1 Zumbe niyo awagamba Musa na na Haluni, 2 "Wawazeni want'hu wose wo lukolo lwa Kohasi, na yumwenga ywo lukolo lwa Lawi kwa kutimila nk'holo zawe, 3 naho uwawandike wagosi wose kukongela miyaka mlongo mitatu mpaka milongo mishano awo wakudaha undima mwe Dihema Dikukile. 4 Indima ya wana wa Kohasi mwe Dihema Dikukile ni ukaulizi we vint'hu vikukise. 5 Hakeza mpaka ho kusamiza ink'hambi, Haluni na wanawe nawengile mwe Dihema waseleze dipazia dikupanga hant'hu Hakukile na Hakukise dya kundani vileke wagubikile Disanduku dye Ndagano. 6 Kulanga mwe idyo dipazia nawaike ngubiko ya nk'hingo ihuhile ya kala dya kwe bahali, akajika wagubike kitambala cha buluu niyo wagela mwe idya mikimaila yakwe.

7 "Mnanga mwe meza ya kulaviliza mikate ikuikwa kwa Zumbe nawatandike kitambala cha buluu mnanga mwe suke iyo nawaike mabeseni na vihungu na nyiga na vikombe va kulavila malavo yo vint'hu vo kunywa. Mikate iyo neiikigwe mnanga mwe meza mazuwa yose. 8 Akajika nawaguhe kitambala kink'hundu niyo wagubikila vint'hu ivo vose, mnanga mwe meza nawagubike na ngubiko ya nk'hingo ihuhile ya kala dya kwe bahali akajika nawegale mihiko yo kwinuila.

9 "Nawaguhe suke ye buluu niyo wagubikila kinala che vimuli ne vimuli vakwe ne mikasi yakwe ne vihungu vakwe vo kuikila nk'hala za moto na vint'hu vakwe vose vo kugeela mavuta ye mizeituni kwajili ye ndima iyo. 10 Nawakigubike hamwenga ne vint'hu vakwe vose mwe nk'hingo ihuhile ya kala dya kwe bahali na kuinyinya mnanga ye mihiko yo kwinuila.

11 "Akajika nawatandike kitambala kibuluu mnanga mwe kilingo cho kutambikila kidamanywe kwa zahabu, nawahagubike kwa kingo ihuhile ya kala dye kwe bahali. Akajika naasomeke mihiko yakwe yo kwinuila. 12 Nawaguhe vint'hu vose vidamanyile ndima aho hant'hu hakukile no kugubika mwe icho kitambala kibuluu na kuvigubika ne nk'hingo iyo. Akajika naaviike mnanga mwe mihiko yo kwinuila. 13 Nawause maivu aho hant'hu ho kulavila nt'hambiko hadamanywe kwa shaba, niyo watandika kitambala cha zambalau. 14 Mnanga mwakwe nawaike vyombo vose vandile vikadamanyila mviko hadya hant'hu ho kulavilant'hambiko, vyetezo na uma na vipawa na nyiga. Naho mnanga mwakwe nawagubike na nk'hingo iyo niyo waigela mihiko ya kwinuila. 15 Umwo Haluni na wanawe wakanda wagubika kale Hant'hu Hakukile ne vint'hu vakwe vose vileke utafi ukonge, want'hu wo lukolo lwa Kohasi nawavinule. Mna woho hawakuzumilwa kuvi kwafa ivint'hu ivo vikukile sema wana komigwe. Ino niyo ndima ya want'hu wo lukolo lwa Kohasi kila aho Dihema Dikukile dikasamaizwa. 16 Eleazali mwana mlava nt'hambiko Haluni aungigwa kunda mkaulizi wa mavuta ye vimuli no ubani una mhemp'he na malavo ya nk'hande ya kila mazuwa na mavuta ya kuhaka yo kuikila vint'hu mwo undima umwo mwe Dihema Dikukile."

17 Zumbe awagambaga Musa na Haluni, 18 "Msekuleka lukolo lwe mp'huga ya Kohasi mwa Walawi lukakomigwa umwo waneza hagihi ne vyombo ivo vikukile, 19 Ivo elo vileke muwahonye ne mbuli ino, Haluni na wanawe wengile kundani niyo wawapangila awo want'hu kila yumwenga na undima wakwe na icho akuungwa kwinula. 20 Mna welekwa wa Kohasi wasekwingila niyo wakaula vint'hu ivo vikukise, wanadamanya ivo nawabanike."

21 Zumbe amgambaga Musa, 22 "Want'hu wo lukolo lwa Gelisoni wawazigwe viligane ne zink'holo zawe ne zimp'huga zawe. 23 Wagosi wose wakukongela miyaka milongo mitatu na wa milongo mishano, wose wakudaha kudamanya ndima mwe Dihema Dikukile. 24 Undima wawe nounde ni uno. 25 Awo nawenule dipazia dye Dihema Dikukile, hamwenga ne ngubiko yakwe ne nk'hingo ihuhile mnanga mwakwe ne dipazia dye nk'hili, 26 dipazia ne zisigi zo uwa umnk'handa mwe Dihema Dikukile na hant'hu ho kulavila nt'hambiko ne dipazia dye nk'hili ye uwa ne vint'hu vose vo undima. Iyo niyo indima yawe. 27 Undima wawe wose, unde wa kwinula hegu ndima nt'huhu neidamanywe viligane na ivo Haluni na wanawe ivo wasigiile. Nouwapangile undima wawe ne vint'hu vose wakuungwa kuvinula. 28 Ino niyo indima ya lukolo lwa Gelishoni mwe Dihema Dikukile. Nawadamanye ndima wakalongozwa ni Isamali mwa Haluni mlavant'hambiko.

29 "Naho uwawaze wana Melali vikuligana ne zink'holo zawe ne zimp'huga zawe. 30 Wawazigwe wagosi wose kukongela miyaka milongo mitatu mpaka milongo mishano, wose wakudaha undima mwe Dihema Dikukile. 31 Undima wawe nounde ni kwinula mbao ze Dihema Dikukile no mkiki, 32 hamwenga ne mikimaila ikudizunguluka uwa ne visimiko vakwe ne vigingi vakwe na luzigi hamwenga ne vint'hu vakwe vose. Uwasigigiile kila yumwenga viligane na ivo akuungwa enule. 33 Iyo niyo indima ya want'hu wo lukolo lwa Melali mwe ndima yawe yose mndani mwe Dihema Dikukile wakalongozwa ni Isamali mwana mlavant'hambiko Haluni."

34 Ivo, Musa na Haluni na vilongozi wawe wose wawawazaga want'hu wo lukolo lwa Kohasi viligane ne zimp'huga zawe, 35 niyo wawawaza want'hu wose wata miyaka milongo mitatu mpaka milongo mishano. Awo waonekaga kugamba nawadahe undima mwe Dihema Dikukile. 36 Uwazilo wawe viligane ne zink'holo zawe wandaga want'hu alufu mbili na magana mfungate na milongo mishano. 2,750 37 Awo nawo wawazigwe mwo lukolo lwa Kohasi wose wadamanyaga ndima mwe Dihema Dikukile, ivo Musa na Haluni niyo wawawaza enga ivo Zumbe amsigiile Musa.

38 Uwazilo wa want'hu wo lukolo lwa Gelishoni viligane ne zimp'huga zawe, 39 we miyaka milongo mitatu mpaka milongo mishano awo waonekaga kugamba wadaha undima mwe Dihema Dikukile. 40 Wandaga want'hu alufu mbili na magana mtandatu na milongo mitatu. 2,630 41 Uwo nuwo uwazilo wa want'hu we zink'holo za wana Gelishoni awo wandaga wandima mwe Dihema Dikukile awo wawazagwa ni Musa na Haluni enga ivo Zumbe amsigiilaga Musa. 42 Uwazilo wa want'hu wo lukolo lwa Melali viligane na zink'holo zawe ne zimp'huga zawe, 43 wata miyaka milongo mitatu mpaka milongo mishano, awo wawagilwe mwo undima we Dihema Dikukile, 44 Uwazilo wawe wandaga want'hu alufu nt'hatu na magana maidi. 45 Uno nuwo uwazilo wa want'hu wo lukolo lwa Melali awo wawazagwa ni Musa na Haluni enga ivo Zumbe amsigiilaga Musa.

46 Walawi wose niyo wawazigwe ni Musa na Haluni ne vilongozi wa want'hu viligane ne zimp'huga zawe ne zink'holo zawe, 47 kukongela miyaka milongo mitatu mpaka miyaka milongo mishano wose wawagilwe kudamanya ndima yo kwinula Dihema Dikukile. 48 Uwazilo wa want'hu awo wandaga alufu mnane na magana mashano na milongo mnane. 49 Kila yumwenga enk'hagwa ndima yakwe yo kudamanya mwo kwinula Dihema Dikukile enga ivo Zumbe amsigiilaga Musa.