1 Zumbe amgambaga Musa, 2 "Uwagambe Waizilaeli ivi, uneva mgosi hegu mvele naakelise kukeika kwa Zumbe, 3 akeike hale no ukozi, asekunywa divai hegu mp'hombe yoyose idamanywe kwa zabibu hegu kudya zabibu ziivile hegu zinyaile. 4 Mazuwa ayo yose akanda mkilapi asekudya kint'hu chochose kidamanywe kwa zabibu hegu mbeyu za zabibu hegu makoa yakwe.

5 "Mwo lupisi lwose aikile kilapi cho kukeika kwa Zumbe, haamogigwe mpaka ibinde lupisi lwe kilapi chakwe cho kukeika kwa Zumbe. Mnt'hu uyo aungwa azileke zifili zakwe zise kumogwa. 6 Lupisi lwose aikile kilapi cha kukeika kwa Zumbe asekusogeela kimba chochose, 7 kikanda cha ise abanike hegu nine hegu lumbudye hegu nduguye ywa kigosi vileke anase kukegela usavu, kwaviya kiwalo che kilapi cho kukeika kwa Zumbe kimwo mtwi wakwe. 8 Lupisi lwose lwe kilapi cho kukeika kwa Zumbe, yehe naande kakuka.

9 "Uneva mnt'hu anetukila kabanika hagihi na mnt'hu mta kilapi, file za uyo mta kilapi nezigeligwe usavu, naamoge fili zakwe mwe dizuwa dya mfungate kwa kukukizwa kwakwe. 10 Mwe dizuwa dya mnane neegale suwa mbili hegu makinda maidi ya suwa manga kwa mlavant'hambiko he nk'hili ye Dihema Dikukile. 11 Mlavant'hambiko naailave imwenga inde malavo ya kuusa wavu, int'huhu nayo neinde ni malavo ya kokwa kwaviya kadamanya wavu kwa kunda hagihi ne kimba. Naakekukize naho zifili zakwe mwe dizuwa iidyo. 12 Naaike naho kilapi cha kukeika kwa Zumbe kwa mazuwa yakwe ya kukepanga. Mazuwa ayo ya nk'hongo yasekuwazigwa kwaviya fili zakwe zandile zikuka zigeligwa usavu. Naalave dolome dya mwaka umwenga kunda malavo ya masa.

13 "Uno nuwo umwiko wo mwiika kilapi aho lupisi lwake lukasila. Neegalwe kwe nk'hili ye Dihema Dikukile, 14 niyo alava malavo yakwe kwa Zumbe, ndolome ya mwaka umwenga hediina lema dyodyose kwa malavo yo kokwa, naho naalave mwate wa mwaka umwenga howiina lema dyodyose kwa malavo yo kuusila wavu na dolome dimwenga hediina lema dyodyose kwa malavo yo utondowazi. 15 Iviya iviya naalave nt'hangulu ya mikate haigeilwe ugwadu, mikate iyo ya unga idamanywe kwa mavuta na mikate midodo ihakigwe mavuta hamwenga na malavo ya nk'hande na malavo yo kunywa.

16 "Mlavant'hambiko namlavile Zumbe vint'hu vose hamwenga na malavo yakwe yo wavu na malavo yakwe yo kokwa. 17 Namlavile Zumbe nt'hambiko ya ngoto kunda malavo ya utondowazi, naailave hamwenga na nt'hangulu ye mikate haigeilwe ugwadu, naho naalave malavo ya nk'hande na malavo yo kunywa. 18 Mwiika kilapi uyo naamoge zifili zakwe aho he nk'hili ye Dihema Dikukile niyo azoka mwo moto uwo wihasi ye nt'hambiko ikulavigwa kwajili yo utondowazi.

19 "Akajink'ha mlava nt'hambiko naaguhe mkono we ndolome inyemswe hamwenga no mkate umwenga ugeilwe ugwadu, ilaile mwe nt'hangulu na mikate midodo haigeilwe ugwadu. Naamwink'he mta kilapi mwe mikono yakwe, aho eze ibinde kumoga fili zakwe izo andile nazo mwe kuika kilapi. 20 Akajika mlavant'hambiko naavinule vint'hu ivo kunda malavo kwa Zumbe. Vint'hu ivi ni malavo yakukile kwa mlavant'hambiko, vikanda ni hamwenga ne kifua kinulwe ne kiga kilavigwe kunda malavo. Yakajika ayo yose, mta kilapi adaha kunywa divai.

21 "Ino niyo imiko kwa mnt'hu aikile kilapi. Malavo yakwe kwa Mnungu yaligane ne kilapi chakwe, haheina kufanyanya kint'hu chochose kituhu akudaha kulava naadamanye viligane ne kilapi aikile."

22 Zumbe niyo amgamba Musa, 23 "Mgambile Haluni na wanawe, ivi nivo nomuwavikile Waizilaili, muwagambe,

24 ‘Zumbe awavikile na kuwadima,

25 Zumbe awakaule kwa ukise na kuwadamanyila uwedi.

26 Zumbe awalagiseni uwedi wakwe na kuwenk'ha utondowazi.’

27 "Ivi nivo walavant'hambiko nawawavikile Wazilaili, wanadamanya ivo name neniwavikile."