1 Zumbe mgambaga Musa, 2 "Mgambile Haluni na wanawe wasekutenda lubezo kwe dizina dyangu dikukile vikulavigwa ni Waizilaeli wasekudigela zina dyangu dikukile usavu. Ni miye Zumbe Mnungu. 3 Wagambile mwe vyeleko vikwiza, inanda yeyose mwa welekwa wako ni msavu asekuvisogeela vint'hu vikukile viya Waizilaeli wamkuvlavila Zumbe Mnungu, hakudaha kudamanya undima he kilingo chokutambikila. Ni miye Zumbe Mnungu husigiila aya.

4 "Uneva mnt'hu yeyose mwa welekwa wa Haluni ana unyonge wa kuhakizana hegu alawa ufila mwo mwili, haadye nk'hande zikukile mpaka ande kakuka. Mlavant'habiko yeyose hegu mnt'hu yeyose anakwafa kint'hu chochose kisavu kikwafane na kimba hegu inanda kalava mbeyu zakwe ze cheleko, naande msavu, 5 hegu ikanda mnt'hu yeyose katoza kint'hu chochose kikutambaala icho kikumtenda usavu, hegu mnt'hu yeyose akudaha kumgela usavu, hegu usavu wowose ananawo. 6 Mlava nt'hambiko uyo naasigale kunda msavu mpaka kisingi. Ivo haadye malavo ya kukile mpaka yehe mwenye ahake mazi. 7 Mwo lupisi zuwa dikengila naande kakuka, adaha kudya nk'hande ikukile, kwaviya ni nk'hande yakwe. 8 Naho asekudya nyama ifile yenye ikomigwe na makala mbago, neimtende ande msavu. Ni miye Zumbe.

9 "Walava nt'hambiko waungwa kutoza sigilizi yangu vileke wasekunda na masa wakabanika kwaviya hawazumile sigilizi zangu zikukile. Ni miye Zumbe huwatenda wakuke.

10 "Mnt'hu yeyose hi nywe mp'huga ya walava nt'hambikot'hambiko akwikala kwakwe hegu mtakwiza mwe nyumba ya mlavant'hambiko hegu mndima ywakwe asekuvidya. 11 Mna mlava nt'hambiko anamgula mnt'hu yeyose kwa matundu, naadye nk'hande iyo na awo welekwe mwe nyumba yakwe nawadye nk'hande iyo. 12 Uneva mwanakike ywo mlava nt'hambiko kalombigwa ni mnt'hu hi mlava nt'hambiko, mwanakike uyo haadye chochose mwe nk'hande iyo. 13 Mna inanda mndele ywa mlava nt'hambiko kafiilwa ni mgosi, hegu kasigwa anauya mwe nyumba ya ise naadye nk'hande akudya ise. Mna mta kwiza hakuungwa kudya nk'hande iyo.

14 "Uneva mnt'hu yeyose kadya kint'hu kikukile haheena kukimanya, aungwa alihe maliho ya malavo ayo kwa mlava nt'hambiko na kongezela hant'hu ha shano ya kint'hu icho na kumvuzila mlava nt'hambiko. 15 Mlava nt'hambiko asekuvigela usavu vint'hu vikukile va wana wa Izilaeli wakumlavila Zumbe Mnungu, 16 kwa kuwalekela walava nt'hambiko kudya malavo ayo nawande na masa woho nawo nawaungwe kuliha. Ni miye Zumbe Mnungu huvitenda vint'hu vikuke."

17 Zumbe Mnungu niyo amgamba Musa, 18 Longa na Haluni na wanawe hamwenga na Waizilaeli wose uwagambile. Uneva yumwenga ywenyu, Waizilaeli hegu mta kwiza akwikala mwe isi ya Izilaeli, naalave malavo ya kokwa kwa kumlavila Zumbe, inde kukint'hiza kilapi hegu kwa kuunga mwenye, 19 naaungwe alave vulata hegu njeku hegu ndolomeheiina lema vileke izumilwe. 20 Naho usekulava kint'hu chochose kina lema kwaviya hekizumilwe kwaajili yenyu. 21 Mnt'hu yeyose akuleta malavo ya utondowazi kwa Zumbe kulawa mwe difyo dye zing'ombe hegu mbuzi vileke kukint'hiza kilapi hegu malavo ya kuunga mwenye, vaungwa malavo ayo yasekunda na mawala vileke izumilwe. 22 Ivo usekumlavila Zumbe mfugwa hokuona, hegu utoigwe hegu kina lema hegu chochose kina uvimbe, na kina uhele hegu kina nk'hwenge ikulawa ufila. Ivo chochose kihengi enga iki msekukilava kwa Zumbe Mnungu enga malavo ya nk'hande. 23 Ng'ombe hegu ngoto ina lema hegu heikukula, mna ino heizumilwe vileke kunda malavo ya kuunga mwenye. 24 Ivo usekumlavila Zumbe mfugwa ufunt'higwe na kukant'hwa. Ino ni mwiko mwe isi yako.

25 Msekuhokela kulawa kwa mta kwiza mfugwa enga uwo na kunilavila miye Mnungu ywako enga nk'hande. Mifugwa iyo ina lema kwaviya isengigwa naho heizumilwe kwaajili yenyu.

26 Zumbe Mnungu niyo amgamba Musa, 27 Uneva ndama hegu kabehela ka mbuzi hegu ka ngoto kanelekwa nakekale na nine kwa mazuwa mfungate. Kukongela zuwa dyo mnane na kugendeela, kokwa akulavilwa Zumbe. 28 Usekuchinja ng'ombe na ndama yakwe hegu ngoto na kabehela kakwe na mbuzi na kabehela kakwe kwa zuwa dimwenga. 29 Ukamlavila Zumbe malavo ya nt'hogola, ulave kwa kuunga kwako. Iyo neikutende uzumilwe. 30 Vaungwa idigwe zuwa iidyo haheina kusigaza chochose mpaka mtondo. Ni miye Zumbe Mnungu.

31 "Tozeni na kuzitimila sigilizi zangu. Ni miye Zumbe Mnungu. 32 Msekudigela usavu dizina dyangu dikukile. Want'hu wose wa Izilaeli waungwa kudikukiza dizina dyangu. Ni miye Zumbe huwatendani mkuke. 33 Ni miye niwalavileni mwe isi ya Misili vileke ninde Mnungu ywenyu. Ni miye Zumbe Mnungu."