1 Zumbe Mnungu niyo alonga na Musa aho wana waidi wa Haluni weze wabanike umwo walavile moto hewizumilwe kwa Zumbe Mnungu. 2 Naho Zumbe Mnungu amgambaga Musa, Mgambe nduguyo Haluni adaha kwiita kunyuma ye dipazia Hant'hu Hakukise mwo lupisi lukuzumilwa du kwaviya aho naho hulaila mwe divunde aho he Disanduku dye Ndagano dikwitangwa Hant'hu he Zimbazi. Hanatimile ayo naabanike. 3 Ivo Haluni neengile Hant'hu Hakukise, ananda du kegala kale kajeku kwaajili ya malavo ya kuusa wavu na ndolome kwaajili ya malavo ya kokwa.

4 Ahake mwili wose akajika naavale suke zikukile, Neengile hant'hu aho hakukile akanda kavala suke ze kilava nt'hambiko, nk'hazu inga'ile na anyinye msipi wa kitambala king'aile mwe kigudi na kuvala kilemba mwo mtwi.

5 Naaguhe mavulata maidi kulawa kwa want'hu wa Waizilaeli kwaajili ya malavo ya wavu na ndolome kwaajili ya malavo ya kokwa. 6 Haluni naalave njeku iyo kwaajili ya malavo yakwe ya wavu vileke adamanye mwivano kwaajili yakwe mwenye ne nyumba yakwe. 7 Niho naayaguhe yadya mavulata maidi na kuyegala kwe nk'hili ye Dihema Dikukile. 8 Haluni naayatoele kula vileke asagule kulawa mwa mavulata ayo maidi. Dimwenga kwajili ya Zumbe Mnungu dituhu nadyo kwaajili ye divulata dikulavigwa kuse ye nk'hambi dikwitangwa Azazeli. 9 Haluni naamletele vulata diya disagulwe ni kula kwajili ya Zumbe, na kudilava kwa malavo yo wavu. 10 Mna vulata disagulwe kunda dya Azazeli nedigalwe kwa Zumbe Mnungu vileke udamanywe mwiivano, mlavant'hambiko nadilekele diite kwe dijangwa kwa Azazeli vileke wavu wa want'hu uuswe.

11 Haluni neegale dijeku kwaajili ya malavo kuusa wavu wakwe mwenye vileke kudamanya mwivano kwaajili yakwe na nyumba yakwe, yehe naye naaichinje injeku kwaajili ya malavo ya wavu wakwe mwenye. 12 Naaguhe kazae kamemile nk'hala zikukweela kulawa he kilingo cha kutambikila ha Zumbe no ubani una mhemp'he mafumba maidi usigint'we vedi na kuvigala Hant'hu Hakukise. 13 Naagele ubani mnanga mwo moto ha Zumbe na mosi wa ubani nougubike Hant'hu he Zimbazi, vileke kugamba asekubanika.

14 Naaiguhe sakame ye njeku kwa kadole kakwe na kunyunyizila nt'hendelo za ulailo wa zuwa kulongole mwe Hant'hu Hezimbazi nk'hanana mfungate.

15 Niho naachinje vulata dya malavo ya kuusila wavu kwaajili ya want'hu na kuiguha sakame yakwe hant'hu hakukise adamanye enga ivo adamanye mwa idya injeku, naanyunyizile nk'hanana mfungate aho he disanduku dye ndagano. 16 Kwa sila ino naahakukize Hant'hu Hakukise, kwajili yo usavu na masa na wavu wose wa Waizilaeli. Naadamanye iivo kwaajili ye Dihema Dikukile idyo dili mwa want'hu awo wasavu. 17 Aho Haluni akengila Hant'hu Hakukise akadamanya mwivano mpaka aho akeza kulawa kuse, hahakaungwa kunda na mnt'hu yeyose he Dihema Dikukile, aho akadamanya mwivano kwajili yakwe mwenye ne mp'huga yakwe na want'hu wose. 18 Niho naafose kwiza he kilingo cha kutambikila ha Zumbe na kuhakukiza. Naaguhe hant'hu ha sakame ye njeku ne sakame ya vulata niyo aihaka mwe zimp'hembe he kilingo cha kutambikila nt'hendelo zose. 19 Naanyunyizile iyo sakame mnanga he kilingo cha kutambikila kwa kadole kakwe nk'hanana mfungate vileke kuhakukiza kulawa mwo wavu wa Waizilaeli.

20 Haluni akeza kubinda kuhakukiza hant'hu aho hakukise mwe Dihema Dikukise na he kilingo cha kutambikila, naadigale divulata idyo kuse ye nk'hambi dikanda dinula wavu wa want'hu. 21 Naageleke mikono yakwe miidi mwo mtwi we divulata na kuzumila wiihi wose na wavu wose na wavu wa want'hu wa Izilaeli, naivo kuwiika mnanga mwo mtwi we divulata. Idyo divulata nedisakigwe diite kwe dijangwa ni mnt'hu asagulwe adisake. 22 Divulata idyo nediguhe wavu wose mpaka hadya heheina want'hu, mnt'hu yudya naye naadilekele diite mwe dijangwa.

23 Niho Haluni naaite mndani mwe Dihema Dikukile na kuhambula niyo azasa uuko ziya zisuke availe umwo andile akei kwingila Hant'hu Hakukise. 24 Naahake kwa mazi hant'hu hakukile na kuvala zisuke zakwe. Naho naafose na kulava malavo ya kokwa kwaajili yakwe na malavo ya kokwa kwaajili ya want'hu wa Izilaeli vileke udamanywe mwivano kwaajili yakwe na kwaajili ya want'hu wose. 25 Naho nooke mavuta ye divulata diya mnanga ya he kilingo cha kutambikila kwaajili malavo yo kuusila wavu. 26 Yudya mnt'hu adisakile divulata diite kwe dijangwa diguhile wavu wa want'hu aungwa afigise suke zakwe na kuhaka mazi, niho naadahe kwingila kwe nk'hambi. 27 Idya injeku ya malavo yo wavu ne divulata kwaajili ya malavo yo kuusila wavu, sakame zawe nezigalwe Hant'hu Hakukise kwaajili ya kuusila wavu. K'hingo zawe na nyama na utumbo hamwenga ne kitole chakwe neilavigwe kuse ye nk'hambi na kokwa. 28 Mnt'hu uyo ana binda kuvoka aungwa afigise zisuke zakwe naho ahake mazi niho neengile mwe nk'hambi.

29 Ino neinde sigilizi ya mazuwa yose kwaajili yenyu, mwe dizuwa dya mlongo wo mwezi wa mfungate mwaungwa mfunge naho msekudamanya ndima yeyose akanda mtakwiza hegu mkaya hegu akwikala na nyuwe, 30 kwaviya mwe dizuwa idyo, mwivano noudamanywe kwaajili yenyu vileke mkukizwe kulawa mwo wavu wenyu wose ha Zumbe Mnungu. 31 Ni zuwa dya kuhumula, mwaunga mfunge, ino ni sigilizi ya mazuwa yose. 32 Mlava nt'hambiko Mkulu uyo aikigwe mwo undima aguhe hant'hu ha ise niye naadamanye mwivano akanda kavala suke zakwe zo ulavant'hambiko zidamanywe kwa suke zedi zing'aile. 33 Naahakukize Hant'hu Hakukile naho naadikukize Dihema Dikukile naahakukize he kilingo cha kutambikila, naadamanye mwiivano kwaajili ya walava nt'hambiko na kwajili ya want'hu wose wa Izilaeli. 34 Idi nedinde lagizo dya mazuwa yose kwajili yenyu. Nomdamanye mwivano kwa mwaka nk'hanana imwenga du kwaajili yo wavu wose wa Waizilaeli. Musa nakadamanya enga ivo Zumbe Mnungu amsigiilaga.