1 Zumbe alongaga na Musa mwe zint'hindiga za Moabu, hagihi no mto Yolidani uko Yeliko, akamgamba, 2 "Wagambile Waizilaeli, wawenk'he Walawi mizi ya kwikala na madimilo mnk'handa mwe mizi iyo. 3 Mizi iyo neinde yawe, woho nawo nawekale uumwo naho madimilo nayande kwaajili ye mifugwa yawe na makala yawe matuhu. 4 Madimilo mkuunga muwenk'he Walawi mnk'handa mwe mizi nayande na uhale wa nk'hacho magana mane na milongo mishano nt'hendelo zose kulawa kwe digomela dye mizi iyo. 5 Naivo elo madimilo ayo nayande nk'hacho magana kenda nt'hendelo zose zo mzi, mzi yenye ukanda hagati. Ayo nayande madimilo yawe mnk'hada mwe mizi yawe. 6 Nomuwenk'he Walawi mizi mtandatu ya kunyilikila, ya mnt'hu amkomile miyawe haheina kumkambila. Kwa kongezela muwenk'he mizi mituhu milongo mine na miidi. 7 Kwa hamwenga mizi yose mkuungwa kuwenk'ha Walawi ikanda ni hamwenga no madimilo neinde milongo mine na mnane. 8 Uwazilo we mizi mkuunga muwenk'he Walawi mwo ukipe wa Waizilaeli, nomuwenk'he viligne no ukulu hegu udodo we dikabila dyawe. Kabila kulu nedilave mizi mingi, kabila dodo nedilave mizi migeke. Kila kabila dya Izilaeli nedilave mizi yakwe kwa Walawi viligane na hant'hu aho nedink'higwe kunda ukipe."

9 Naho Zumbe agambaga Musa, 10 Wagambe Waizilaeli, "Umwo mkeza komboka mto Yolodani na kwingila isi ya Kanaani, 11 nomsagule mizi ya kunyilikila mnt'hu uyo akudaha kuhona uneva kamkoma miyawe haheina kumkambila. 12 Mizi iyo neinde hant'hu hakunyilikila ho utondowazi vileke mkomi uyo asekukomwa na mta kulihiza akanda akei kusengelwa ha want'hu. 13 Naho mizi iyo ya kunyilikila nomuwenk'he neinde mizi mtandatu. 14 Mwe mizi iyo mtandatu nomuike, mitatu inde ng'ambu ya mto Yolodani, mitatu nayo inde mwe isi ya Kanaani. 15 Imizi ino mtandatu neinde ni unyilikilo wa Waizilaeli na watakwiza wa mazuwa yose hegu wa lupisi du wakwikala hamwenga nawo, kugamba yeyose ukumkoma mnt'hu kwa kwitukila adahe kunyilikila uukwo.

16 "Mna uneva mnt'hu anamtoa miyawe na kilama niyo atoigwe abanika, mnt'hu uyo mkomi nae akomwe. 17 Mnt'hu yeyose anamtoa iwe miyawe niyo abanika mnt'hu mkomi uyo naye, akomwe.

18 "Mna uneva anamtowa kwa kint'hu cha ziti niyo miyawe abanika, mnt'hu uyo mkomi, nae akomwe. 19 Wandagu wa hagihi wa mnt'hu akomigwe nawalihize umwo wanadugana no mkomi, nawamkome.

20 "Hata ivo, uneva mnt'hu amuihia miyawe, niyo amsunk'ha na kumduila kint'hu kwa kinyele, 21 hegu kwa kumtowa no kubanika, ivo mnt'hu uyo amtoile miyawe naye akomigwe. Mndugu ywa hagihi ywa mnt'hu akomigwe aho naadugane na uyo mkomi naye naamkome.

22 "Mna uneva mnt'hu ketukila kamsindika miyawe haheina kumwiihiya, hegu kumduila kint'hu haheina kumkambila, 23 uneva mnt'hu anaduula iwe dikudaha kukoma, niyo akoma mnt'hu mtuhu haheina kumuwona, naho uneva handile mnk'hondo ywakwe hegu hamkambile kumnumiza, 24 ivo, want'hu wa Izilaeli nawalamule mwa uyo mkomi na wandugu wa hagihi wakuunga walihize viligane ne zisigilizi izo. 25 Want'hu wa Izilaeli nawamyokole mnt'hu uyo akomile mwe mikono ya wandugu wo mnt'hu uyo akomigwe na kumvuza mwo mzi wo kunyilikila uko anyilikile. Neekale uuko mpaka mlava nt'hambiko mkulu wo lupisi ulwo asagulwe kwa kuhakwa mavuta yakukile, abanike. 26 Mna yudya akomile anafosa kuse yo mzi anyilikile mwo lupisi ulo lwose, 27 niyo mndugu ywa hagihi wo mnt'hu akomigwe ambwiila kuse ye mihaka yo mzi uwo wa kunyilikila niyo amkoma, uyo haande na masa ya kukoma. 28 Ivo elo mkomi uyo ekale mwo mzi wa kunyilikila mpaka mlava nt'hambiko mkulu abanike, mna mlavant'hambiko mkulu anabanika adaha kuuya kaya. 29 Sigilizi izi nezidamanye ndima mwe vyeleko venyu vose naho hant'hu hohose nomwikale.

30 "Mnt'hu yeyose naamkome mnt'hu, naasengelwe kukomwa kwa uwona wa want'hu waidi hegu kugendeela, mnt'hu yeyose hakudaha kusengelwa kukomwa kwa uwona wa mnt'hu yumwenga. 31 Msekuhokela maliho yoyose kumhonya mkomi apatile masa niyo asengelwa kukomwa, mnt'hu uyo naakomwe. 32 Msekuhokela hegu msekuzumila maliho yoyose kulawa kwa mnt'hu anyilikile kwo mzi wa kunyilikila vileke azumilwe kuuya kwe kaya yakwe uneva mlava nt'hambiko mkulu akei kubanika. 33 Mnadamanya ivo nomnitende miye nisekuizumila isi iyo mkwikala. Kwitika kwa sakame kwagela usavu mwe isi, naho hahana malavo ya kuikukiza isi idamanyilwe ukomi, sakame yo mkomi uyo du niyo neikukize. 34 Msekuigela usavu isi mkwikala, isi iyo miye hwikala mndani mwakwe, kwaviya Miye Zumbe nekala mwa Waizilaeli."