1 Zuwa dimwenga Kola mwana Ishali, wo lukolo lwa Kohasi alawile mwe dikabila dya Walawi wakelungaga na want'hu watuhu watatu wo dikabila dya Lubeni na Dasani na Abilamu, wana Eliyabu na Oni mwana Pelesi, 2 wose awo waivanaga na vilongozi wamanyikise magana maidi na milongo mishano wasagulwe ni Waizilaeli, niyo wamlemela Musa. 3 Wakelungaga wawahige Musa na Haluni na kuwagamba, "Nyuwe mtendesa, Waizilaeli wose wakuka kwa Zumbe naho ehamwenga na suwe chose. Mna uwagilwa wani vikuleka mwaketenda mazumbe mwa want'hu wose wa Zumbe?"

4 Musa eze eve mbuli iyo niyo afika madi na kufunamiza mtwi hasi. 5 Niyo amgamba Kola na want'hu wakwe, "Luvi mtondo Zumbe naakilagise ni ani akuunga ande ywakwe naho ni ani andile kakuka. Uyo akuunga amsagule niye akudaha kunda ho undiilo wakwe. 6 Elo damanyeni ivi, luvi mtondo weye hamwenga na want'hu wako guheni vihungu, 7 mgele nk'hala za moto na ubani mnanga mwakwe niyo mwavigala ha Zumbe. Akajika namuone niani akuunga asagulwe ni Zumbe. Watendesei nyuwe Walawi!"

8 Musa amgambaga Kola, "Tegelezani nyuwe Walawi! 9 Haluse mwaona ni mbuli ndodo kwenyu kugamba Mnungu ywa Izilaeli awasagulaga nyuwe mwa Waizilaeli wose vileke mdahe kuita hagihi ne Dihema dya Zumbe na kunda wandima kwaajili ya Waizilaeli wose? 10 Kawegalani nyuwe na weenyu Walawi kunda hagihi na yehe, mna haluse mwauunga undima wo ulavant'hambiko nawo! 11 Hiyo Haluni du akulabiilwa, weye hamwenga na weyao ni kindedi mwamlabiila Zumbe."

12 Musa niyo egala ulosi kwa Datani na Abilamu wana Eliyabu vileke wetangwe mna woho wagambaga, "Suwe hekize! 13 Elo, mbuli ndodo kugamba kakilava mwe isi ya Misili iyo ina sanga yedi iwagilwe kulima na udimi vileke eze akikome mwe nyika? Naho aketenda niye mkulu ywetu! 14 Hamwenga na ayo yose hukigale mwe isi iyo ina sanga yedi ikuwagilwa kulima na udimi naho hukink'hile ukipe we nk'honde ya mizabibu. Wafanyanya kugamba nouwatende want'hu awa kunda mant'hunt'hu? Hekize!"

15 Musa afiilisaga maya niyo amgamba Zumbe, "Usekuzumila malavo ya want'hu awo. Miye higuile mp'hunda ya mnt'hu yeyose naho hahana yeyose nimtendele vihile!"

16 Musa niyo amgamba Kola, "Luvi wize hamwenga na want'hu wako ha Zumbe. Haluni naye naande aaho. 17 Kila yumwenga ywenyu naguhe chetezo chakwe na kugela ubani akajika neegale ha Zumbe, vose ivo nevinde vyetezo magana maidi na milongo mishano hata Haluni naye neegale chetezo chakwe."

18 Ivo kila yumwenga niyo aguha chetezo chakwe, niyo wagela nk'hala za moto na ubani niyo wagenda kukimala he nk'hili ye Dihema Dikukile, enga ivo watendile Musa na Haluni. 19 Kola niyo aduganya mdugano wose wakimalaga ha Musa na Haluni aho he nk'hili ye Dihema Dikukile. Niyo ung'azi wa Zumbe wawalaila want'hu wose! 20 Aho Zumbe niyo awagamba Musa na Haluni, 21 "Kepaguleni mwa want'hu awo vileke niwakome haluse ivi."

22 Mna Musa na Haluni wafikaga madi na kufunamiza mitwi yawe hasi niyo wagamba, "Weye Mnungu ywa viumbwa vose, uneva mnt'hu yumwenga kakutendela wavu nouwafiile maya want'hu wose?"

23 Zumbe niyo amgamba Musa, 24 "Wagambe want'hu wahalawe hagihi na mahema ya Kola, Dasani na Abilamu."

25 Ivo Musa akatimilwa na vilongozi wa Izilaeli aitaga kwa Dasani na Abilamu. 26 Eze abule niyo awagamba want'hu, "Halaweni mwa mahema ya want'hu waihiile naho msekutoza kint'hu chochose cheivo nomkomwe hamwenga nawo kwajili yo wavu wawe." 27 Ivo niyo want'hu awo wahalawa aho hagihi ne zikaya za Kola na Dasani na Abilamu.

Dasani na Abilamu wafosaga kuse niyo wakimala kwe zink'hili za mahema yawe wakanda na wavele wawe na wana wawe na wana wadodo. 28 Musa awagambaga want'hu, "Ivi nivo nommanye kugamba Zumbe kanisigiila nidamanye ndima zose, kwaviya miye hikudamanya kwa kuunga kwangu mwenye. 29 Uneva want'hu awa wanabanika enga ivo wakubanika want'hu watuhu, nommanye kugamba Zumbe Mnungu hanitumile. 30 Mna uneva Zumbe Mnungu anadamanya mbuli heinati ilaile, uneva sanga inagubuka na kuwamela want'hu kwa hamwenga na kila kint'hu, niyo waita kwe isi ya want'hu wabanike iivo wakanda wagima, niho nommanye kugamba want'hu awa wamlemela Zumbe."

31 Ivo aaho eze ibinde kulonga mbuli zose, sanga hadya wakimale Dasani na Abilamu yagubukaga, 32 sanga yagubukaga niyo wahubugila pele want'hu ne zinyumba zawe na wose wandaga hamwenga na Kola na vose wandaga navo. 33 Ivo woho hamwenga na vose ivo vandaga vawe waseelaga uko wakwikala want'hu wabanike wakanda ne vint'hu vawe vose. sanga yawagubikaga, hawaonekaga naho mwo mdugano wa Waizilaeli. 34 Want'hu wose wandaga hagihi nawo weze weve ndilo zawe wanyilikaga wakagamba, "Kinyilikeni! seka sanga ina kimele naswe!" 35 Akajika Zumbe Mnungu egalaga moto niyo woka wadya want'hu magana maidi na milongo mishano wadya wagendaga koka ubani kwe Dihema Dikukile.

36 Ivo Zumbe alongaga na Musa niyo amgamba, 37 "Mgambe Eliyazali mwana Haluni mlavant'hambiko, avilave viya vihungu va kokela uabani hale na wadya want'hu wokigwe wasigale aho, uzipakuile hant'hu hatuhu izink'hala zimwe vihungu va kokela ubani kwaviya ivo vihungu vikuka. 38 Vihungu ivo vikuka kwaviya want'hu awa wavigalaga hant'hu ho kulavila nt'hambiko ha Zumbe. Elo guheni vihungu vo kokela ubani va want'hu awo wakomigwe kwajili ya wavu wawe, visanigwe vileke vinde ngubiko ya hant'hu ho kulavila nt'hambiko. Nedinde kanyo kwa Waizilaeli wose." 39 Ivo Eliyazali mlavant'hambiko aguhaga viya vihungu vo kokela ubani va shaba ivo vigalwe ha Zumbe na wadya want'hu wokigwe, niyo wavisunt'ha kunda ngubiko ye kilingo cho kutambikila. 40 Iki chandaga kilagiso kwa waizilaeli kugamba mnt'hu yeyose hiyo mlava nt'hambiko uyo hi mlukolo ywa Haluni asekuita he kilingo cho kutambikila kwa Zumbe. Anadamanya ivo nasengeelwe enga Kola na weyawe. Yose aya yadamanywagwa enga Zumbe Mnungu ivo amsigiilaga Musa amgambile Eleazali.

41 Zuwa ditimile, Waizilaeli wose wakonga kumlabiila Musa na Haluni wakagamba, "Muwakoma want'hu wamwenga wa Zumbe." 42 Aho want'hu weze wadugane vileke wawahige Musa na Haluni, wahitukilaga kwe Dihema Dikukile niyo waona kugamba vunde dyadigubikaga naho ung'azi wa Zumbe walailaga. 43 Musa na Haluni wagendaga kukimala halongole ye Dihema Dikukile, 44 Zumbe naye niyo amgamba Musa, 45 "Kenege na want'hu awa vileke niwakome haluse ivi!" Mna woho wafikaga madi na kufunamiza mitwi yawe hasi.

Mna woho wafunamizaga mitwi yawe hasi. 46 Musa niyo amgamba Haluni, "Guha kihungu chako ukigele moto na kukiika mnk'handa mwe kilingo cho kutambikila, niyo wagela ubani naho usunguze kuita nacho kwa want'hu na kuwavuza kwa Zumbe. Maya ya Zumbe yase kukimp'huka kwajili yawe, maine ayo yakutisa yakonga." 47 Ivo, Haluni niyo adamanya enga ivo agambilwe ni Musa. Nakaguha kihungu chakwe cho kokela ubani na kugulukila mgati mwa want'hu awo wadugane hamwenga. Eze aone kugamba kunt'ho dikonga, agelaga ubani mwe kihungu na kuwavuza kwa Zumbe want'hu awo, 48 Eze adamanye ivo, dikunt'ho niyo dyakimala, naye akimalaga mgati mwa wabanike na wagima. 49 want'hu wabanikaga wandaga alufu mlongo na kane magana mfungate, haheina kuwaza wadya wabanike mwo uwavu wa Kola. 50 Kunt'ho dize dyajike, Haluni auyaga kwa Musa kwe nk'hili ye Dihema Dikukile.