1 Akajika Waizilaeli nawakonga utafi naho na kukima nk'hambi kwe zint'hindiga za Moabu, ulailo wa zuwa wa Yolodani nt'hendelo ya kaidi ya Yeliko.

2 Seuta Balaki ywa Moabu uyo mwana Sipoli, amanyaga zimbuli zose za Waizilaeli ivo wawatendelaga Waamoli. 3 Yehe hamwenga na wamoabu niyo wawogohesa Waizilaeli. Nawawogohesa kwaviya waizilaeli wandilisaga wengi. 4 Ivo, Wamoabu niyo wawagamba vilongozi wa Midiani, "Fyo idi nedibanange kila kint'hu mnk'handa yetu enga jeku ivo dikudya mani." Mwo lupisi ulo Balaki seuta ywa Moabu, 5 egalaga ulosi kwa Balaamu, mwana Beoli, uko Petoli, hagihi na mto Efulate mwe isi ya Amawi. Nakamgamba Balaamu, "Kuna want'hu walaile Misili, wamema mwe isi yetu yose, naho wakima nk'hambi hagihi na suwe. 6 Haluse wize uniligitile want'hu awa kwaviya wana ludole kujink'ha miye. Mafani nenidahe kuwahuma na kuwagulusa wasekwingila mwe isi yangu. Kwaviya himanya kugamba weye una mvikila mnt'hu avikilwa, naho unamligita mnt'hu aligitwa."

7 Ivo, vilongozi wa Moabu na Midiani wahalawaga wakanda waguha maliho ya kumliha Balaam vileke awaligite Waizilaeli. Wahalawaga no kuita kwa Baalam niyo wamwink'ha Baalaam ulosi ulaile kwa Balaaki. 8 Balaamu niyo awagamba, "Goneni uku kilo iki, miye name neniwalagiseni ayo akuunga anigambile Zumbe Mnungu." Ivo vilongozi awo wa Moabu wagonaga kwa Balaamu.

9 Zumbe amwiziilaga Balaam, na kamuuza, "Awa unanawo ni wahi?"

10 Balaamu niyo amhitula Mnungu, "Seuta ywa Moabu Balaki mwana Sipoli kaniigaila sigilizi kugamba, 11 kuna want'hu walaile Misili, naho wamema kila hant'hu. Kanilombeza niite hawaligite want'hu awo vileke adahe kutoana nawo na kuwagulusa."

12 Mnungu niyo amgamba Balaamu, "Usekuita hamwenga na want'hu awa wezile, naho usekuwaligita want'hu awo wa Izilaeli kwaviya wavikilwa." 13 Ivo, luvi yakwe Balamu nakenuka na kuwagamba wadya wegala ulosi wa Balaki, "Uyeni kwe isi yenyu, kwaviya Zumbe hakuunga kunilekela niite hamwenga na nyuwe." 14 Kwaivo wadya wakulu wa Moabu waitaga na kuuya kwa Balaki, niyo wamgamba, "Balaamu kalemela kwiza hamwenga na suwe."

15 Niyo Balaki asigiila wakulu watuhu wengi na wata udahi mkulu kujink'ha wadya wa nk'hongo. 16 Awo nawabula kwa Balaamu, wakamgamba, "Balaki mwana wa Sipoli agamba ivi. Usekukindilwa na chochose vileke usekwiza kwangu. 17 Nohwink'he geleko kulu na kukudamanyila chochose noulonge. Soo uwaligite want'hu awa."

18 Mna Balaamu niyo awahitula wadya wasigiilwe ni Balaki, "Hata uneva Balaki ananink'ha nyumba yakwe imemile masawa na zahabu, miye henidamanye mbuli yeyose ndodo hegu nk'hulu ikumhiga Zumbe Mnungu ywangu. 19 Mna goneni aha kilo iki enga wadya weenyu, miye name nidahe kumanya kiya Zumbe akuunga anigambile naho."

20 Ivo, Mnungu niyo amhitula Balaamu kilo icho, akamgamba, "Kwaviya want'hu awa weza kukwitanga, ita hamwenga nawo, mna udamanye du kiya nohugambile." 21 Balamu niyo enuka mtondo, na kuika kint'hu cha kwikaila na kwikala mwe mp'hunda yakwe, niyo aita hamwenga nao awo wakulu wa Moabu.

22 Mungu afaga maya vitendese kwaviya Balaamu andaga akaita, ivo mtumigwa ywa kwe mbingu ekalaga mwe sila amhige Balaam uyo andaga akalongoza imphunda yakwe akanda na wandima wakwe waidi. 23 Imp'hunda iyo yamuonaga mtumigwa ywa kwe mbingu kakimala mwe sila, katoza bamba disomolwe mwe yala yakwe, ivo imp'hunda iyo yapagukaga mwe sila niyo yaita kunk'handa. Balamu niyo aitoa imp'hunda, na kuivuza mwe sila. 24 Yudya mtumigwa ywa kwe mbingu ywa Zumbe alongolaga na kukimala hant'hu hana sila finyu, mwe migunda ya mizabibu na viwambaza viidi nt'hendelo zose mbili. 25 Mp'hunda ize amuone mtumigwa ywa kwe mbingu ywa Zumbe, ikesukumiza mwe kiwambaza ikiga cha Balaamu. Kwaivo Balaamu niyo aitoa imp'hunda naho. 26 Mtumigwa ywa kwe mbingu wa Zumbe niyo alongola naho na kukimala hant'hu hafinyu kwa kombokela kulume hegu kumoso. 27 Imp'hunda ize imuone uyo mtumigwa ywa kwe mbingu ywa Zumbe, yagonaga hasi. Balaamu niyo afa maya na kuitoa imp'hunda ne ngoda yakwe. 28 Aho Zumbe aitendaga mp'hunda idahe kulonga, niyo yamgamba Balaamu, "Hikubanangai vilekile ukanitoa nk'hanana izi nt'hatu?"

29 Balaamu niyo aigamba imp'hunda, "Weye kunibela! naho nandile na bamba hegu nehikukoma haluse ivi!"

30 Mp'hunda niyo yagamba Balamu, "Togola, miye hi idya mp'hunda yako ikwinule wikazi wako wose mpaka zuwa idi dya dyelo? Togola, miye hizoela kukudamanyila enga ivi?" Balaamu niyo ahitula "Bule."

31 Aho, Zumbe Mnungu niyo amtenda Balaamu amuone mtumigwa ywa kwe mbingu kakimala mwe sila katoza bamba disomolwe mwe yala yakwe. Balaamu niyo afika madi na kufunamiza mtwi wakwe hasi. 32 Mtumigwa ywa kwe mbingu ywa Zumbe amgambaga Balamu, "Togola kuitoelai mp'hunda yako nk'hanana nt'hatu? Hiza hukindile, kwaviya icho ukuunga udamanye kiha. 33 Mp'hunda yako iniona nk'hanana nt'hatu niyo yapaguka. Yandile hayahituke hale na miye ikindedi hegu nehikukoma weye na kuileka mp'hunda ikanda ngima."

34 Balamu niyo amgamba mtumigwa ywa kwe mbingu ywa Zumbe, "Hidamanya wavu kwaviya himanyize kugamba kukimala mwe sila kunikindila. Haluse, uneva hukuunga nigendele na nt'hambo ino, ivo neniuye kaya."

35 Mna mtumigwa ywa kwe mbingu ywa Zumbe kamgamba Balaamu, "Ita na want'hu awa, mna noulonge du kiya nohugambile." Ivo Balaamu niyo agendeela na nt'hambo yakwe hamwenga na vilongozi wakulu wa Balaki.

36 Balaki eze eve kugamba Balaamu eza, afosaga akamsingile kwo mzi ukwitangwa Ali, mzi wi mnk'handa yo mto Alinoni mwo uheelo wo mhaka wa Moabu. 37 Balaki niyo amgamba Balaamu, "Nii hwizile kwangu aho nize hwitange nk'hongo? Togola, nokufanyanya kugamba hehadaha kukwink'ha nt'hunyo ikukint'ha?"

38 Balaamu niyo amhitula Balaki, "Haluse hiza! Mna, togola nna udahi wa kulonga chochose? Mbuli naanigambile Mnungu niyo huungwa kulonga." 39 Ivo, Balaamu niyo aita hamwenga na Balaki niyo wabula kwo mzi wa Kiliati Hosoti. 40 Balaki atambikaga ya ng'ombe na ngoto, na kuwapangila nyama Balaamu na vilongozi wakulu awo wandile hamwenga naye.

41 Zuwa ditimile, Balaki amguhaga Balaamu, niyo wakwelanya mpaka hant'hu wakumvika Bamosi Baali, kulawa uko Balaamu adahaga kuwaona Waizilaeli wamwenga.