1 Zumbe amgambaga Musa, 2 "Mgambile Haluni kugamba umwo akaika vimuli mfungate mwe vinala, avidongeleke vidahe kuzangaza kulongole ye kinala icho." 3 Haluni adamanyaga enga ivo asigiilagwa, avidongelekaga ivo vinala vileke vizangaze kulongole ye kinala enga ivo Zumbe amsigiilaga Musa. 4 Ivi nivo chadamanyagwa kinala icho che vimuli. Kulawa kulanga mpaka hasi chadamanyagwa kwa zahabu isanigwe viligane na ivo Zumbe amsigiilaga Musa.

5 Naho Zumbe amgambaga Musa, 6 "Uwapagule Walawi mwa Wazilaili, naho uwakukize. 7 Ivi nivo nouwakukize. Uwamyagile mazi yo kukukizila akajika uwagambe wakemoge mwili wose na kufigisa zisuke zawe, ivo nawande wakuka. 8 Naho nawaguhe njeku imwenga hamwenga na malavo yakwe yo unga udinyike uhanganywe na mavuta, naho nawaguhe njeku nt'huhu kwajili ya malavo ya kuusila wavu. 9 Akajika nouwalete Walawi he Dihema Dikukile naho uwaduganye waizilaeli. 10 Umwo Walawi wakanda ha Zumbe, Waizilaeli nawawageleke Walawi mikono mwe mitwi yawe, 11 akajika Haluni naawaike awo Walawi ha Zumbe wakenula mikono yawe enga malavo ya kwinulwa vileke wande wandima wangu. 12 Ivo Walawi nawageleke mikono yawe mwe mitwi ye zinjeku izo. Njeku imwenga nowiilave kunda malavo yo kuusa wavu, int'huhu nayo neinde malavo yo kokwa pele ayo yakulavigwa kwangu, kwaajili ya kuwakukiza Walawi na kuwatenda waivane na Zumbe.

13 "Akajika nouwakimalise Walawi ha Haluni na wanawe, niyo wawaika hangu kunda enga malavo ya kwinulwa kwa Zumbe. 14 Ivi nivo nouwapagule Walawi mwa Wazilaili watuhu, naivo Walawi nawande wangu. 15 Aho ukabinda kuwakukiza na kuwalava enga malavo ya kwinulwa, nawande wazumilwa mwo kudamanya ndima ze Dihema Dikukile. 16 Awo nawapagulwa wandilise wangu hant'hu ha nt'hulasasu wa Wazilaili. 17 Kwa viya nt'hulasasu wose mwa Wazilaili wangu, want'hu na makala, kwa viya nawatendaga wande wakukile kwajili yangu umwo nawakomaga nt'hula sasu wose mwe isi ya Misili. 18 Haluse hiwaguha Walawi hant'hu ha nt'hulasasu we kigosi mwa Wazilaili, 19 naho himwink'ha Haluni na wanawe kunda geleko kulawa mwa Wazilaili, vileke wadamanye ndima ze Dihema Dikukile kwaajili ya Waizilaeli no kuwatenda waivane na Zumbe vileke wanase kukomwa umwo wakahasogeela aho Hant'hu Hakukile." 20 Ivo Musa na Halunii na want'hu wose wa Izilaeli wawaikaga Walawi kwa Zumbe enga ivo Zumbe amsigiilaga Musa. 21 Walawi wakekukizaga wavu wawe na kufigisa suke zawe. Haluni awalavaga kunda malavo ha Zumbe, ivo Haluni awenulaga mikono yawe kulanga na kuwaika kwa Zumbe kunda enga malavo ya kwinulwa, na kuwakukiza na kuwavuza kwa Zumbe. 22 Yakajika ayo, Walawi wagendaga kudamanya ndima ze Dihema Dikukile wakalongozwa ni Haluni na wanawe viligane na ivo Zumbe amsigiilaga Musa.

23 Naho Zumbe amgambaga Musa, 24 "Ino niyo isigilizi kwa Walawi wakuungwa kuitimila. Nawaungwe kudamanya ndima ze Dihema Dikukile kukongela wata miaka milongo miidi na mishano, 25 naho naahumule undima wakwe akanda na miaka milongo mishano. 26 Mna wadaha kuwalangiliza wanduguzawe wakadamanya ndima ze Dihema Dikukile, mna woho wenye wasekudamanya ndima yoyose. Ivi nivo nouwapangile ndima Walawi."