1 Zumbe Mnungu niyo amgamba Musa, 2 Wagambile want'hu wa Izilaeli kugamba, mvele anapata ubovu niyo engila nyumba mwana kilume naade msavu kwa mazuwa mfungate enga ivo akundagaga mwa mazuwa yakwe yo mwezi. 3 Mwana naavinilwe mwe dizuwa dyo mnane. 4 Mna mvele uyo nagendeele kugoja kwa mazuwa milongo mitatu niho naakukizwe kulawa mwo kulawigwa kwakwe ne sakame. Asekukwafa chochose kikukile hegu kwingila hant'hu ha kuvikila mpaka mazuwa ya kukukizwa kwakwe yande yakint'ha.

5 Mna uneva neengile nyumba mwana kike, naande msavu kwa majuma maidi enga ivo ikundagaga mwa mazuwa yakwe yo mwezi. Naagendeele kugoja kwa mazuwa milongo mtandatu na mtandatu mpaka aho akeza kunda kakuka kulawa mwa mazuwa yakwe yo mwezi niho naande kakukizwa.

6 Mazuwa yo kukukizwa kwakwe kwaajili ya mwana kilume hegu ywa kike yakeza kukint'ha, naamwigaile mlava nt'hambiko hagihi ne nk'hili ye Dihema dikukile ndolome ya mwaka na kinda dimwenga dya suwa kunda malavo ya kokwa yo kukukizwa. 7 Mlava nt'hambiko naamlave ha meso ha Zumbe Mnungu na kumdamanyila uyo mvele mviko wo mwivano. Ivo uyo mvele naande kakuka kulawa mwa mazuwa yakwe yo mwezi. Ivi nivo vikuungwa vinde kwa mvele engile nyumba mwana kilume hegu ywa kike.

8 Uneva hukudaha kulava mwana ngoto, naalave makinda maidi ya suwa hegu suwa manga, imwenga ya malavo ya kokwa, int'huhu nayo kwa malavo yo kumkukiza kulawa mwa mazuwa yakwe yo mwezi. Mlava nt'hambiko naamdamanyile mvele uyo mviko wo mwivano naho naakuke.