1 Isi wenk'higwe want'hu we dikabila dya Yuda kwa kutoelwa kula viligane ne nk'holo zawe yabulaga kukongela Edomu kubula kwe dijangwa dya Sini kwo uheelo, nt'hendelo ya Kwa mwenye mzi. 2 Nt'hendelo ya Kwa mwenye mzi mhaka wawe noukongela kwe mp'hembe ya Kwa mwenye mzi na kuheela kwe Bahali yo Munyu, 3 wagendeelaga Kwa mwenye mzi kubula Akalabimu, kwombokela mwe isi ya Sini na kugendeela Kwa mwenye mzi ya Kadeshi Banea. Naho wombokelaga Heziloni kubula Ada niyo wahituka kuhinga Kalika. 4 Naho wombokelaga hagihi na Azimoni niyo watimila akazuto mwo mhaka wa Misili kuhinga kwe bahali ya Meditelania. Uno nuwo nounde mhaka wenyu wa Kwa mwenye mzi ya Yuda.

5 Mhaka wawe kwe nt'hendelo yo ulailo wa zuwa ni bahali yo munyu kubula hadya mto Yolodani ukwingiila kwe bahali. Mhaka wawe kwe nt'hendelo ya mkoma mahanya nowomboka kwe mp'hembe ye bahali yo munyu aho mto Yolodani ukwingiila kwe bahali. 6 Niyo mhaka uwo waita kubula Beti Hogila na kwombokela mkoma mahanya mwe Bati Alaba naho nowiita kubula kwe diiwe dya Bohani mwana Lubeni. 7 Kulawa aho mhaka uwo wagendeelaaga kubula Debili kwe dikolongo dya Akoli, naho wahitulaga kuhinga mkoma mahanya kuita Giligali hagihi ne digundi dya Adumimu Kwa mwenye mzi ya kazuto. Naho mhaka uwo wahingaga kwe zinc'hoko za Enishemeshi niyo waheela Enilogeli. 8 Naho akajika mhaka uwo wombokelaga kwe dikolongo dya Hinomu Kwa mwenye mzi ya kagulu ka Wayebusi, (iyo Yelusalemu). Mhaka uwo naho wahingaga kwo lunenengwa lwa kagulu kwo usweelo wa zuwa we dikolongo dya Hinomu na kuheela kwe dikolongo dya Walefaimu. 9 Kulawa aho, mhaka waitaga kwe zin'choko za Nafitoa niyo waheela kwe mizi ihagihi no Mnima wa Efuloni. Mhaka uwo wahitukaga naho kuhinga Baala, iyo niyo Kiliati Yealimu, 10 uko nako mhaka wahitukaga kulawa Baala kuita Seili, kombokela mnima Yelimu iyo niyo Kesaloni na kugendeela kuseela Beti shemeshi na kwombokela Timna. 11 Mhaka uwo waheelaga kwe ziseleza za kagulu ka mkoma mahanya ya Ekuloni naho niyo mhaka wahituka kuzunguluka Shikeloni, niyo womboka hagihi no mnima wa Baalahi naho wabulaga Yabineeli niyo waheela kwe bahali, 12 ibahali iyo ya Meditelania niyo yandaga mhaka kwe nt'hendelo ya usweelo wa zuwa.

Ino niyo imihaka ya hant'hu wenk'hwagwa want'hu we dikabila dya Yuda viligane ne zink'holo zawe.

13 Kalebi mwana Yefune enk'wagwa hant'hu mwe isi ya Yuda enga ivo Zumbe amsigiilaga Yoshua. Kalebi enk'wagwa mzi wa Aliba. Aba niye andaga babaakwe dya Anaki. 14 Kalebi awagulusaga Waanaki watatu ne zink'holo zawe. Lukolo lwa Sheshai, lukolo lwa Ahimani, na lukolo lwa Talimai awelekwa wa Anaki. 15 Eze alawe Hebuloni akelaga niyo agendaga kuwakump'hukila want'hu nawakekala Debili, mzi uwo wandaga uketangwa Kiliati Sefeli. 16 Kalebi niyo agamba, "Yeyose akuunga amkump'hukile na kumtaha Kiliati Sefeli, nenimloze mwanangu Akisa." 17 Ivo Osinieli mwana Kenazi nduguye dya Kalebi, amkump'hukilaga niyo autaha mzi uwo, Kalebi niyo mloza mwanawe Akisa. 18 Mwe dizuwa dye ndoza Akisa amgambaga uyo mgosiwe alombeze nk'honde kwa Kalebu. Akisa aseelaga kulawa mwe mp'hunda yakwe, Kalebi niyo amuuza waungai? 19 Niyo ahitula, "Nink'he geleko, unink'he hant'hu hana mazi kwaviya Isi unink'hile ni isi inyaile." Ivo Kalebi amwink'haga hant'hu hana nc'hoko za kukenya na mondwaisi.

20 Ino niyo isi wenk'higwe want'hu we dikabila dya Yuda viligane ne zink'holo zawe. 21 Mizi ya kwe nduzinduzi Kwa mwenye mzi ye isi ya Yuda uko Negebu kuhinga kwo mhaka wa Edomu yandaga ni ino: Kabezeeli na Edeli na Yaguli, 22 Kina na Dimona na Adada, 23 Kadeshi na Hazoli na Itinani 24 Zifu na Telemu na Bealoti 25 Hazoli Hadata na Kelioti Heziloni: nuyo Hazoli, 26 Amamu na Shema na Molada, 27 Hasali Gada na Heshimoni na Beti Peleti, 28 Hasali Shuali na Belisheba na Biziotia, 29 Baala na Limu na Ezemu, 30 Elitoladi na Kesili na Holima, 31 Sikilagi na Madimana na Sanisana 32 Lebaoti na Shilihimu na Aini na Limoni: Mizi yose wenk'higwe ni milongo miidi na kenda hamwenga ne zikaya zakwe.

33 Mizi yandaga kwe nt'hindiga yandaga: Eshitaoli na Zola, Ashinahi, 34 Zanoa, Enganimu na Tapua na Enamu 35 Yelimuti na Adulamu na Sokohi na Azeka, 36 Shaalaimu na Aditaimu na Gedela na Gedelataimu: Mizi mlongo na mine hamwenga ne zikaya zakwe.

37 Naho wenk'wagwa mizi ya Zenani na Hadasha na Migidali Gadi, 38 Dileani na Misipa na Yoketi Eli, 39 Lakishi na Bozokati na Egiloni, 40 Kaboni na Lahamamu na Kitilishi, 41 Gedeloshi na Beti Dagoni na Naama na Makeda: Mizi mlongo na mtandatu hamwenga ne zikaya zawe.

42 Iviyaiviya Libina na Eteli na Ashani, 43 Yifuta na Ashina na Nezibu, 44 Keila na Akizibu hamwenga na Malesha: mizi kenda hamwenga ne zikaya zakwe.

45 Naho wenk'wagwa Ekiloni ne mizi yakwe midodo ne zikaya zakwe, 46 ne mizi yose hamwenga ne zikaya zihagihi na Ashidodi na kulawa Ekiloni kubula kwe Bahali ya Meditelania.

47 Ashidodi ne mizi yakwe ne zikaya zakwe, na Gaza ne mizi yakwe ne zikaya zakwe, kubula kwa kazuto ka Misili ne mp'wani ye bahali ya Meditelania.

48 Mwe isi ye vigulu kwandaga ne mizi ya Shamili, Yatili, Soko, 49 Danahi, Kiliati Sana iyo niyo Debili, 50 Anabu na Eshitamoa na Animu, 51 Gosheni na Haloni na Gilo: mizi mlongo na umwenga hamwenga ne zikaya zakwe.

52 Naho wek'wagwa mizi ya Alabu, Duma na Eshani 53 Janimuna Beti Tapua na Afeka, 54 Humta, Kiliat Aliba nuwo Hebuloni hamwenga na Zioli: Mizi kenda hamwenga ne zikaya zawe.

55 Hmwenga ne mizi ya Maoni na Kalimeli na Zifu na Yuta, 56 Yezileeli na Yokedeamu na Zanoa, 57 Kaini na Gibea na Timna: kwa hamwenga mizi mlongo hamwenga ne zikaya zawe.

58 Haluhulina Beti Zuli na Gedoli 59 Maalati na Beti Anoti na Elikoni: Mizi mtamdatu hamwena ne zikaya zakwe.

60 hamwenga ne mizi ya Baali ne mzi wa Laba: mizi miidi hamwenga ne zikaya zakwe.

61 Mizi ya kwe nyika yandaga ni Bet Alaba na Medini na Sekaka, 62 Nibishani na Mzi wa munyu na Agendi. Mizi wenk'wagwa yandaga mtandatu hamwenga ne zikaya zakwe.

63 Mna want'hu wa Yuda hawadahaga kuwagulusa Wayebusi wandaga wakekala Yelusalemu. Wayebusi awo wakei wekala aaho hamwenga na want'hu wa Yuda.