1 Balamu amgambaga Balaki, "Nizengele hant'hu mfungate ha kulavila nt'hambiko naho uniigaile majeku mfungate na ndolome mfungate."

2 Balaki adamanyaga enga ivo Balaamu alongile. Ivo nawalava mnanga ha kila kilingo cho kutambikila, jeku dimwenga na ndolome imwenga. 3 Niyo Balaamu amgamba Balaki, ikala aaha hagihi na malavo yako ya kokwa, miye name niite. Vadahika Zumbe Mnungu naambwilane na miye. Chochose naanilagise nenize hugambile. Ivo, Balaamu niyo aita ekedu kwo lunenengwa lwo lugulu. 4 Mnungu niyo adugana naye. Balaamu naye niyo amgamba Mnungu, "Hiika lumwe hant'hu mfungate ha kulavila nt'hambiko na kulava nt'hambiko ya njeku imwenga na ndolome imwenga mnanga mwe kilingo cho kutambikila." 5 Zumbe niyo amwink'ha Balaamu mbuli za kulonga na kumgamba auye kwa Balaki. 6 Balaamu auyaga na kumbwiila Balaki kakimala ahadya hagihi na malavo yakwe ya kokwa, hamwenga na vilongozi wakulu wose wa Moabu.

7 Uno nuwo ulosi Balaamu awagambile,

"Balaki seuta ywa Moabu kanigala aha

Kulawa Asilia naho kulawa kwe milima ya Ulailo wa zuwa,

‘So uniligitile want'hu wa Yakobo,

So uwakalalize want'hu wa Izilaeli.’

8 Nenimligite vivihi mnt'hu uyo avikilwe ni Mnungu?

Nenimkalalize vivihi uneva Zumbe hamkalalize mnt'hu uyo?

9 Kulawa mwo lunenengwa lwe zinyuwe

Nadaha kukaula kulawa kwe vigulu,

Iyo ni si ikwikala ikedukedu

Wamanya kugamba wavikiliswa kujink'ha si nt'huhu.

10 Niani akudaha kuuwaza wingi wa want'hu wa Yakobo awo awengi enga luvumbi.

Niani akudaha kuufanyanya uwingi wa Waizilaeli.

Miye goja nibanike file ya want'hu wedi,

Goja miye nibanike kwa utondowazi kunda muwagilwa wikazi wangu unde enga uwawe."

11 Niyo Balaki amgamba Balaamu, "Kunitendelai? Hikwigala aha uwaligite wank'hondo wangu, mna weye kuwavikila."

12 Balamu niyo amhitula Balaki, "Miye nenilonge mbuli anink'hile Zumbe."

13 Niyo, Balaki amgamba Balaamu, "Kite hant'hu hatuhu. Aho nouwaone Waizilaeli wamwenga du naho hiyo wose. Naho kulawa aha niligitile want'hu awo." 14 Ivo, Balaki niyo amguha Balamu mwe nt'hindiga kwo mnima wa Sifimu, mwo lunenengwa lwo mnima wa Pisiga. Aho niyo azenga hant'hu mfungate ha kulavila nt'hambiko na kulava nt'hambiko ya njeku imwenga na ndolome imwenga mwe kila kilingo cho kutambikila.

15 Balaamu niyo amgamba Balaki, "Ikala aha hagihi na malavo yako ya kokwa umo miye haita kudya nga'mbu habwiilane na Zumbe."

16 Zumbe niyo adugana na Balamu niyo amgambila icho naalonge, niyo amgamba auye kwa Balaki. 17 Ivo Balaamu niyo auya, na kumbwila Balaki kakimala hagihi na malavo ya kokwa hamwenga na wandima wose wa Moabu. Balaki niyo amuuza, "Zumbe kakugambilai?" 18 Ivi nivo Balaamu akemaga akagamba.

"Balaki mwana Zipola so

Unitegeleze weye mwana Zipola

19 Mnungu hiyo enga mnt'hu, vikuleka alonge lulimi.

Naho hiyo enga mnt'hu, ahitule zifanyanyi zakwe.

Uneva analonga mbuli yakwe haidamanye

Uneva kaditambula naaidamanye

20 Kaula miye hisigiilwa nivikile,

Kavikila name hikudaha kuhitula.

21 Zumbe haone uwihi kwa wana Yakobo.

Naho haone wavu kwa awo Wazilaili

Zumbe ehamwenga nawo.

Naho nawalonge kugamba yehe Seuta ywawe.

22 Mnungu niye awalavile Misili.

Naho awatowanila enga jeku dya mbogo.

23 Ikindedi hauhali usai nompate Yakobo,

hegu uganga ukuunga uwapate Waizilaili.

Haluse nawalonge zimbuli za Yakobo na Izilaeli.

‘Kaula zimbuli adamanye Mnungu!’

24 Kaula! Want'hu wakump'huka enga simba vele,

naho wakump'huka enga simba.

Heigone hasi mpaka idye ukala wakwe no kunywa sakame yawe awo iwakomile."

25 Niho Balaki akamgamba Balaamu, "Ivo usekuwaligita naho usekuwavikila!"

26 Mna Balaam niyo amhitula Balaki, "Togola, hikugambile kugamba icho naalonge Zumbe nicho nenidamanye?"

27 Balaki niyo amgamba Balaamu, "So, nohwigale hant'hu hatuhu. Vadahika Mnungu naazumile uniligitile want'hu awo." 28 Ivo, Balaki amguhaga Balaam niyo waitanya mpaka kwo lunenengwa lwo lugulu lwa Peoli, aho mnt'hu akudaha kuona kwe jangwa. 29 Balamu niyo amgamba Balaki, "Nizengele hant'hu mfungate ha kulavila nt'hambiko aha, uniikile njeku mfungate na ndolome mfungate." 30 Balaki niyo adamanya enga ivo asigiilwe ni Balamu, niyo alava mwa kila kilingo chokutambikila, njeku imwenga na ndolome imwenga.