1 Izi nizo zint'hulwe za Waizilaeli izo wagendaga umwo wandaga wakalawa Misili, wakanda mwa mafyo ya makabila yawe wakalongozwa ni Musa na Haluni. 2 Musa awandikaga zina dya kila hant'hu waikile nk'hambi, nt'hulwe na nt'hulwe, kwa sigilizi ya Zumbe. Ino niyo int'hambo yawe nt'hulwe kwa nt'hulwe. 3 Waizilaili wahalawaga ho mzi wa Lamasesi mwe dizuwa dya mlongo na shano dyo mwezi wa nk'hongo, zuwa dimwenga Pasaka ize yomboke. Wahalawaga kwa udahi mkulu ha Wamisili wose wakawakaula. 4 Uku Wamisili awo wakanda wakawamosa msanga nt'hulasasu wawe we kilume wakomigwe ni Zumbe, kwaviya Zumbe Mnungu aisengelaga milungu yawe. 5 Ivo, Waizilaeli wahalawaga Lamasesi, na kutoa nk'hambi yawe uko Sukoti. 6 Kulawa Sukoti waikaga nk'hambi yawe uko Etamu, mnk'handa mwe dijangwa. 7 Kulawa Etamu, nawahituka na kuuya mpaka Pihahiloti, ulailo wa zuwa wa Baale Sefoni, na kutoa nk'hambi yawe hagihi na Migidoli. 8 Wahalawaga Pihahiloti, na komboka bahali ya Shamu mpaka mwe dijangwa dya Etamu, watambaga mwe dijangwa kwa mazuwa matatu, na kutoa nk'hambi yawe Mala. 9 Kulawa Mala, nawaita mpaka Elimu, uko Elimu nokunda na nch'hoko mlongo na mbili za mazi na mitende milongo mfungate, na kutoa nk'hambi hant'hu aho.

10 Wagendaga kulawa Elimu na kutoa nk'hambi yawe mnk'handa mwe Bahali Shamu. 11 Kulawa Bahali ya Shamu nawatoa nk'hambi yawe mwe dijangwa dya Sini. 12 Kulawa kwe dijangwa dya Sini, waikaga nk'hambi yawe Dofika. 13 Kulawa Dofika nawatowa nk'hambi yawe uko Alushi. 14 Kulawa Alushi nawatowa nk'hambi yawe uko Lefidimu, uko hakwandile na mazi yo kunywa kwaajili ya want'hu.

15 Wahalawaga Lefidimu na kutowa nk'hambi yawe mwe dijangwa dya Sinai. 16 Kulawa Sinai nawatowa nk'hambi yawe uko Kibloth Hataava. 17 kulawa kibulot Kataava, nawatowa nk'hambi yawe uko Hazeloti. 18 Kulawa Hazeloti, nawatowa nk'hambi yawe uko Litima. 19 Kulawa Litima, nawatowa nk'hambi uko Limon Pelezi. 20 Kulawa Limon Pelezi nawatowa nk'hambi uko Libina. 21 Kulawa Libina nawatowa nk'hambi uko Lisa. 22 Wahalawaga Lisa, na kutowa nk'hambi uko Kehelata. 23 Kulawa Kehelata, nawatowa nk'hambi yawe uko kwo mnima Shefeli. 24 Kulawa mnima Shefeli nawatowa nk'hambi yawe uko Halada. 25 Kulawa Halada, nawatowa nk'hambi yawe uko Makeloti. 26 Kulawa Makeloti, nawatowa nk'hambi yawe uko Tahati. 27 Kulawa Tahati nawatowa nk'hambi yawe uko Tela. 28 Kulawa Tela nawatowa nk'hambi yawe uko Mitika. 29 Kulawa Mitika nawatowa nk'hambi yawe uko Hashimona. 30 Kulawa Hashimona nawatowa nk'hambi yawe uko Moseloti. 31 Kulawa Moseloti nawatowa nk'hambi yawe uko Bene Yaakani. 32 Kulawa Bene Yaakani nawatowa nk'hambi yawe uko Holi Hagidigadi. 33 Kulawa Holi Hagidigadi nawatowa nk'hambi yawe uko Yoti Bata. 34 Kulawa Yoti Bata nawatowa nk'hambi yawe uko Abilona. 35 Kulawa Abilona nawatowa nk'hambi yawe uko Esion Gebeli. 36 Nawahauka Esion Gebeli, na kuita na kutowa nk'hambi yawe mwe dijangwa dya Sini, iyo Kadeshi. 37 Kulawa Kadeshi nawatowa nk'hambi yawe mwo mnima Holi, mwe mihaka ya isi ya Edomu.

38 Kwa sigilizi ya Zumbe mlava nt'hambiko Haluni nakakwela mwo mnima Holi, uko niyo abanika mwe dizuwa dya nk'hongo dyo mwezi wa shano, mwaka wa milongo mine kukongela aho Waizilaeli wahalawaga mwe isi ya Misili. 39 Haluni andaga na miaka gana dimwenga na milongo miid na mitatu umwo akabanika mwo mnima Holi. 40 Seuta ywa Aladi, Mkanani, ekalaga Kwa mwenye mzi ye isi ya Kanaani evaga kugamba waizilaili wandaga wakeza. 41 Kulawa mwo mnima Holi, Waizilaeli waikaga nk'hambi yawe Salimona. 42 Kulawa Salimona, waikaga nk'hambi yawe uko Punoni. 43 Kulawa Punoni, wakimaga nk'hambi yawe uko Oboti. 44 Kulawa Oboti, wakimaga nk'hambi yawe Iiye Abalimu, mwe mihaka ya Moabu. 45 Kulawa Iiye Abalimu, waikaga nk'hambi yawe uko Diboni Gagadi. 46 Kulawa Diboni Gadi waikaga nk'hambi yawe uko Alimoni Dibulataimu. 47 Kulawa Alimoni Dibulataimu, nawatamba na kutowa nk'hambi yawe mwo milima ya Abalimu kuhinga no minima Nebo. 48 Kulawa milima ya Abalimu, nawatamba na kutowa nk'hambi yawe mwe zint'hindiga za Moabu ng'ambu ya mto Yolodani hagihi na Yeliko. 49 Nawaika nt'hulwe iyo hagihi no mto Yolodani hagatigati mwa Beti Yeshimoti kwe dikolongo dya Abel Shitimu mwe zint'hidiga za Moabu.

50 Mwe zint'hindiga za Moabu, ng'ambu yo mto Yolodani hagihi na Yeliko, Zumbe amgambaga Musa, 51 "Wagambile Waizilaeli kugamba mkeza komboka mto Yolodani na kwingila mwe isi ya Kaanani, 52 wakulumbuzeni wakaya wose mwe isi iyo ha meso yenyu, naho banangeni mahili yose ya kusongola na ya kusana na kubananga kila hant'hu aho ho kuvikila. 53 Nomwiguhe isi iyo na kwikala umwo kwaviya hiwenk'hani inde yenyu. 54 Nomuipange isi iyo kwa kutoa kula viligane ne zimp'huga zenyu, hant'hu hakulu kwa kabila kulu, hant'hu hadodo kwa kabila dodo. Hant'hu aho isimbi neimgweele mnt'hu yeyose hant'hu hakwe nounde ukipe enga makabila ya watati zenyu ivo yeli. 55 Mna uneva hamkuunga kuwagulusa wakaya we isi iyo, nawande enga mitunga mwe meso yawe na miwa mwe zimbavu zenu ivo awo nawawageleni nk'huswa nk'huswa mwe isi mkwikala. 56 Naho hamna wakulumbuze name neniwabanangeni enga ivo nehaunga niwabanange woho."