1 Zumbe amgambaga Musa, 2 "Lihizeni kikoda kwa Wamidiani kwa mbuli wawatendele Waizilaeli, ukajika aho weye noubanike." 3 Ivo Musa niyo awagamba want'hu, "Waikeni lumwe want'hu kwa nk'hondo waite wakawatowe Wamidiani wakalihize kikoda kwa yadya wawatendeleni. 4 Naho nomwigale kwe nk'hondo want'hu alufu kulawa mwe kila kabila dya Izilaeli." 5 Ivo, want'hu magana mlongo na waidi wakekakaga vitowanilo awo walavagwa mwe kila kabila dya Waizilaeli. 6 Musa nakawegala kwe nk'hondo mwo useuta wa Finehasi mwana mlava nt'hambiko Eliyazali, akanda ne vyombo va hant'hu hakukile na magunda ya kulavila vilagiso. 7 Wawatowaga want'hu wa Midiani, enga ivo Zumbe Mnungu amsigiile Musa, wawakomaga wagosi wose. 8 Mwa want'hu awo wakomigwe, nokunda na maseuta washano wa Midiani. Evi na Lekemu na Suli na Huli na Leba. Iviaivia nawamkoma Balaamu mwana Beoli. 9 Waizilaeli wawatahaga wavele na wana na mafyo yose ye mifugwa na ugoli wawe wose. 10 Watimp'haga moto mizi yawe yose, kaya zawe na nk'hambi zawe zose. 11 Nawaguha watahigwa wose ne mifugwa, 12 vint'hu vitahigwe kwe nk'hondo wavigalaga kwa Musa na Eliyazali na want'hu wose wa Izilaeli wekwe nk'hambi mwe isi ya mwe nt'hindiga ya Moabu, nt'hendelo ya Yolodani hagihi na Yeliko.

13 Musa na mlava nt'hambiko Eliyazali na vilongozi wose wa want'hu wa Izilaeli wafosaga kuse ye nk'hambi niyo wagenda kuwasingila watowani. 14 Musa nakaihizwa ni wakulu wa watowani na wakulu maalufu na wakulu wa watowani magana wauiye kulawa kwe nk'hondo. 15 Musa niyo awauza, "Nii hamuwakomile wavele awa? 16 Kumbukileni kugamba wavele nawo wawatendile Waizilaeli wamleke Zumbe kwa kumtimila Balaam kudya Peoli, kint'hu chegalaga manyonge yakutisa mwa want'hu wa Zumbe na kuwakoma. 17 Kwa ivo, wakomeni wana wose wa kilume na kila mvele agendile na mgosi. 18 Mna msekuwakoma wali na mazanga wose, walekeni wagima kwaajili yenyu nyuwe wenye. 19 Na wose mwa nyuwe wakomile mnt'hu hegu kukwafa kimba vaungwa wekale kuse ye nk'hambi kwa mazuwa mfungate, kekukizeni hamwenga na wadya watahigwe mwe dizuwa dya katatu na dya mfungate. 20 Kukizeni suke zenyu na kila kint'hu cha nk'hingo, na cha mazoya ya ngoto na kidamanywe cha ziti disongolwe."

21 Mlava nt'hambiko Eliyazali kawagamba wagosi wauiye kwe nk'hondo, "Ino ni sigilizi Zumbe amwink'hile Musa. 22 Zahabu na masawa na shaba, kilama na bati na madini ya chumbu, 23 vint'hu vose hevikusha enga viya zahabu, masawa, shaba, chuma, bati na madini ya chumbu, nevikukizwe kwa komboswa mwo moto mna iviyaiviya nekikukizwe mwa mazi, mna chochose kikudaha kusha nekikukizwe na mazi. 24 Zuwa dya mfungate mfigise zisuke zenyu, nomnde mkuka niho nomuuye kwe nk'hambi."

25 Naho Zumbe amgambaga Musa, 26 "Weye na mlava nt'hambiko Eliyazali, hamwenga vilongozi wa want'hu wose, Muwawaze awant'hu ne mifugwa mtahile. 27 Sangileni haidi ivo mvitahile kwe nk'hondo. Nusu ye disangilo wenk'heni watowani waitile kwe nk'hondo, nusu int'huhu wenk'heni want'hu wose wasigale. 28 Naho uguhe disangilo kulawa mwa watowani waitile kwe nk'hondo dinde kodi kwajili ya Zumbe. Imwenga mwa kila magana mashano yakanda ni kulawa mwa want'hu, ng'ombe, mp'hunda, ngoto hegu mbuzi. 29 Noumwink'he mlava nt'hambiko Eliyazali kunda malavo kwa Zumbe. 30 Mna nouguhe mwa Waizilaeli imwenga mwe kila milongo mishano ikanda ni mwa want'hu hegu ng'ombe hegu mp'hunda hegu ngoto, mbuzi, hegu mifugwa mituhu, uwenk'he Walawi awo wandima we Dihema Dikukile." 31 Musa na mlava nt'hambiko Eliyazali nawadamanya enga ivo Zumbe asigiile.

32 Ngoto ne zimbuzi izo zitahagwe na watowani zandaga alufu magana mtandatu na milongo mfungate na shano 675,000, 33 ng'ombe zandaga magana milongo mfungate na miidi 72,000, 34 mp'unda zandaga alufu milongo mtandatu na imwenga 61,000, 35 na wandeele awo wandaga wali na mazanga wandaga alufu milongo mitatu na mbili. 36 Watowani waitaga kwe nk'hondo wenk'hagwa mbuzi na ngoto alufu magana matatu na milongo mitati na mfungate na magana mashano 337,500. 37 Mwa izo magana mtandatu na milongo mfungate na shano, 675 zandaga za Zumbe. 38 Ng'ombe alufu magana milongo mitatu na mtandatu, naho mwa izo milongo mfungate na mbili zandaga geleko kwa Zumbe. 39 Mp'hunda zandaga alufu milongo mitatu na magana mashano, mwa geleko kwa Zumbe yandaga milongo mtandatu na imwenga. 40 Wali na mazanga wandaga alufu mlongo na mtandatu 16,000. Mwa awo, geleko kwa Zumbe wandaga milongo mitatu na miidi. 41 Ivo Musa niyo amwink'ha Eliyazali imwenga ya mlongo yandaga geleko kwa Zumbe enga ivo amsigiile Musa. 42 Idya inusu wenk'higwe Waizilaeli, yaliganaga na iyo Musa awaikile watowani, 43 inusu iyo ya want'hu yandaga ngoto na mbuzi alufu magana matatu na milongo mitatu na mafungate na magana mashano, 337,500, 44 ng'ombe zandaga alufu milongo mitatu na mtandatu. 36,000, 45 mp'hunda zandaga alufu milongo mitatu na magana mashano 30,500, 46 want'hu wandaga alufu mlongo na mtandatu, 16,000. 47 Musa aguhaga yumwenga kulawa mwa disangilo wenki'higwe Waizilaeli mwa kila want'hu milongo mishano na mifugwa milongo mishano na kuwenk'ha Walawi awo wandaga wandima we Dihema Dikukile enga ivo asiigiilwe ni Zumbe.

48 Ivo wakulu wa mafyo ya watowani wose kwa hamwenga wamwitilaga Musa, 49 wakamgamba, "Suwe wandima wako kiwawaza watowani wose we hasi yetu naho kiona kugamba wose weaha. 50 Naswe kigala malavo kwa Zumbe, ayo kila mnt'hu apatile hamwenga na vint'hu va zahabu. Bangili na mp'hete na heleni na usalu vileke kivilava ivi kumwink'ha nt'hogola Zumbe kwajili yo wikazi wetu." 51 Musa na mlava nt'hambiko Eliyazali nawo wahokela zahabu iyo. Zahabu iyo yandaga ni vint'hu visanigwe kulawa mwe zahabu. 52 Zahabu yose kulawa kwa wakulu wa watowani wose, yandaga enga kilo magana maidi. 53 Mwe vint'hu ivo watahaga, kila mtowani akeguhilaga vint'hu vakwe mwenye. 54 Ivo, Musa na mlava nt'hambiko Eliyazali waigalaga izahabu iyo kwe Dihema Dikukile kwaviya Zumbe kawamila want'hu wa Izilaeli.