1 Waizilaeli wose wailisaga kwa kuboha mwe kilo chose. 2 Waizilaeli wose wawalabiilaga Musa na Haluni wakagamba, "Hegu vandile vedi chabanikile kudya kwe isi ya Misili hegu hata mwe dijangwa idi! 3 Zumbe nii akakigala mwe isi ino vilekile kikakomwa kwa kuchinjigwa? Wavele wetu na wana wetu nawatahigwe! Ni vedi kiuye Misili?" 4 Wakongaga kukegamba, "Kisagule kilongozi mtuhu kiuye Misili."

5 Aho Musa na Haluni wafikaga madi na kufunamiza mitwi yawe hasi ho mdugano wose wa Waizilaeli. 6 Yoshua mwana Nuni na Kalebi mwana Yefune awo wandaga mwa wagendile kuipelemba isi ya Kanaani watatulaga zisuke zawe kwa kinyulu, 7 na kuwagamba Waizilaeli wose, "Isi iyo kigendile kuikaula itendesa uwedi kwa kulima na udimi. 8 Uneva Zumbe anelelwa na suwe, naakigale uko niyo akink'ha isi iyo ina sanga yedi kwa kulima na udimi. 9 Mna mse kusaguka kwa Zumbe naho msekuwogoha wakaya we isi iyo, kwaviya awo hawakudaha kukihuma, wamizi wawe uuswaa kwawe, Zumbe e hamwenga na suwe." 10 Mna mdugano wose kwa hamwenga dyagambaga dyaunga diwatowe maiwe Yoshua na Kalebi. Aho niyo ung'azi wa Zumbe waoneka mwe Dihema Dikukile dya Waizilaeli wose.

11 Niyo Zumbe amgamba Musa, "Want'hu awa hawanive mpaka ini? Naho nawanibele mpaka ini hamwenga na mitu mingi iyo nidamanye mwawe? 12 Neniwatoe kwa maine ya kutisa na kuwalemela kunda wangu, naho kulawa mwako nenidamanye want'hu watuhu wata ludole wana udahi kujink'ha awo."

13 Mna Musa niyo amgamba Zumbe, "Kuwalava want'hu awa mwe isi ya Misili kwa udahi mkulu. Mna Wamisili waneva kuwatendela ivo want'hu wako, 14 wakuwagambila want'hu we isi ino. Kwaviya want'hu awa weva kugamba Zumbe uhamwenga na want'hu awa, naho kuoneka meso kwa meso, naho divunde dyako dyekala mnanga mwawe, naho kugamba wawalongoela mwo mkola wa vunde aho nomsi na mkola wa moto aho nekilo. 15 Haluse unawakoma want'hu wako wose kwa hamwenga, want'hu wa si zose wevaga zimbuli zako naweve niyo wagamba, 16 Zumbe kadunduga kuwegala want'hu kwe isi iyo alongile kwa kilapi kugamba naawegale, ivo kawakomela he dijangwa. 17 Haluse nakulombeza ukilagise udahi wako kwa kudamanya enga ivo walongaga, 18 ‘Zumbe hiyo mhufu wa maya, naho ana lukunde vitendese awausila want'hu wavu wawe, na uwihi wawe hamwenga na ayo houleke kuusulumiza wavu. Nouwasulumize wana kwa masa ya welesi wawe kukongela cheleko cha katatu na cha kane.’ 19 Nakulombeza uwausile want'hu awa wavu wawe kwa lukunde lwako holwiina uheelo enga ivo wawausile kukongela aho walawaga Misili mpaka ivi haluse."

20 Zumbe niyo ahitula, "Neniwausile wavu wawe viligane na ivo uwalombezele. 21 Hamwenga na ayo, kwaviya hikudaha kubanika naho enga ivo isi neyenele uwedi wangu utendese, 22 hahali mnt'hu yeyose neengile mwe isi idya. Kwaviya wauonaga ung'azi wo undiilo wangu ne mitu nadamanyaga kudya Misili na mwe dijangwa, mna wanigezaga na kunigeza naho walemelaga kuniva. 23 Hahali yeyose naaione isi idya naikile kilapi hawagamba wakale wawe kugamba neniwenk'he. Hahali yeyose anilemele akuunga aione isi iyo. 24 Mna mtumwa ywangu Kalebi, kanitegelezesa nenimwigale mwe isi iyo naye neengile hamwenga na welekwa wakwe niyo wekala. 25 Kwaviya Waamaleki na Wakanaani wekala mwe dikolongo dya isi iyo, luvi hitukeni muite mwe nyika kwa sila ikuita kwe bahali ya Shamu."

26 Zumbe niyo amuuza Musa na Haluni, 27 "Mdugano wa want'hu wata wavu nougendeele kunilabiila mpaka ini? Neva ivo Waizilaeli wakulabila, 28 haluse wahitule enga ivi, Zumbe agamba, ‘Nakelisa kugamba, kwaviya hikudaha kubanika, neniwatendeleni enga ivo ulombeze. Ni miye Zumbe. 29 Nombanike vimba venyu neviduulwe mwe dijangwa idi. Kwaviya nomkanilabiila, hahali hata yumwenga ywenyu kukongela miyaka milongo miidi na kugendeela neengile mwe isi idya. 30 Homwingile na kwikala mwe isi nakelisaga kuwenk'hani. Nawengile mwe isi iyo ni Kalebi mwana Yefune na Yoshua mwana Nuni du. 31 Mna wana wenyu awo mwagambile nawatahigwe awo nawo neniwegale mwe isi iyo nawo nawaimanye isi iyo nyuwe muilemele, 32 mna nyuwe nombanike mwe dijangwa! 33 Naho wana wenyu nawande wadimi mwe dijangwa kwa lupisi lwa miyaka milongo mine kwa viya nyuwe nomswesa mhuwi mpaka aho nomsile pele. 34 Nomkunt'he kwa miaka milongo mine viligane na masa yenyu, enga ivo mpelembe isi idya kwa mazuwa milongo mine, mwaka mwenga kwa kila zuwa dimwenga. Aho nommanye kugamba miye hiihizwa. 35 Miye Zumbe higamba, ikindedi neniwatende wose wadugane aha wanihige. Nawakomigwe wose aha he dijangwa naho nawabanikile aaha.’ "

36 Wadya want'hu watumagwa ni Musa wakaipelembe isi wauyaga na kwigala ulosi wa lulimi walekaga want'hu wakamlabiila Zumbe, 37 want'hu awo wegalaga ulosi wa lulimi mwe isi, watowagwa maine yaihile niyo wabanika ha Zumbe. 38 Mna Yoshua mwana Nuni na Kalebi mwana Yefune wekedu nawo wasigalaga kunda wagima mwa wadya want'hu wagendaga kuipelemba isi.

39 Musa eze alonge ayo kwa Waizilaeli wose, wahongezaga kwa usungu utendese. 40 Mtootondo zuwa ditimile wakwelaga kuhinga kwe vigulu niyo wagamba, "Haluse kikeika lumwe kuita kudya Zumbe akigambilaga. Kizumila kugamba kidamanya wavu."

41 Mna Musa niyo agamba, "Nii mwahitula sigilizi ya Zumbe dyo kuuya kwe dijangwa? Nyuwe homdahe! 42 Msekuita uko kwe isi iyo, nomheele kutoigwa ni wank'hondo wenyu kwaviya Zumbe he hamwenga na nyuwe. 43 Mnagenda kutowana na Waamaleki na Wakanaani nombanike kwe nk'hondo. Kwaviya mleka kumtimila Zumbe yehe haande hamwenga na nyuwe."

44 Hata ivo wakombatizaga na kuita kwo lugulu, mna Musa hahalawaga, Disanduku dye Ndagano nadyo hadyalavagwa he nk'hanbi. 45 Naho Waamaleki na Wakanaani wandaga wekekala mwe isi ye vigulu waselaga niyo wawatowa na kuwahiga. Niyo wawagulusa mpaka kwo mzi wa Holima.