mna niyo mwagendeela kunihiga no kulemela kuniva, 28 niho mwe maya yangu neninde mnk'hondo kwenyu, naho neniwasulumizeni nk'hanana mfungate kwajili ya wavu wenyu. 29 Gumbo neditendese nomdye nyama ya wana wenyu wa kigosi na wa kindele. 30 Nenihabanange hant'hu henyu ha kuvikila milungu naho nenimole hant'hu henyu ha kuvunk'hizila ubani na kuumbika vimba venyu mnanga mwe mahili yenyu hayeina ugima, name neniwaihiyeni nyuwe vitendese. 31 Mizi yenyu neniitende mahame na kubananga hant'hu hakukile henyu hakuvikila, miye name henelwelwe na malavo yenyu. 32 Neniibanange isi, vileke wank'hondo wenyu wakwiza kwikala umwo wetuke ubanangi uwo. 33 Neniwatende msambale mwe isi na kusomola bamba dyangu na kuwagulusa. Isi yenyu neibanangwe mizi yenyu nayo neinde mahame. 34 Niho isi neibwede mazuwa yakwe ya kuhumula mwo lupisi aho isi neinde heina kint'hu na nyuwe mkanda mwe isi ya wank'hondo wenyu, naho isi neihumule na kuonela kinyemi mazuwa yakwe yo kuhumula. 35 Mwo lupisi lwose isi ikasigala heina kint'hu, neihumule na kubweda mazuwa yakwe ya kuhumula ayo yandaga hayahali mwa mazuwa yenyu yo kuhumula aho mwekalaga mwe isi iyo.

36 "kwa mbuli ya weenyu wadya nawasigale, neniitende miyo yawe kunda na wogofi mwe isi ya wank'hondo wawe kugamba izwi dya zani dikakwakwalika nediwatende wanyilike. Nawaguluke enga want'hu wakunyilika nk'hondo, ikanda hahali akuwagulusani. 37 Nawakekwafe yumwenga mwa mtuhu enga wakunyilika nk'hondo, hata uneva hahali akuwagulusani. Ivo homdahe kukimala hameso ya wank'hondo wenyu. 38 Nombanangwe mgatigati mwe si ya wata kwiza, nanywe nommoselwe msanga mwe isi ya wank'hondo wenyu. 39 Watuhu wenyu nawasigale nawabanangwe mwe isi ya wank'hondo wenyu kwaajili ya wavu wenyu, naho nawabanangwe kwaajili ya wavu wa wakale wawe."

40 "Mna uneva nawakeiile wavu wawe na wa tati zawe, lulimi lwawe na uihi wawe mwangu, 41 uwo unitendile ninde na uihi na woho, hata mpaka kuweigaila uihi mwa wank'hondo wawe, naho mioyo yawe heivinilwe ikakeiila woho nawo niyo wazumila masulumizo yo wavu wawe, 42 nenikumbukile Ndagano yangu na Yakobo na Ndagano yangu na Isaka na Ndagano yangu na Ibulahimu, miye name neniikumbukile isi. 43 Kwaviya nawaileke isi heiina kint'hu, nayo neibwede mazuwa yakwe yo kuhumula ikanda heiina want'hu. Nawalihizwe kwaajili yo wavu wawe kwaviya nawazilemela zisigilizi zangu na kuiihiya miko yangu. 44 Mna hamwenga na ayo, wakanda mwe isi ya wank'hondo wawe, heniwalemele hegu kuwaihiya mpaka kuwabananga pele na kubananga Ndagano yangu na woho. Ni miye Zumbe Mnungu ywawe. 45 Mna kwaajili yawe neni ikumbukile Ndagano yangu na tati yawe niwalavile Misili hameso vileke ninde Mnungu ywawe. Ni miye Zumbe."

46 Aya nayo malagizo na zisigilizi na miko ya Zumbe awenk'hile Waizilaeli kwombokela kwa Musa mwo mnima Sinai.