1 Zumbe niyo amgamba Musa, 2 Uneva mnt'hu yeyose kadamanya wavu na kuswesa uhuwilwa kwa Zumbe kwa kumdant'hiliza miyawe mwa kint'hu enk'higwe hegu kilekigwe mwo ukimalizi wakwe hegu kibaigwa, naho ana mdant'hiliza, mnt'hu uyo naande na masa, 3 hegu analogota ugoli wagile na kudant'ha hegu kuika kilapi kwa lulimi, hegu anadamanya wavu wowose want'hu wakuudaha kuudamanya naande na masa. 4 Uneva mn'thu anadamanya wavu mwe sila yoyose mwe izi na kunda na masa, vaungwa avuze kiya abaile hegu kaguha kwa kumhoka, hegu kint'hu kiya chagile niyo akipata niyo agamba hakione, mnt'hu uyo akivuze kint'hu icho kwa mwenye. 5 Iviaivia uneva apataga kint'hu chochose kwa kilapi cha lulimi, aaho akeza kumanya kadamanya masa, aungwa amvuzile mwenye kint'hu icho kikint'hile naho noongezele imwenga ya shano ye diyombe dye vint'hu ivo vose. 6 Naho naamwigaile mlavant'hambiko ndolome hegu vulata hediina lema kwa Zumbe Mnungu malavo ya kuusila masa, diyombe dyo mfugwa uwo nedinde idiya diikigwe ni Dihema Dikukile. 7 Mlava nt'hambiko naalave malavo yo kuusa wavu ha meso ha Zumbe Mnungu, na kwa sila iyo mnt'hu uyo naande kausilwa wavu wakwe wose adamanye.

8 Zumbe Mnungu amgambaga Musa, 9 Mwink'he Haluni na wanawe malagizo aya, malagizo mwa malavo ya kokwa. Malavo ya kokwa yalekwe mnanga mwe kilingo cho kutambikila kilo na msi, moto wakwe nawo ugendeele kukweela. 10 Naho mlava nt'hambiko akanda kavala shati nt'hali, na kaputula yakwe idamaywe kwa kitambala king'aile, naaguhe yadya maivu ya malavo yadya kulawa mwe he kilingo cha kutambikila no kuyaika hank'handa ya hant'hu hokulavila nt'hambiko. 11 Akajika naayahambule mavalo ayo na kuvala matuhu, naayegale kuse ye nk'hambi amaivu ayo na kuyegala hant'hu hasagulwe. 12 Moto umnanga hant'hu hakulaviala nt'hambiko waungwa ugendele kukweela, naho usekuzimika. Kila zuwa mtondo mlava nt'hambiko naagele nk'huni mwo moto uwo naho mnanga mwakwe naaike malavo ya kokwa na koka mavuta ya malavo yo utondowazi mnanga mwakwe. 13 Moto nougendele kukweela mazuwa yose mnanga mwa he kilingo cha kutambikila haheina kuzima.

14 Aya nayo malagizo wo kulava malavo ya nk'hande. Welekwa wa Haluni nawegale malavo ya nk'hande kwa Zumbe kulongole kwa he kilingo cha kutambikila. 15 Mlava nt'hambiko naaguhe fumba dya unga na mavuta hamwenga na ubani wose mnanga mwo malavo ya nk'hande na kokwa mnanga mwa he kilingo cha kutambikila kulagisa kugamba malavo ayo yose ni ya Zumbe. Kunda malavo yana mhemp'he wedi ukumwelela Mnungu. 16 Unga usigale nouguhigwe ni Haluni na wanawe walava nt'hambiko no kwambika mikate kwa jili yawe haheina kuigela ugwadu. Nawaidiile heheina kuigela ugwadu no kuidiila ho lwazo ha hant'hu hakukile, mwe Dihema Dikukile. 17 Mna heiyokwe na ugwadu, hiwenk'ha enga fungu dyawe dya malavo yalavigwe kwangu kwa moto. Ni malavo yakukise enga viya yeli malavo ya kuusila wavu na kuliha kwajili yo wavu. 18 Welekwa we kigosi wa Haluni naawo du wakudaha kudya fungu idyo kwa viya iikwa kwa jili yao kulawa mwa malavo akulavilwa Zumbe Mnungu kwa kokwa. Naho mnt'hu yeyose naakwafe malavo ayo ye nk'hande naabanike.

19 Naho Zumbe Mnungu amgambaga Musa, 20 Aya ni malavo ya Haluni na wanawe wakuungwa kuleta kwa Zumbe umwo wakagelwa mavuta kwa ndima ya ulava nt'hambiko, kopo dimwenga dya unga kwa zuwa dimwenga. Nusu kopo naalave mtondo, nusu int'huhu naalave kisingi. 21 Unga uwo nouhanganywe na mavuta na kokwa akajika naavibesule vibesubesu niyo avoka pele mnanga mwa he kilingo cha kutambikila, mhemp'he wakwe ni wa kumwelela Mnungu. 22 Kila mwelekwa ywa Haluni uyo asagulwe kunda Mlava nt'hambiko Mkulu naalave malavo ayo, nayokwe pele enga malavo ha meso ha Zumbe Mnungu. Ino ni sigilizi ya mazuwa yose. Malavo yose nayokigwe pele. 23 Malavo yose ya nk'hande yalavigwe ni mlava nt'hambiko yasekudigwa naho yokwe yose.

24 Mnungu niyo amgamba Musa, 25 Mgambe Haluni na wanawe, ino ni sigilizi ya malavo ya kuusa wavu, hant'hu hadya hakuchijilwa malavo yo kokwa niho nahachinjilwe malavo ya kuusa wavu, ha meso ha Zumbe Mnungu. Malavo ayo yakukisa. 26 Mlava nt'hambiko akuilava naaidye iyo inyama. Naadile hant'hu hakukile ho lwazo lwe Dihema Dikukile. 27 Mnt'hu yeyose naakwafe nyama iyo ya malavo aungwa kunda akukile cheivo naakomwe, valo dyodyose neditikilwe ni sakame ya malavo ayo, nedisunt'hilwe hant'hu hakukile. 28 Mna inyungu yambikile inyama iyo yaungwa kutulwa, mna uneva nyungu yambikile inyama iyo ni ya shaba neisunt'higwe na kukukizwa. 29 Wakuungwa kuidya ni wo lukolo lwa walava nt'hambiko wekedu kwaviya ayo ni malavo yakukise. 30 Mna uneva sakame ya malavo yeyose ya kuusa wavu yegalwa mndani mwe Dihema Dikukile, vileke idamanyile mviko wo mwivano mwa hant'hu hakukile, malavo ayo nayokwe pele.