1 Zumbe niyo alonga na Musa na Haluni no kuwagamba, 2 Wagambileni Waizilaeli kugamba, makala ayo nayo nomdye mwa makala yose ye mwe isi. 3 Mwa makala yose mwe isi mwaungwa kudya nyama yeyose ina ngaga ikepangile kunda mbili naho ikuseula. 4 Hamwenga na ayo kuna makala yakuseula na ngaga hazipangane, ayo msekuyadya. Ngamia yaseula mna haina ngaga zipangane, ni visavu kwenyu haikuzumilwa kwa Mnungu. 5 Msekudya mp'helele, yaseula mna ngaga zakwe hazipangane na kunda mbili, ni visavu kwenyu haikuzumilwa kwa Mnungu. 6 Msekudya kabuga, koho kaseula mna ngaga zakwe hazipangane na kunda mbili, ni visavu kwenyu haikuzumilwa kwa Mnungu. 7 Nguluwe msekudya, ina ngaga mna haikuseula, ni visavu kwenyu haikuzumkilwa kwa Mnungu. 8 Kwaviya makala ayo ni masavu msekudya nyama zawe hegu kuvikwafa vimba vawe.

9 Mwe viumbwa vose vikwikala mwa mazi, nomdye vose vina mahuhu na magwalatu hegu samaki zose. 10 Mna viumbwa vose mwe bahali hegu mwe mito heviina vilamba na magwalatu, vikanda mwe mafyo hegu viumbwa mndani mwa mazi, ivo ni ihizo kwenyu havikuzumilwa kwa Mnungu. 11 Navo nevinde ni ihizo kwenyu. Msekudya nyama zawe, ne vimba vawe nevinde ihizo kwenyu. 12 Chochose kikwikala mwa mazi hekiina mahuhu na magwalatu ni ihizo kwenyu.

13 Aya nayo madege yakuihiza kwenyu, ivo msekuyadya kwa viya yaihiza kwenyu. Ndegenyika na visoka na mzinge, 14 mwewe dink'hundu na mamwewe yose ye hengi amatitu, 15 na makungulu yose yehengi. 16 Mbuguni na lugawa na dudumizi na visoka vihengi vose, 17 makungwi ye hengi yose, 18 na fulindi na mzinge na yangeyange, 19 nk'holongo na koikoi zihengi na hudihudi na kanundu.

20 Vidudu vose vina mawawa vikugenda kwa viga vine nevinde ihizo kwenyu havikuzumilwa kwa Mnungu, 21 mna viyaho viumbwa vina mawawa ivo vikugenda kwa viga vine mkuunga mdye, viya vine vifundo mwe viga vawe va kupilikila. 22 Mwadaha kudya sige senene na mp'hasi. 23 Mna viumbwa watuhu wa mawawa na wata viga vine ni ihizo kwenyu.

24 Wanyama awo na wawageleni usavu nyuwe. Yeyeso na kwafe kimba icho na ande msavu mpaka kisingi. 25 Yeyeso neenule vimba va viumbwa ivo vaungwa afigise suke zakwe na yehe asekuwakwafa want'hu watuhu mpaka kisingi. 26 Kala dyodyose dina ngaga mna hazipangane hegu hedikuseula ni ihizo kwenyu, yeyose na kwafe vimba va makala ayo naande msavu. 27 Mwa makala ayo yose yakugenda ne vifumba na yadya wakugenda ne viga vine ni ihizo kwenyu, yeyose na kwafe vimba vawe naande msavu mpaka kisingi. 28 Yeyose neenule vimba ivo vaungwa afigise suke zakwe naho ase kuwakwafa want'hu watuhu mpaka kisingi. Makala aya ni masavu kwenyu.

29 Mwe viumbwa vikubulumuka, ivi ni visavu kwenyu kewe na ngoso na magondo ye hengi, 30 gulugulu na mbulu na magondo na nyongolo na lwivi. 31 Awa wose wakubulumka ni wasavu kwenyu. Yeyose na kwafe vimba vawe naande msavu mpaka kisingi. 32 Uneva kimba che viumbwa awo kinagweela mnanga mwe kint'hu, kint'hu icho hata kikanda kidamanywa kwa mti hegu suke hegu nk'hingo hegu gunia, naho hata kinanda ni kwa ndima yani, nekinde kisavu. Ukigele mwa mazi, naho nekinde kisavu mpaka kisingi akajika nekinde hicho savu. 33 Uneva kimba chakwe nekigweele mndani mwe nyungu, kila kimndani mwe nyungu iyo nikinde kisavu, nanywe mwaungwa mtule inyungu iyo. 34 Nk'hande yeyose ikudigwa inengila mazi kulawa mwe nyungu iyo neinde savu na kint'hu chochose cha mazi kikunywegwa kulawa mwe nyungu iyo nekinde kisavu. 35 Chochose nekigweelwe ni vimba nekinde kisavu, ziko hegu nyungu ya kwambikila vaungwa vitulwe. Ni visavu naho weye waungwa kuvifanyanya kunda visavu, 36 mna nch'hoko hegu sima hant'hu ha kutekela mazi nahande hasavu, mna yeyose na kwafe vimba ivo naande msavu. 37 Uneva kimba kinagwa mnanga mwe zimbeyu zo kuhanda, mbeyu izo hezinde savu. 38 Mna uneva mbeyu zilowekwa mwa mazi vileke zihote niyo zagweelwa ni kimba mnanga mwakwe izo zimbeyu nezinde savu kwenyu ziduulwe.

39 Uneva kala dyodyose dikudigwa dinafa ujusi, yeyose na kwafe kimba chakwe naande msavu mpaka kisingi. 40 Yeyose naadye kimba icho aungwa afigise suke zakwe, yehe naye naande msavu mpaka kisingi. Yeyose neenule kimba icho hegu naadye aungwa afigise suke zakwe, yehe naye naande msavu mpaka kisingi.

41 Kila kiumbwa kikubulumka ni ihizo kwenyu, msekudya. 42 Msekudya kiumbwa chochose kikubulumka, kinde kikubulumka ne zinda hegu kikugenda neviga vine hegu ne viga vingi, ivo vose ni ihizo kwenyu. 43 Msekukegela usavu nyuwe wenye kwa kudya kimwenga mwe viumbwa ivi. 44 Ni miye Zumbe Mnungu ywenyu, kekukizeni mnde wakukile kwa viya miye Hikuka. Naho msekukegela usavu nyuwe wenye kwa kudya viumbwa vovose vikubulumka. 45 Ni miye Zumbe Mnungu ywenyu niwalavileni Misili, vileke ninde Mnungu ywenyu, kwa ivo indeni wakukile kwaviya miye hikuka.

46 Aya nayo malagizo yangu mwa makala na madege na kila kiumbwa kino ugima mwa mazi na kila kiumbwa kikubulumka. 47 Mwaungwa mtalaule vint'hu visavu na vint'hu hi visavu mwe viumbwa vino ugima vikudigwa na viya hevikudigwa.