1 Mwe dizuwa dyo mnane, Musa amwitangaga Haluni na wanawe hamwenga wadala wa Izilaeli. 2 Musa niyo amgamba Haluni, "Guha injeku kwajili ya malavo ya kuusa wavu ne ndolome heziina lema kwajili ya malavo ya kokwa, ukailavile ha Zumbe Mnungu. 3 Naho wagambe Waizilaeli waguhe vulata dimwenga kwajili ya malavo ya kuusa wavu, ne njeku imwena na mwanangoto zose zikanda za mwaka umwenga heziina lema kwajili ya malavo yo kokwa pele, 4 njeku imwenga na ndolome imwenga kwajili ya malavo yo utondowazi ha Zumbe Mnungu na malavo ya nk'hande ihanganywe na mavuta kwa viya dielo Zumbe Mnungu nawalaileni."

5 Waizilaeli niyo wegala vose ivo hameso he Dihema Dikukile enga viya Musa awasigiile naho want'hu wose wagendaga kukimala ha Zumbe Mnungu. 6 Musa agambaga, "Ivi nivo Zumbe Mnungu asigiile mdamanye niho muuwone ung'azi wa Zumbe Mnungu." 7 Musa niyo amgamba Haluni, "Ita hant'hu ho kulavila nt'hambiko ulave malavo yako yo kuusila wavu na malavo yako yo kokwa vileke uuse wavu wako na wavu wa want'hu wako wa Izilaeli, ulave malavo aya vileke kuusa wavu wa want'hu enga viya Zumbe asigiile."

8 Ivo, Haluni niyo asogeela he kilingo cha kutambikila, nakuichinja idya ndama kwajili ya malavo ya kuusa wavu wakwe mwenye. 9 Niyo wana Haluni wamwigaila Haluni idya sakame, yehe nae agelaga kadole kakwe mwe sakame, na kuhaka mwe zimp'hembe zose za he kilingo cha kutambikila niyo int'huhu aitila mwe visimiko va he kilingo cha kutambikila. 10 Niyo oka mavuta na figo na mavuta yose yakugubika diini ya malavo ya wavu, avokelaga he kilingo cha kutambikila enga ivo Zumbe Mnungu amsigiile Musa. 11 Mna nyama ne nk'hingo avokaga moto kuse ye nk'hambi.

12 Niyo Haluni aichinja indolome ya malavo ya kokwa. Wanawe niyo wamletela sakame, yehe naye niyo ainyunyizila mwe he kilingo cha kutambikila nt'hendelo zose. 13 Naho wamwigailaga malavo ya kokwa, kihendo kimwe kimwe no mtwi, nae niyo avoka mwe he kilingo cha kutambikila. 14 Umwo andaga akei kuyoka asunt'haga vint'hu va kundani ne viga niyo avoka mnanga mwa malavo ya kokwa mwe he kilingo cha kutambikila.

15 Haluni egalaga vulata dya malavo ya kuusila wavu wa want'hu. Nakadilava kunda malavo yo wavu enga viya adamanye mwa idya ya nk'hongo. 16 Nakalava malavo ayo yo kokwa niyo ailava enga ivo Zumbe Mnungu alongile. 17 Naho kegala malavo ya nk'hande, nakuguha fumba dimwenga na kudyoka mnanga mwe he kilingo cha kulavila nt'hambiko ya nk'hande ya malavo yo kokwa kila mtondo. 18 Niyo Haluni achinja injeku ne ndolome enga malavo ya utondowazi kwajili ya want'hu. Wanawe niyo wamwink'ha sakame, yehe naye niyo aimyagila mwe he kilingo cha kutambikila mwe nt'hendelo zose. 19 Haluni aikaga mavuta ye njeku ne ndolome na mavuta yo mkila ye ndolome na yadya mavuta yagubike figo ne diini, 20 niyo waika mavuta mnanga mwe vifua no kuvigala he kilingo cha kutambikila no kuyoka pele mavuta mnanga mwe he kilingo cha kutambikila. 21 Mna viya vifua na kiya ikiga cha kunyuma cha kulume, Haluni kavinula ha Zumbe Mnungu kunda malavo ya kwelela, enga ivo Musa asigiile.

22 Haluni niyo enula mikono yakwe nakuwavikila want'hu. Eze ibinde kulava malavo ya wavu na malavo ya kokwa na malavo ya utondowazi, ahalawaga aho hant'hu ho kulavila nt'hambiko. 23 Ivo Musa na Haluni wengilaga mwe Dihema Dikukile. Weze wafose kuse niyo wawavikila want'hu ung'azi wa Zumbe niyo wawang'aza want'hu wose. 24 Moto niyo weza kulawa ha Zumbe na koka pele malavo na mavuta mnanga mwe kilingo cho kutambikila. Want'hu wose weze waone mbuli izo wangaga na kufumaniza mitwi yawe hasi.