1 Nadabu na Abihu wana wa Haluni waguhaga vizaye vawe kila yumwenga. Wavigelaga moto na kwongezela ubani, nakumlavila Zumbe Mnungu moto homwelele. 2 Aaho moto niyo walaila ha Zumbe Mnungu, moto uwo wawokaga niyo wabanika hakwe. 3 Musa niyo amgamba Haluni, "Mbuli ino niyo Zumbe Mnungu alongile akagamba. ‘Nenikelagise mwa want'hu wakunitimila kugamba miye hikuka naho nenitogolwe ha want'hu wose.’" Haluni niyo anyamala.

4 Ivo Musa awetanga Mishaeli na Elisafani, wanawe Uzieli, ise mdodo wa Haluni, akawagamba "Soni aha mguhe vimba va sovi zenyu kulawa he Dihema Dikukile mvigale kuse ye nk'hambi." 5 Wezaga no kuwaguha wandugu zawe wabanike wandaga wakei ne zisuke zawe niyo wawegala kuse ye nk'hambi enga ivo Musa asigiilaga.

6 Mussa niyo awagamba, Haluni hamwenga na wanawe Eliyazali na Itamali, "Msekugubula mitwi yenyu naho msekutatula suke zenyu kwajili yo kuhongeza, mnatenda ivo nombanike ho undiilo wa want'hu awa wose, naho Zumbe naawaihiye want'hu awa wose. Mna wandugu zenyu ne nyumba yose ya Izilaeli wadaha kuwahongezela kwajili ya awo wakomigwe nu moto ulaile kwa Zumbe Mnungu. 7 Msekuhalawa aha ho lwazo lwe Dihema Dikukile, cheivo nombanike kwaviya mavuta mhakigwe mnde wandima wa Zumbe Mnungu yakei mwenyu." Ivo Haluni na wanawe wadamanya enga ivo Musa alongile.

8 Niyo Zumbe Mnungu alonga na Haluni akagamba, 9 "Mkengila mwe Dihema Dikukile msekunywa chochose kikugela kukolwa, cheivo nombanike. Ino neinde sigilizi yenyu kwe vyeleko venyu vose. 10 Mwaungwa mtalaule mwe vint'hu va Mnungu na vint'hu va mazuwa yose, naho mwaungwa kutalaula vint'hu vikukile na vint'hu hevikukile. 11 Nomuwahinize Waizilaeli miko ino yose mgambilwe ni Zumbe Mnungu kwa sila ya Musa."

12 Musa niyo amgamba Haluni na wanawe wasigale. Eliyazeli na Atamali, Guheni yadya malavo yo mkate yasigale mwa malavo ayo akulavilwa Mnungu kwa kokwa, mwiidiile hagihi ne kingi cho kutambikila haheina kugeligwa ugwadu kwaviya ikukisa. 13 Nomwiidiile Hant'hu Hakukile kwaviya iyo ni uwagilwa wako na wanawo vikulawa mwa malavo akulavilwa Zumbe Mnungu kwa moto. Ivo nivo Zumbe Mnungu anisigiile. 14 Mna weye na wanao na wanawo we kike mwadaha kudya kifua kiinulwe ne kiga kiya kilavigwe. Nomvidiile hant'hu hazumilwe kwa mviko ha mazuwa yose, mwink'hwa weye na wanawo kunda fungu dyenyu dya malavo ya utondowazi wa want'hu wa Izilaeli. 15 Kiga kiya kilavigwe ne kifua kiinulwe vaungwa vigalwe hamwenga ne zinyama zint'huhu za mavuta za malavo ya kokwa, vileke zinulwe ha Zumbe enga malavo ya kwinulwa. Idi nedinde fungu dyako weye na wanawo enga ivo Zumbe Mnungu alagize.

16 Musa eze auze mwe mbuzi ilavigwe kwaajili ya malavo ya wavu na kubunk'hula kugamba yokigwa, engilaga maya kwajili ya Elizaeli na Atamali wana wa Haluni wasigale niyo awauza, 17 "Nii hamdile malavo ya wavu hant'hu hakukile? Iyo ikukisa. Mwink'higwa nyuwe muuse masa vileke Mnungu awausile want'hu wavu wawe. 18 Kwaviya sakame haigalwe kwe Dihema Dikukile, nomuungwa mwiidye mbuzi Hant'hu Hakukile enga ivo isigiilwe."

19 Haluni niyo amhitula Musa, "Kaula, wanangu wegalaga malavo yawe ya kuusila wavu na malavo yawe ya kokwa pele ha Zumbe Mnungu mna mbuli enga zi nezinilaila. Togola dielo Zumbe hegu nakelelwa nadile malavo yo kuusila wavu?" 20 Musa eze eve ayo amzumilaga.