1 Zumbe amgambaga Musa, 2 "Sagula want'hu wakaipelembe isi ya Kanaani, idya huwenk'ha want'hu wa Izilaeli naho usagule mnt'hu mwe kila kabila dya wakale wawe naho kila mnt'hu ande kilongozi ywo lukolo."

3 Musa adamanyaga enga ivo Zumbe amsigiile, awatumaga want'hu awo kulawa kwe dijangwa dya Palani. Want'hu awo wose wandaga ni vilongozi wa Waizilaeli. 4 Mazina ya want'hu awo ni aya,

Mwe dikabila dya Lubeni andaga ni Shamua mwana Zakuli. 5 Mwe dikabila dya Simeoni andaga ni Shafati mwana Holi.

6 Mwe dikabila dya Yuda andaga ni Kalebu mwana Yefune.

7 Mwe dikabila dya Isakali andaga Igali mwana Yosefu.

8 Mwe dikabila dya Efulaimu andaga ni Hoshea mwana Nuni. 9 Mwe kabila dya Benjamini andaga ni Paliti mwana Lafu.

10 Mwe dikabila dya Zabuloni andaga Gadieli mwana Sodi.

11 Mwe dikabila dya Yusufu nuko kugamba kabila dya Manase, andaga ni Gadi mwana Susi. 12 Mwe dikabila dya Dani adaga Amieli mwana Gemali.

13 Mwe dikabila dya Asheli andaga Sesuli mwana Mikaeli.

14 Mwe dikabila dya Nafutali andaga Nahabi mwana Wofisi.

15 Mwe dikabila dya Gadi andaga ni Geueli mwana Maki.

16 Awa nawo wandaga wapelembi watumagwa ni Musa wakapelembe isi ya Kanaani. Dizina dituhu dya Hoshea mwana Nuni enk'hagwa ni Musa etangagwa Yoshua.

17 Umwo Musa awatumaga want'hu awo wakaipelembe isi ya Kanaani, awagambaga, "Kweleni nt'hendelo ya Kwa mwenye mzi ya Kanaani mpaka kwe isi ye vigulu. 18 Kaipelembeni mmanye kugamba iyo isi ivivihi, naho mmanye kugamba want'hu wakwe wana ludole hegu wasokezi, naho wengi hegu wageke. 19 Pelembeni mmanye kugamba isi iyo yedi hegu iha, mizi yawe izengelwa gomela hegu bule. 20 Mkakaule mmanye kugamba sanga yakwe ina uolozo hegu bule, naho mmanye kugamba isi iyo ina mbago hegu bule, naho mdamanye vovose, umo mkauya mkigaile matunda ye isi iyo." Msimo udya wandaga ni msimo wa nk'hongo wo kuiva zizabibu.

21 Ivo wagendaga kupelemba isi iyo kulawa kwe dijangwa dya Sini hagihi ne sila ya kwingila Lebohamasi. 22 Wakwelaga nt'hendelo ya Kusini kombokela kwo mzi wa Hebloni uko wandaga wakekala wakale wa Anaki. Uko wawabwiiga Waahimani na Washeshai na Watalimani vyeleko va Anaki. Mzi wa Hebuloni wakongagwa kuzengwa miyaka mfungate aho mzi wa Soani wa Misili wandaga ukei kuzengigwa. 23 Wapelembi awo weze wabule kwe dikolongo dya Eshikoli, wasengaga tambi dyandaga na nk'hwasa zamemaga zabibu izo zenulagwa ni want'hu waidi. Want'hu awo iviyaiviya wegalaga makomamanga mageke na tini. 24 Aho hetangagwa kolongo dya Eshikoli nuko kugamba ni nk'hwasa zamemaga zabibu izo zakant'hagwa ni Waizilaeli.

25 Want'hu awo wauyaga aho weze wajike kuipelemba isi kwa mazuwa milongo mine. 26 Wauyaga kwa Musa na Haluni na kwa want'hu wose wa Izilaeli uko Kadeshi kwe dijangwa dya Palani. Wawagambilaga kiya waonaga na kuwalagisa na amatunda wegalaga. 27 Aya nayo wamgambilaga Musa. "Nekiita kwe isi idya wakitumile, kiipelemba naho kiiona ni isi ina ulozo ikuwagila kulima na udimi. Aya nayo matunda yakwe. 28 Mna want'hu wakwikala mwe isi iyo ni wata ludole, naho mizi yawe mikulu naho izengelwa gomela. Vitendese nekiyaona mazint'hu makulu welekwa wa Anaki. 29 Waamaleki wekala mwe isi ya nt'tendelo ya Kusini, Wahiti na Wayebusi na Waamoli awo wekala mwe isi ye vigulu, Wakanaani wekalaga mwe bahali ya Meditelania mk'handa mwo mto wa Yolidani."

30 Mna Kalebi awatondowazaga want'hu ha Musa, niyo agamba, "Kiteni hamwenga kikaguhe isi iyo. Kwaviya kina ludole lwa kuwahuma."

31 Mna want'hu waitaga naye kwo kuipelemba isi iyo wagambaga, "Hekidahe kutoana na want'hu awo, kwaviya want'hu awo wana ludole kujink'ha suwe." 32 Wabwelekezaga lulimi kwa Wazilaeli mwe mbuli ye isi wagendaga kuipelemba wakagamba "Isi iyo yakoma want'hu wakwe. Ivo mazint'hu kiyaone uko makulu. 33 Kudya nekiona mazint'hu welekwa wa Anaki. Suwe nekioneka kunda enga mp'hasi kwawe."