1 Akajika Miliamu na Haluni wakongaga kumhiga Musa kwaviya amlombaga mvele ywa Kikushi, 2 wakagamba, "Zumbe alongaga na Musa ekedu? halongile na suwe naswe?" Zumbe awevaga kiya walongaga. 3 Musa mwenye andaga mnt'hu mjalamu kujink'ha want'hu wose wandaga mwe si.

4 Aaho niyo Zumbe awagamba Musa na Haluni na Miliamu, "Nawaungani nyuwe wose watatu mwize kwe Dihema Dikukile." Ivo wose watatu waitaga kwe Dihema. 5 Akajika Zumbe niyo aseela mwo mkola we divunde, akimalaga he nk'hili ye Dihema Dikukile niyo awetanga Haluni na Miliamu nawo wose waidi wezaga kulongole. 6 Zumbe niyo awagamba, "Tegelezeni iki hulonga, umwo mlotezi akanda mwenyu, Miye mwenye namanyika kwakwe mwa maona na kulonga naye mwe zisozi. 7 Mna hivo ivo mwa Musa mndima ywangu, yehe ni mhuilwa ekedu naho himwink'ha ndima ya kuwakaula want'hu wangu Waizilaeli. 8 Miye nalonga na yehe mnomo kwa mnomo naho meso yakwe yaniona ivo nili, mwadaha vivihi kumhiga Musa mndima ywangu?"

9 Aaho Zumbe awaihiyaga vihile niyo ahalawa, 10 divunde dyahalawaga he Dihema, aaho Miliamu aonekaga kunda na maine mwe nk'handa yakwe. Haluni eze ahituke na kumkaula Miliamu niyo eheelwa kuona Miliamu ana maine ya nk'handa naho nk'handa yakwe yang'alaga mbee. 11 Niyo Haluni amwiila Musa akamgamba, "Mkulu, usekukisulumiza kwo wavu uno kidamanye kwa uhezi wetu. 12 Usekumtenda Miliamu ande enga mwana elekwe akanda kabanika naho nt'hili yo mwili wakwe ububutwa."

13 Musa amwiilaga Zumbe akamgamba, "Zumbe! nakulombeza umhonye!"

14 Zumbe niyo amhitula Musa, "Uneva ise amtweelega mate mwo uso kwa kumkanya kwaviya kadamanya wiihi, hegu hengile soni kwa mazuwa mfungate? Haluse mguluseni mwe nk'hambi ekale kuse kwa mazuwa mfungate, akajika naazumilwe kuuya kwe nk'hambi." 15 Ivo wamgulusaga mwe nk'hambi kwa mazuwa mfungate, naho want'hu awo hawagendeelaga ne nt'hambo mpaka aho Miliamu eze avuzigwe kwe nk'hambi. 16 Want'hu awo weze wahalawe aho wakonganga utafi kulawa Haselosi, niyo wakukima nk'hambi mwe dijangwa dya Palani.