1 Ivi nivo vyeleko va Haluni na Musa mwo lupisi ludya Zumbe eze alonge na Musa mo Mnima Sinai. 2 Aya nayo mazina ya wana Haluni na vyeleko vakwe. Nadabu nt'hulasasu na Abihu na Eleazali na Isamali. 3 Niyo wakukizwa na kuikwa lumwe mwo undima wo ulava nt'hambiko. 4 Mna Nadabu na Abihu wabanikaga umwo wamlavilaga Zumbe Mnungu moto houmwelele uko kwe dijangwa dya Sinai. Awo wandaga hawana wana ivo Eleazali na Isamali wadamanyaga ndima ya ulava nt'hambiko mwo ugima wa tati yawe Haluni.

5 Akajika Zumbe niyo amgamba Musa, 6 "Wegale Walawi kwa mlava nt'hambiko Haluni vileke wande wandima wakwe. 7 Nawamdamanyile ndima Haluni na Waizilaeli hamwenga na ha want'hu wose aho wakudamanyila undima he Dihema Dikukile. 8 Nawande wakaulizi we vyombo vose ve Dihema Dikukile na kuwambiza Waizilaeli umwo wakadamanya ndima zawe Hant'hu Hakukile. 9 Ndima wenk'higwe Walawi ni kunda wambizi wa Haluni na wanawe awo walava nt'hambiko walavigwe mwa Waizilaeli kwajili ya kuwadamanyila ndima. 10 Uwasagule Haluni na wanawe vileke wadamanye ndima ya ulavant'hambiko. Mnt'hu yeyose akuunga adisogeele Dihema Dikukile naakomwe."

11 Niyo Zumbe amgamba Musa, 12 "Ivi haluse hiwasagula Walawi mwe Izilaeli yose, kila nt'hulasasu ywe kilume naelekwe mwe mp'huga ya Izilaeli, Walawi awo nawande wangu, 13 kwaviya kila nt'hulasasu mwe Izilaeli naande ywangu. Mwo lupisi ludya nize niwakome nt'hulasasu wose mwe isi ya Misili niyo wakukizwa kila nt'hulasasu mwe Izilaeli, naho kila nt'hulasasu ywa mnt'hu hegu mifugwa yawe naande ywangu. Ni miye Zumbe."

14 Zumbe alongaga na Musa mwe dijangwa dya Sinai akamgamba, 15 "Wana wa Lawi wose wawazigwe viligane na zink'holo zawe ne zimp'huga zawe, kila mwana ywa kilume kukongela mwezi umwenga na kugendeela." 16 Ivo niyo wawazigwa ni Musa enga ivo Zumbe asigiile.

17 Awa nawo wandaga wana wa Lawi, Gelishoni, Kohasi na Melali. 18 Aya nayo mazina ya wana wa Gelishoni viligane ne zimp'huga zawe, Libini na Shimei. 19 Wana wa Kohasi viligane ne zimp'huga zawe ni Amlani, Izihali, Hebuloni na Uzieli. 20 Wana wa Melali viligane ne zink'holo zawe ni Mahili na Mushi. Awa nawo welekwa wa Walawi viligane ne zink'holo zawe.

21 Walibuni na Washimei walawa kwo lukolo lwa Gelishoni. 22 Uwazilo wawe viligane na ivo wawazigwe wagosi kukongela mwezi umwenga na kugendeela wandaga alufu mfungate na magana mashano. 7,500 23 Zink'holo za Wagelishoni zaungagwa kuika nk'hambi kwe nt'hendelo ya ulailo wa zuwa kunyuma ye Dihema Dikukile. 24 Eliyasafu mwana Laeli andaga niye mkulu ywo lukolo lwa Wagelishoni. 25 Ndima za Wagelishoni zandaga ni ukaulizi we Dihema Dikukile hamwenga ne ngubiko yakwe hamwenga ne dipazia ne nk'hili ye Dihema Dikukile, 26 mapazia yo uwa uzunguluke Dihema Dikukile na hant'hu ho kulavila nt'hambiko ne dipazia dye nk'hili dyo uwa ne zisigi zakwe.

27 Kohasi niye andaga ichotoko che zink'holo za Waamlani na Waishalina na Wahebloni na Wauzieli, awo nawo wandile nk'holo za Wakohasi. 28 Viligane no uwazilo wa wagosi wose kukongela mwezi umwenga na kugendeela wandaga alufu mnane na magana mtandatu, 8,600 awo nawo wadaga wandima wa Hant'hu Hakukile. 29 Zink'holo za wana Kohasi neziungwa ziike nk'hambi zawe kwe nt'hendelo ya Kusini ya Hant'hu Hakukile, 30 Elisafani naye akanda niye mkulu ywe zink'holo za Wakohasi. 31 Awo nawo wandaga wandima yo ukaulizi we Disanduku dye Ndagano ne meza ne kinala che vimuli na hant'hu ho kulavila nt'hambiko hakufunk'hizila ubani ne vint'hu vose vo undima wo ulava nt'hambiko Hant'hu Hakukile ne dipazia dikupanga hant'hu hakukile na hakukise. Undima wose uwo wandaga ni wawe.

32 Eleazali mwana Haluni mlava nt'hambiko aikagwa kunda mkulu mwa wakulu wa Walawi kunda mnyamp'hala mwa wandima wose wa Hant'hu Hakukile.

33 Melali niye andaga ichotoko che zink'holo za Wamahili na Wamushi awo nawo wandile nk'holo za Melali. 34 Uwazilo we zink'holo za Melali viligane no uwazilo wa wagosi wose kukongela mwezi umwenga na kugendeela wandaga want'hu alufu mtandatu na magana maidi. 6,200 35 Mkulu wo lukolo lwa Melali andaga ni Suliali mwana Abihaili. Want'hu awa waungagwa waike nk'hambi zawe mwe nt'hendelo ya kaskazini ye Dihema Dikukile. 36 Awa nawo wandaga wandima wo ukaulizi we zimbao ze Dihema Dikukile ne mizengo yakwe ne visimiko vakwe ne vihambajengo vakwe vose vikutozeleza Dihema Dikukile. Undima wose we vint'hu ivi nounda wawe. 37 Iviya iviya waungagwa waike mizengo ne visimiko vakwe ne zimambo zakwe ne zisigi zakwe.

38 Musa na Haluni na wana wawe waungagwa kuika nk'hambi yawe kulongole ye Dihema Dikukile kwe nt'hendelo yo ulailo wa zuwa. Undima wawe wandaga kuwambiza Waizilaeli kwa dyodyose nawakadiunga aho Hant'hu Hakukile. Mnt'hu yeyose naasogeele naakomwe. 39 Uwazilo wa Walawi viligane ne zink'holo zawe wagosi wawazagwa kukongela mwezi umwenga na kugendeela, awo Musa na Haluni wawazaga kwa sigilizi ya Zumbe, wandaga want'hu alufu milongo miidi na maidi. 22,000

40 Zumbe amgambaga Musa, "Wawaze nt'hula sasu we kilume wa mwezi umwenga na kugendeela niyo wawandika mazina yawe. 41 Unizaguile miye Zumbe walawi wa nt'hulasasu mwa Wazilaili na mifugwa yose ya Walawi nayo ikimale mwa nt'hulasasu ye mifugwa ya Wazilaili." 42 Ivo Musa awawazaga nt'hulasasu wose wa Wazilaili enga ivo Zumbe amsigiilaga. 43 Uwazilo wa nt'hulasasu wose we kilume enga ivo wawazigwe na mazina yawe, kukongela mwezi umwenga na kugendeela, wandaga alufu milongo miidi na magana maidi na milongo mfungate na nt'hatu. 22,273

44 Zumbe Mnungu amgambaga Musa, 45 "Niikile Walawi wose wande nt'hulasasu mwa Wazilaili. Naho uniikile welekwa wa nk'hongo we mifugwa yose ya Walawi mwa welekwa wa nk'hongo we mifugwa ya Wazilaili. Ni miye Zumbe. 46 Mna kwaviya weyuko nt'hula sasu wengi kujink'ha Walawi awo wasump'huule want'hu magana maidi na milongo mfungate na nt'hatu awo waungwa wakombolwe kulawa kwangu, 47 nauhokele kwa kila mgosi matundu shekeli shano, viligane ne kihimo kiikigwe cha hant'hu Hakukile, 48 na matundu ayo yo kuwakomboela wadya Wazilaili wasump'huule nouyenk'hize kwa Haluni na wanawe." 49 Ivo Musa aduganyaga matundu yo ukombola kulawa kwa awo wasump'hulaga mwo uwazilo wakombolwe ni walawi, 50 ahokelaga kulawa kwa nt'hulasasu wa Waizilaeli. Ahokelaga matundu magana mlongo na magana matatu na milongo mtandatu na shano 1,365 viligane ne kihimo cha hant'hu hakukile, 51 niyo Musa awenk'ha Haluni na wanawe yadya matundu ya maliho enga ivo Zumbe Mnungu amgambaga adamanye.