1 Want'hu wakongaga kumlabiila Zumbe mwe makunt'ho yawe. Musa amlombezaga Zumbe Mnungu, naye eze eve awafiilaga maya niyo egala moto wawakomaga wamwenga wawe na koka nt'hendelo imwenga ye nk'hambi yawe. 2 Want'hu wamwiilaga Musa, Musa naye amlombezaga Zumbe, moto nawo niyo wazima. 3 Ivo hant'hu aho hetangwagwa Tabela kwaviya moto wa Zumbe wawokaga wamwenga wawe.

4 Mwa Waizilaeli awo, mwandaga na fyo kulu dya want'hu dyawatimilaga. Want'hu awo waonaga umelo wa kudya nyama. Hata Waizilaeli nawo wakongaga kulabila wakagamba, "Hegu naswe chapatile nyama yo kudya! 5 Chakumbukila samaki chandaga kikadya uko Misili hahehina maliho, na matanga na matikiti na mboga za mani na vitunguu na vitunguu swaumu. 6 Mna ivi haluse kisokela naho hahana hata nk'hande ya kudya mna ni imana du!"

7 Mana iyo yandaga enga mbeyu ndodo ya uhemba naho yandaga injano. 8 Want'hu niyo wakonga kuilogota na kuisigint'ha kwa maiwe na kuibunda na kuyambika mwe zinyungu vileke vinde vikate. Navo vandaga vimwiile enga vikate vambikwe na mavuta ya zeituni. 9 Aho mnyuzu wize ugwe nekilo mwe nk'hambi mana nayo yagwaga hamwenga no mnyuzu uwo.

10 Musa evaga want'hu wakaila na kulabila mwe zimp'huga zawe kila yumwenga he nk'hili ye dihema dyakwe. Ivo Zumbe aonesaga maya, Musa naye niyo aihizwa.

11 Musa niyo amgamba Zumbe, "Nii ukamwigaila mndima ywako makunt'ho aya? Nii hwelelwe na miye, Nii ukanitwika nt'wika ya kuwakaulisa want'hu awa wose? 12 Ni miye niweleke hegu niwaumbile want'hu awa wose? Nii ukanigamba niwenule mwe mikono yangu enga mvele akwinula katiti kakwe mwe kifuwa? Nenidahe vivihi kuwenula want'hu awa mwe isi wakelisaga kuwenk'ha wakale wawe? 13 Nenilavehi nyama ya kuwegusa want'hu awa wose? Kwaviya wanilabiila wakanigamba niwenk'he nyama. 14 Miye hikudaha kuwalongoza want'hu awa wose nikedu, ndima ino ndala kwangu! 15 Uneva unanitenda ivi nakulombeza unikome, vileke nisekugendeela mwa makunt'ho yangu."

16 Zumbe niyo amgambaga Musa, "Niduganyile want'hu milongo mfungate mwa vilongozi wa Izilaeli, awo uwamanyize kugamba ni vilongozi wa want'hu, uwegale kwe Dihema Dikukile uwagambe wakimale hamwenga na weye. 17 Name neniseele uko nize nilonge na weye. Neniguhe ludodo lwo muye wako no kuuika mwawe, ivo nawadahe kukwambiza kuwalongoza want'hu awa, sema unawalongoze wikedu. 18 Haluse wagambe wantu, ‘Kekuzeni kwa zuwa dya luvi nompate nyama mdye, kwaviya nommwiila Zumbe naye kamivani mkaila mkagamba, Niani naakink'he nyama kidye? Nevinda vedi chandile Misili. Ivo elo Zumbe naawenk'heni nyama mdye. 19 Homdye nyama iyo kwa zuwa dimwenga du, hegu mazuwa maidi du hegu mazuwa mashano du hegu mazuwa mlongo du hegu milongo miidi du, 20 mna nomuidye nyama iyo kwa mwezi wose! Nomuidye niyo mwayehukwa naho homuiunge. Aya yalaila kwaviya mumlemela Zumbe andaga hamwenga na nyuwe niyo mwalabila kugamba nevinda vedi mwandile uuko Misili.’ "

21 Musa niyo amgamba Zumbe, "Want'hu awa huwalongoza ni alufu magana mtandatu 600,000 nawe wagamba uwenk'he nyama wadye kwa mwezi wose! 22 Haluse chadaha kuchinja ngoto na ng'ombe za kuwakint'hiza? Hata samaki zose mwe bahali neziwakint'he?"

23 Zumbe niyo amhitula Musa, "Udahi wangu una uheelo?" "Howikalise kuona yadya nilongile yakalaila hegu bule!"

24 Ivo Musa agendaga kuwagambila want'hu mbuli iyo alongile Zumbe, niyo awaguha vilongozi milongo mfungate. Awagambaga wekale kudizunguluka Dihema Dikukile. 25 Zumbe aseelaga mwe divunde niyo alonga na Musa. Aguhaga ludodo mwo muye amwink'haga Musa niyo augela mwa wadya vilongozi milongo mfungate. Weze wengilwe na muye niyo wakonga kulonga enga walotezi, mna hawaguhaga lupisi lutali.

26 Vilongozi waidi mwa wadya mlongo mfungate wasagulwe, Elidadi na Medadi wasigalaga aho he nk'hambi naho hawalawaga. Muye aweziilaga mwawe hadya he nk'hambi, woho nawo wakongaga kulonga ulotezi kulawa kwa Zumbe. 27 Mbwanga yumwenga agulukaga kugenda kumgambila Musa, "Eliudadi na Medadi walava ulotezi mwe nk'hambi."

28 Aho Yoshua mwana Nuni uyo andaga mwambizi ywa Musa amgambaga Musa, "Mkulu walemeze!"

29 Mna Musa niyo amhitula, "Weye waona finju kwajili yangu? Havandile vedi zumbe awenk'he want'hu wakwe wose muye nawo wande walotezi!" 30 Ivo Musa auyaga mwe nk'hambi hamwenga na wadya vilongozi milongo mfungate wa Izilaeli.

31 Ivo Zumbe egalaga heho dyegalaga nk'wale kulawa kwe bahali zandaga zisambala kuzunguluka ink'hambi, kwa uhale mtali kulawa he nk'hambi. Zakeumbikaga kilundo cha mp'hima mbili kuita kulanga. 32 Ivo mwe dizuwa diya dyose, kilo chose na zuwa tuhu dikutimila niyo walogota nk'wale. Hahana mnt'hu alogote ngeke kujink'ha kilo milongo gana. Wazanjazaga vileke zinyale he dizuwa. 33 Mna umwo nyama zandaga zikei kusila, Mnungu awafiilaga maya awo want'hu niyo awegaila maine yaihile. 34 Ivo hant'hu aho hetangagwa zina dya Kibulosi Hataava kwaviya nuko wamoselagwa msanga want'hu waonaga umelo wa nyama.

35 Kulawa Kibulosi Hataava want'hu watambaga mpaka Haselosi niyo wakima nk'hambi yawe na kwikala uko.