1 Zumbe amgambaga Haluni, "Weye na wanao na Walawi, nomnde na masa nayalaile mwo undima ze Dihema Dikukile ho undiilo wangu, mna weye na wanao nomnde na masa kwa dyodyose dikuunga dilaie mwo undima wo ulavant'hambiko. 2 Wegale wanduguzo we dikabila dya Lawi wadamanye ndima na weye, wakwambize umwo weye na wanao mkadamanya ndima ze Dihema Dikukile. 3 Woho nawadamanye ndima izo ukuunga uwenk'he na kukint'hiza ivo vikuungwa ze Dihema Dikukile. Mna wasekuvitoza vyombo ve Dihema Dikukile, naho kunda hagihi na hant'hu hakulavila malavo, sema wanabanike niyo nawe wabanika. 4 Awo nomndanye mwe zindima na kukint'hiza zindima zikuungwa ze Dihema Dikukile no kudikaulisa, mna naho mt'hu yeyose heewagilwe asekuwambizani. 5 Nyuwe nomdamanye ndima he Dihema Dikukile, sema maya yangu yanalaile naho mwa Waizilaeli. 6 Ni miye niwasagule wandugu zenyu Walawi mwa Waizilaeli kunda geleko kwenyu walavant'hambiko. Woho waikwa kwaajili yangu miye Zumbe vileke wadamanye zindima ze Dihema Dikukile. 7 Mna weye wikedu na wanawo nomdamanye ndima zose zo ulava nt'hambiko kwaajili ye kilingo cho kutambikila na vose vi hant'hu hakukise. Uno nuwo undima wenyu kwaviya hiwenk'hani geleko dyo ulavant'hambiko. Mnt'hu yeyose hi mlava nt'hambiko anasogeela aho hant'hu hakukise naakomwe."

8 Zumbe niyo amgamba Haluni, nakwink'ha malavo wanink'hile Waizilaeli, malavo yose yakukile ayo wanink'hile. Malavo yose yaikigwe ukuki ni Waizilaeli. Nohwink'he vint'hu vose weye na welekwa wako kunda upasi wenyu, na idyo ni uwagilwa wenyu na wanao mazuwa yose. 9 Vint'hu ivi nevinde vako mwa viya vikukise, visekokwa, malavo yawe yo unga na malavo yose yo wavu, malavo yawe yose ya masa ayo wakuunga wanilavile, nayande yakukise kwaajili yako weye na wanao. 10 Nomvidye vint'hu ivo kunda vint'hu vikukise aho hant'hu hakukile, kila wagosi naavidye vint'hu ivo, naho nevinde vikuka kwenyu.

11 "Naho vint'hu vituhu wakuunga wanilavile Waizilaeli kunda malavo ya kwinulwa, nevinde vako. Nakwink'ha weye na wanao na wanao we kike kunda ukipe kwenyu mazuwa yose. Mnt'hu yeyose mwa want'hu azumilwe ha Zumbe adaha kudya vint'hu ivo.

12 "Nakwink'ha vint'hu vose vedi vikulawa mwa ulozo wa nk'hongo wakunilavila Waizilaeli, mavuta yedi na divai yedi na unga wedi, 13 no ulozo wose wa nk'hongo wa matunda yakuiva ya mwe nk'honde yawe ayo wakunigaila nayande yako. Kila mnt'hu azumilwe ha Zumbe.

14 "Kila kint'hu mwa waizilaeli kiikigwe kwa Zumbe nekinde chenyu.

15 "Kila mwelekwa ywa nk'hongo awo Waizilaeli wakunilavila, akanda mwelekwa ywa nk'hongo mwa want'hu hegu mfugwa, naande ywako. Mna waungwa uwakombole welekwa wa nk'hongo wose wa mnt'hu, na kila mwelekwa ywa nk'hongo ywa mfugwa heezimilwe ha Zumbe aungwa kukombolwa. 16 Welekwa awo wa nk'hongo nawakombolwe wakanda wana mwezi umwenga kwa kulihilwa vipande vishano va masawa, viligane ne vihimo va mwe Dihema Dikukile. 17 Mna welekwa wa nk'hongo wa ng'ombe, hegu ngoto hegu mbuzi wasekukombolwa, awo wakuka. Sakame yawe nomyagile kilingo cho kutambikila naho mavuta yawe nouyoke kunda malavo ya kokwa, ni mhemp'he ukumwelela Zumbe. 18 Nyama yawe mwadaha kuidya, enga viya kidali na kiga cha kulume vikulavilwa kunda malavo ya kwinulwa.

19 "Nakwink'ha weye na wanawo wa kilume na wanao wa kike vint'hu vose ivo Waizilaeli wakunilavila, ivo ni uwagilwa wenyu mazuwa yose. Ino ni Ndagano niikile mwa weye na welekwa wako."

20 Zumbe Mnungu niyo amgamba Haluni, "Nyuwe homnde na ukipe wowose mwe isi yawe, hegu kunda na sangilo mwa woho, sangilo dyenyu no ukipe wenyu mwa Waizilaeli ni miye."

21 Mwa Walawi, awo hiwenk'ha imwenga ya mlongo mwa vose wakunilavila Waizilaeli kunda ukipe wawe. "Ayo nayande maliho yawe kwo undima wakunilavila mwo kudikaula Dihema Dikukile. 22 Kukongela ivi haluse, want'hu watuhu wa Izilaeli wasekudisogeela Dihema Dikukile sema wanakole masa yo wavu niyo wakomwa. 23 Mna ni Walawi du nawade no undima we Dihema Dikukile naho nawaguhe uwihi wawe kwa dyodyose nedilaile mwo undima wawe. Ino ni sigilizi ikugendeela hata kwe vyeleko venyu vikwiza. Walawi hawande na ukipe mwa Waizilaeli, 24 kwaviya imwenga ya mlongo wakunilavila Waizilaeli hiwenk'ha kunda ukipe wawe. Nivo vikuleka higamba woho hawande na ukipe mwa Waizilaeli."

25 Niyo Zumbe amgamba Musa, 26 Naho nouwasigiile Walawi sigilizi izi, "Mwo lupisi nomhokele imwenga ya mlongo Zumbe awenk'hileni kulawa kwa Waizilaeli inde ukipe wenyu, nomnilavile miye Zumbe imwenga ya mlongo ya malavo ayo. 27 Malavo aya nayande ni enga yadya yakulavigwa nu mlimi kwa ulozo mhya wa nk'hande na divai. 28 Ivo, nivo nomnilavile miye Zumbe malavo ya imwenga ya mlongo nomyahokele kulawa kwa Waizilaeli. Imwenga ya mlongo nomnilavile miye Zumbe nommwink'he mlava nt'hambiko Haluni. 29 Mwa malavo yose nomuyahokele, nomumlavile Zumbe hant'hu ha mlongo ya hant'hu hedi kujink'ha zose naho zikukile. 30 Kwa ivo nouwagambe Walawi. Mnanilavila hant'hu hedi kujink'ha zose, hant'hu nahasigale nahande henyu, enga ivo vili mlimi akuguha kisigale umwo akajika kulava malavo yakwe ya ulozo wa nk'hongo wa unga na zabibu. 31 Naho nyuwe Walawi nomdye kilavigwe mkanda hant'hu hohose nyuwe ne zimp'huga zenyu kwaviya nuwo uwagilwa wenyu mwo undima we Dihema Dikukile. 32 Homnde na masa yeyose mkadya vint'hu ivo, ikanda mwamlavila Zumbe vint'hu vedi, homvigele usavu vint'hu vikukile va Izilaeli naho homkomwe."