1 Malavo ya kuusila wavu yaungwa kulavigwa kwa wavu wi hengi enga uno.

Uneva mnt'hu yeyose anetangwa alave uwona mwe kitala mwa yadya ayaone hegu kwiva, yehe niyo alemela kulonga, uyo naaguhe masa ayo.

2 Uneva mnt'hu yeyose mwa nyuwe kanda msavu haheina kukemanya kwa kukwafa kint'hu chochose kisavu mwe zisila za kumvika Mnungu, ikanda ni kimba cha kala mbago hegu kimba cha mfugwa, hegu kimba cha viumbwa vikutambaala visavu haheina kumanya, naande msavu na kuguha uwavu wakwe.

3 Uneva mnt'hu yeyose anakwafa kint'hu chochose kisavu kikulawa kwa mnt'hu haheina kumanya, akeza kumanya naande msavu, ivo anamanya ayo naande na masa.

4 Uneva mnt'hu anaika kilapi kudamanya chochose chedi hegu kiihile enga ivo wakutenda want'hu heina kufanyanya, ekeza kumanya naande na masa.

5 Ivo uneva mnt'hu ananda na masa mwa ayo, aungwa akeiile mwe mbuli iyo adamanye, 6 naho naamwigaile Mnungu malavo yakwe ya kuusa masa. Kwo wavu uwo atendile neegale mwate hegu nt'hogota kulawa mwe difyo dyakwe ailave malavo kwa kuusila wavu. Mlava nt'hambiko naye na mdamanyile mviko wo mwivano kwajili ya kuusa wavu wakwe.

7 Mna uneva hana mwana ngoto ywa malavo ya kuusa masa kwajili ya wavu uwo adamanye, ivo na mletele Zumbe Mnungu suwa mbili hegu makinda maidi ya suwa manga, yumwenga kwajili ya malavo ya kuusa wavu na nt'huhu kwajili ya malavo ya kokwa. 8 Nawegale kwa mlava nt'hambiko, mlava nt'hambiko yehe namlave yumwenga kunda malavo ya kuusa wavu kwa kuinyongolota isingo yakwe haheina kuhausa mtwi wakwe. 9 Sakame yakwe naaimyage mwe mp'hembe mwa he kilingo cha kutambikila na idya int'huhu isigale naitile mwe kisimiko mwa he kilingo cha kutambikila. Iyo ni nt'hambiko ya kuusa wavu. 10 Nao naailave idya ya kaidi kunda malavo ya kokwa viligane na malagizo. Mlava nt'hambiko naamdamanyile uyo mt'hu mviko mwivano kwajili ya wavu wakwe adamanye, naho yehe naausilwe.

11 Uneva hukudaha kulava swa waidi hegu makinda maidi ya swa enga malavo yakwe ya kuusa wavu uwo audamanye, ivo naalete unga kopo dimwenga kunda malavo ya wavu. Mna asekuugela mavuta ya mizeituni hegu ubani kwaviya ni malavo ya kuusa wavu. 12 Naamwigaile mlava nt'hambiko, yehe naaguhe unga uwo fumba dimwenga na kuwoka mnanga he kilingo cha kutambikila enga malavo ya k'humbukila kugamba ikindedi malavo yose ni ya Zumbe Mnungu. Ivo naayoke mnanga mwa he kilingo cha kutambikila kwa kumlavila Zumbe Mnungu, naye naayoke mnanga enga malavo ya nk'hande. Ni malavo ya kuusila wavu. 13 Ivo mlavant'hambiko naamdamanyile uyo mnt'hu mviko wo mwivano kwajili ya wavu yehe naye naausilwe. Unga ukusigala nounde wakwe mlava nt'hambiko enga ivo ikunda mwe malavo ye nk'hande.

14 Zumbe Mnungu amgambaga Musa, 15 Uneva mnt'hu yeyose ananda na masa kwa kudamanya wavu haheina kumanya kwa kuto kulava vint'hu vikukile kwa Zumbe Mnungu, neegale ndolome heiina lema kulawa mwe difyo dyakwe. Nomhime yombe dyakwe kwa viligane na matundu yana yombe kulu mwe Nyumba ank'hulu ya Mnungu. Ivo ni malavo ya kuusa masa. 16 Hamwenga na ayo, aungwa alihe yadya helihile kwa kuwongezela hant'hu ha imwenga ha shano na kumwink'ha mlava nt'hambiko vose. Ivo mlava nt'hambiko naadamanyile mwivano kwa kulava ndolome kunda malavo ya masa, na yehe naalekelwe.

17 Mnt'hu yeyose anadamanya wavu haheina kumanya, kwa kuleka imiko ya Zumbe Mnungu, uyo naande na masa, naho nalihize masa yakwe. 18 Naamletele mlava nt'hambiko ndolome heina lema kulawa mwe difyo dyakwe, ikanda na yombe idiya enga ya malavo ya masa. Na mlava nt'hambiko naamdamanyile mwivano kwa masa adamanye haheina kumanya na yehe naalekelwe. 19 Ayo ni malavo ya masa ananayo ha Zumbe Mnungu.