1 Waizilaeli weze wande uko Shitimu, wagosi nawakonga kugenda na wavele wa Moabu. 2 Wavele awo nawawalalika Waizilaeli wande hamwenga mwo kudamanya mviko kwe milungu yawe, waizilaeli nawo wadyaga nk'hande na kuivikila milungu yawe. 3 Ivi nivo Waizilaeli wakongaga kumvika mnungu Baali ywa Peoli, naho maya ya Mnungu niyo yatendesa mwawe. 4 Ivo, Zumbe niyo amgamba Musa, "Waguhe vilongozi wose wa Izilaeli wazaganye awant'hu, uwanyogotole mwe dizuwa vileke maya yangu kwenyu yasile." 5 Musa niyo awagamba vilongozi wa Izilaeli, "Kila yumwenga ywenyu amkome mnt'hu yeyose mwe dikabila dyakwe akelungile na mnungu Baali ywa Peoli."

6 Mwo lupisi ulo Mwiizlaeli yumwenga aguhaga mvele ywa Kimidianina kuita naye kwe dihema dyakwe ivi Musa no mdugano wose wa Waizilaeli wakamkaula,umwo Wazilaeli wandaga wakahongeza he nk'hili ye Dihema Dikukile. 7 Ivo, Fenehasi mwana Eliyazali mwana ywa mlava nt'hambiko, Haluni eze aone ayo, nakenuka na kufosa mwa want'hu awo na kuguha mjungo, 8 na kumtongela yudya Mwizilaeli mpaka mwe dihema dyo mnt'hu uyo na kuwajunga mjungo mwe zinda wose waidi. Na kwa kudamanya ivo unyonge wiihile noukawabananga Waizilaeli niyo wasila. 9 Want'hu wakomigwe nu unyonge uwo wiihile nawanda alufu milongo miidi na mine.

10 Zumbe niyo amgamba Musa, 11 "Kwaviya Fenehasi mwana Eliyazali, mwana mlava nt'hambiko Haluni, kakindila maya yangu mwa Waizilaeli, kwaviya mwa nyuwe ni yehe du heungile kuona mnungu mtuhu akavikwa mna miye du. Naho nivo vilekile hiwabanange Waizilaeli wose kwa maya yangu. 12 Kwaivo mgambile kugamba naikanaye Ndagano ya utondowazi. 13 Nalagana naye yehe na welekwa wakwe kugamba nawande walava nt'hambiko mazuwa yose, kwaviya haungile kuona mnungu mtuhu akavikwa mna miye du, na kuwavuza Waizilaeli kwangu."

14 Uyo Mwizilaeli akomigwe hamwenga na mvele ywe Kimidiani naketangwa Zimli mwana Salu, kilongozi yumwenga mwe mp'huga imwenga ye dikabila dya Simeoni. 15 Uyo mvele Mmidiani akomigwe naaketangwa Kozibi mwana Suli andaga kilongozi ywa lukolo lumwenga lwa Wamidiani.

16 Zumbe niyo amgamba Musa, 17 "Ita kawatowe Wamidiani niyo wawakoma, 18 kwaviya wawadant'hilizaga niyo wawatendani mumvike mnungu ywa Baali uko Peoli, naho kwajili ya uyo Kozibi uyo akomagwa mwo lupisi lwo unyonge udya wiihile uko Peoli."