1 Mwo mwezi wa nk'hongo aho Wazilaili weze walawe mwe isi ya Misili. Zumbe alongaga na Musa ukwo kwo mnima wa Sinai. Akamgamba, 2 "Waizilaeli waungwa watoze dizuwa dye kinyemi dye Pasaka viligane no lupisi lwiikigwe. 3 Neinde mwe dizuwa dya mlongo na kane mwo mwezi uuno. Nawatende ivo umwo mwalagulo viligane ne miko na ivo wasigiilwe." 4 Ivo Musa awagambaga want'hu kugamba waungwa kudikumbukila dizuwa idyo dye kinyemi dye Pasaka, mwalagulo mwe dizuwa dya mlongo na kane. 5 Ivo wadyaga Pasaka mwe dizuwa dya mlongo na kane dyo mwezi wa nk'hongo ukwo kwedijangwa dya Sinai. Waizilaili wadamanyaga yose enga ivo Zumbe amsigiilaga Musa.

6 Mna want'hu wamwenga wandaga hawadahaga kudya dizuwa dye kinyemi dye Pasaka kwaviya wakegelaga usavu kwa kutoza kimba, awo wawabasaga Musa na Haluni 7 niyo wawagamba, "Suwe kiwasavu kwaviya nekitoza kimba, mna nii chalemezwa kunda hamwenga na Waizilaili watuhu mwo kumlavila Zumbe malavo yakwe mwe dizuwa diya diikigwe?"

8 Musa niyo awahitula, "Gojeni mpaka aho Zumbe naanigambile cho kudamanya mwa nyuwe."

9 Ivi nivo Zumbe amhitulaga Musa, 10 "Wagambe Wazilaili, yumwenga ywenyu hegu mwelekwa ywenyu ana kegela usavu kwajili ya kutoza kimba hegu ananda mwo utafi, mna aunga adye Pasaka ya Zumbe, 11 mnt'hu enga uyo aungwa kudamanya ivo uneva unomboka mwezi umwenga, mwalagulo wa mlongo na kane mwo mwezi wa kaidi. Naadye Pasaka iyo ne mikate heigeligwe ugwadu hamwenga na mboga zisungu za mani. 12 Wasekusigaza nk'hande yoyose mpaka mtondo, naho wasekutula vuha dyodyose dye ngoto ye Pasaka. Nawadye Pasaka vilagane ne zisigilizi zose ze Pasaka. 13 Mna kwa yeyose heedile Pasaka, hamwenga na kugamba kakuka naho handile hale kwo utafi, uyo naapagulwe mwa want'hu wa Wazilaili kwaviya hanilavile malavo yangu kwa lupisi lwiikigwe, uyo naasulumizwe kwajili yo wavu wakwe.

14 "Uneva eyuko mgeni akwikala mwenyu mna aunga adye Pasaka, mnt'hu uyo aungwa atende viligane ne zisigilizi zose ze Pasaka. Kila mnt'hu aungwa kutimila zisigilizi iziya ze Pasaka, akanda mgeni hegu mkaya."

15 Mwe dizuwa diya Dihema Dikukile dyakimagwa, vunde dyadigubikaga idyo Dihema. Umwo nekilo vunde idyo nedinda enga moto mpaka mtondo. 16 Ivo nivo vandaga mwa mazuwa yose, divunde dyagubikaga Dihema Dikukile msi na kilo, naho dyaonekaga kunda enga moto aho nekilo. 17 Kila aho divunde nedikenulwa kulanga ye Dihema, Waizilaeli nawo wazamizaga ink'hambi na kugenda kuika nk'hambi hant'hu hatuhu aho dyakimaga idivunde idyo. 18 Kwa sigilizi ya Zumbe Waizilaeli watambaga, naho wakimaga ink'hambi kwa sigilizi ya Zumbe. Lupisi lwose aho divunde dyandaga halanga he Dihema Dikukile, Waizilaeli wekalaga he nk'hambi. 19 Uneva divunde dyekalisaga halanga ya Dihema Dikukile, Waizilaeli nawo watimila ivo Zumbe aungaga, hawadahaga kuisamiza ink'hambi. 20 Hamwenga aha divunde dyekalaga kwa lupisi lugihi viligane na ivo Zumbe aungaga, ivo want'hu nawo wekalaga kwa mazuwa mageke viligane na ivo Zumbe asiigile. 21 Mwo lupisi lutuhu divunde dyekalaga halanga he Dihema Dikukile kilo chose mpaka mtondo iviya dikenulwa mtondo Waizilaeli nawo wenukaga. Inde nomsi hegu nekilo lupisi lwolwose aho divunde nedinukile woho nawo waungwa kwinuka. 22 Hata uneva divunde nedigubike Dihema Dikukile kwa mazuwa maidi hegu mwezi umwenga hegu lupisi lutali, Waizilaeli waungagwa kwikala aho he nk'hambi haheina kuhalawa, mna divunde dikeza kwinuka woho nawo waungwa kusama. 23 Wakimaga nk'hambi naho watambaga kwa kutimila zisigilizi za Zumbe viligane na ivo amsigiilaga Musa.