1 Zumbe Mnungu amgambaga Musa, 2 "Ulonge ne difyo dyose dya Waizilaeli uwagambe, wande wakukile, kwaviya miye Zumbe Mnungu ywenyu hikuka.

3 "Kila yumwenga ywenyu aungwa amwive ise na nine, naho aungwa kutoza Dizuwa dyo Kuhumula. Ni miye Zumbe Mnungu ywenyu.

4 "Msekuvika mahili, naho msekukedamanyila milungu ya vilama. Ni miye Zumbe Mnungu ywenyu.

5 "Umwo mkalava malavo ya nt'hambiko ya utondowazi kwa Zumbe Mnungu, laveni ivo mkuungwa vileke niizumile int'hambiko iyo kwajili yenyu. 6 Nyama ya malavo ayo nayadigwe zuwa iidyo ne dizuwa dya kaidi mkuyalavila, chochose nekisigale mpaka mwe dizuwa dya katatu icho chokigwe moto. 7 Uneva nyama yoyose neidigwe mwe dizuwa dya katatu, icho kisavu, hekizumilwe. 8 Mna yeyose naadye nyama ino naauguhe masa yakwe mwenye kwaviya kakigela usavu kint'hu kikukile cha Zumbe, mnt'hu uyo naalemelwe ni want'hu wakwe.

9 "Mwo lupisi lwa kuvuna mgunda wako, usekuvuna pele mwe mihaka yako, naho usekusokoza. 10 Naho usekuvuna kaidi mwo mgunda wako we mizabibu naho usekulogoteza zabibu zitomoke hasi. Zileke kwaajili ya wakiwa na wata kwiza. Ni miye Zumbe Mnungu ywako.

11 "Usekubawa, Usekulonga lulimi, Msekudant'hilizana. 12 Usekuika kilapi kwa lulimi kwa zina dyangu na use kudihomola zina dyangu. Ni miye Zumbe Mungu.

13 "Usekumhujila hegu kumbaila miyawo. Usekwikala na maliho ya mndima ywako mpaka mtondo. 14 Usekumbela mnt'hu heekwiva naho usekumwiikila nk'hindilo kulongole ya nt'hunt'hu, mna unde na wogofi kwa Mnungu ywako. Ni miye Zumbe.

15 "Usekwazaganya ikindedi, usekulagisa kumwelela mnt'hu mkiwa hegu kilongozi, ivo mlamule miyawo kwa kindedi. 16 Usekuita uko na uko kwa kubwelekeza lulimi mwa want'hu wako. Usekumhosa miyao akomwe kwa lulimi lwako. Ni miye Zumbe."

17 "Usekumwiihia nduguyo mwo moyo wako. Mkanye miyawo kwa kindedi vileke usekunda naye mwa masa yakwe. 18 Usekulihiza hegu kugendeela kumwihiya yumwenga mwa want'hu wako, mna muunge miyawo enga ivo weye ukukeunga weye mwenye. Ni miye Zumbe.

19 "Nomzitoze zisigilizi zangu. Usekuleka madimo yako yakeleka madimo matuhu yehengi. Usekuhanda mbeyu zi hengi mwo mgunda umwenga. Usekuvala suke zifumigwe kwa vitambala hevikuligana.

20 "Uneva mgosi anagenda na mvele mtumwa atumizwe na mgosi mtuhu, mna hanati kukombolwa hegu kwink'higwa ulekelwa, nawasengelwe. Mna kwaviya akei mtumwa yehe na mnt'hu agonile naye hawakomwe. 21 Mnt'hu uyo aungwa egale ndolome hagihi ye nk'hili ye Dihema Dikukile kwaajili ya malavo yo kuusila masa no kunilavila miye Zumbe Mnungu. 22 Kwe ndolome iyo ya malavo yo kusila masa, mlava nt'hambiko naadamanye mwivano kwaajili yakwe ha Zumbe kwaajili ya wavu uwo adamanye, naho yehe naausilwe wavu wakwe.

23 "Umwo mkeingila mwe isi ya Kanaani na kuhanda miti ihengi ya matunda, msekudya matunda yakwe kwa miyaka mitatu. 24 Mwo mwaka wa kane matunda yose nayande yakukile nayalavigwe kwa malavo ya kumtogola Mnungu. 25 Mna mwo mwaka wa shano mwadaha kudya matunda ayo, uneva mnadamanya aya yose maziti yenyu nayelekese matunda mengi. Ni miye Zumbe Mnungu ywenyu.

26 "Msekudya nyama yeyose ina sakame mndani mwakwe. Msekulagula naho msekukaula mnamulo. 27 Mse kupucha fili zenyu mnk'handa mwo mtwi hegu kumoga zindevu zenyu. 28 Msekugela sale mwe miili yenyu kwaajili ya wakuhongeza hegu msekudolonya viwalo mwe miili yenyu. Ni miye Zumbe Mnungu.

29 "Msekuwagela soni wana wenyu we kike kunda mapamp'he, chaivo isi yeso neinde ya upamp'he na kumema uwihi. 30 Toza mazuwa yangu yo kuhumula na mdyogohe Dihema Dikukile. Ni miye Zumbe Mnungu.

31 "Msekuwaitila walaguzi, hegu msekuzungula wakuhunga mp'hepo, kwaviya neviwagele usavu kwa sila ya kumvika Mnungu. Ni miye Zumbe Mnungu ywako.

32 "Ukanda ha wadala ukimale, ulagise kweseleza naho mnogohe. Ni miye Zumbe Mnungu.

33 "Usekumtendela viihile mtakwiza akwikala mwe isi yako. 34 Mta kwiza ekekala hamwenga na weye waungwa umtendele enga welekwa we isi yako. Muunge enga ivo ukukeunga mwenye, kwaviya nokunda mtakwiza mwe isi ya Misili. Ni miye Zumbe Mnungu ywako.

35 "Usekumhujila mnt'hu kwa vihimo va udant'hi ukahima utali hegu vizamile hegu wingi. 36 Mwaungigwa mnde na vihimo hevikuhujila mwo kuhima vint'hu. Ni miye Zumbe Mnungu ywako akulavile mwe isi ya Misili. 37 Toza sigilizi zangu zose, naho uzitimile. Ni miye Zumbe."