1 Aho Adoni Zedeki seuta ywa Yelusalemu evaga ivo Yoshua autahile mzi wa Ai naho kaibananga pele enga ivo autendele mzi wa Yeliko na seuta ywakwe kautendela iivi mzi wa Ai na seuta ywakwe, na ivo wakaya wa Gobioni waika Ndagano ya utondowazi na Waizilaeli naho kugamba wekala mwawe, 2 yehe na want'hu wakwe wogohesaga kwaviya Gibioni yandaga ni enga mzi una seuta, enga ivo mizi mituhu yandaga na maseuta, naho wandaga mkulu kujink'ha Ai, naho want'hu wakwe nawo wandaga wadahi. 3 Ivo seuta Adoni Zedeki ywa Yelusalemu egalaga ulosi kwa maseuta weyawe, Hohamu seuta ywa Hebuloni na seuta Pilamu ywa Yulimusi, Yafia seuta ywa Lakishi, seuta Debili ywa Egiloni, akawagamba, 4 "Haya soni mnambize kiwatowe Wagibioni kwaviya waika Ndagano ya utondowazi na Yoshua na Waizilaeli." 5 Niho maseuta awo washano wa Waamoli: seuta ywa Yelusalemu na seuta ywa Hebuloni na seuta ywa Yelumusi, na seuta ywa Lakishi na seuta ywa Egiloni, waduganyaga hamwenga mafyo ya watowani wawe niyo waikaga nk'hambi kuuzunguluka mzi uwo niyo waukump'hukila.

6 Want'hu wa Gibioni wegalaga ulosi kwe nk'hambi ya Yoshua uko Giligali wakagamba, "Mkulu use kukileka suwe watumwa wako, usunguze kwiza ukiyokole, uchambize, kwaviya maseuta wose wa Waamoli kulawa mwe isi ye milima waduganya mafyo yawe ya watowani watoane na suwe."

7 Ivo Yoshua na watowani wakwe wose wadahi wakwelaga kuita uko wakalawa Giligali. 8 Zumbe niyo amgamba Yoshua, "Usekogoha kwaviya want'hu awo hiwaika kale mwo udahi wako. Hahali yeyose naakuhume." 9 Ivo Yoshua na watowani wakwe weze wagende na kukwela Gibioni kilo chose kulawa Giligali, aahoaho wawakump'hukilaga Waamoli. 10 Zumbe niyo awagela Waamoli lukeng'ent'ha aho weze waone idifyo dya watowani wa Waizilaeli. Ivo Yoshua na Watowani wa Waizilaeli wawakomesaga uko Gibioni, niyo wawagulusa kwe sila ikuseela Besi Heloni, uko nako wawakomaga kubula Azeka na Makeda. 11 Umwo Waamoli wandaga wakanyilika idifyo dya watowani wa Waizilaeli mwe sila ye seleza kulawa Besi heloni kuita Azeka, Zumbe awakupuilaga fula ya maiwe makulu kulawa kulanga kwe mbingu. Awo wakomwagwa ni fula iyo ya maiwe makulu wandaga wengi kujink'ha awo wakomwagwa kwa mabamba ni difyo dya watowani wa Waizilaeli.

12 Mwe dizuwa Zumbe awenk'haga uhumi Waizilaeli mwa Waamoli, Yoshua alongaga na Zumbe iivi Waizilaeli wakeva,

"We zuwa kimaala aha he isi ya Gibioni,

We mnenge nawe kimaala mwe dikolongo dya Aijaloni."

13 Zuwa niyo dyakimala, mnenge nawo niyo wakimaala kubula aho Izilaeli ilihize kwa wank'hondo wakwe, enga ivo yawandikwagwa mwe Kitabu cha Jashali. Zuwa dyakimalaga mwo ulanga, naho hadyasunguzaga ukuswa. 14 Hadinati dilaile zuwa enga idyo, naho hedilaile naho, Mnungu amzumile mnt'hu enga ivo, Zumbe Mnungu mwenye awatowanilaga Waizilaeli.

15 Yakajike ayo Yoshua ne difyo dyakwe dya watowani wauyaga kwe nk'hambi yawe uko Giligali.

16 Wadya maseuta washano wanyilikaga niyo wagenda kukefisa kwe mp'hanga uko Makeda. 17 Yoshua evaga kugamba maseuta awo washano wakefisa kwe mp'hanga uko Makeda, 18 agambaga, "Tongoloseni maiwe makulu yakasite mingiilo ye mp'hanga, naho mwiike wamizi wawamile, 19 mna nyuwe mse kwikala aho, muwakulumbuze wank'hondo wenyu na kuwatowa kulawa kunyuma msekuwaleka wakengila mwe mizi yawe, kwaviya Zumbe Mnungu ywenyu kawaika mwo udahi wenyu." 20 Yoshua na Waizilaeli wawatowaga na kuwakoma pele, hamwenga na kugamba wamwenga wa wank'hondo awo wahonaga niyo wanyilikila kwe mizi yawe izengelwe magomela niyo wahona. 21 Fyo dyose dya watowani dyauyaga kwa vedi kwe nk'hambi kwa Yoshua uko Makeda.

Mwe isi hakwandaga naho na yeyose alongaga dyodyose diihile kwa Waizilaeli.

22 Yoshua niyo agamba, "Useni maiwe yasitile mingiilo ye zimp'hanga niyo mwawalava awo maseuta washano kulawa kwe mp'hanga niyo mwanigaila." 23 Watendaga iivo niyo wamwigaila Yoshua wadya maseuta washano kulawa kwe mp'hanga, seuta ywa Yelusalemu, seuta ywa Hebloni, seuta ywa Yamusi, seuta ywa Lakishi, na seuta ywa Egiloni. 24 Umwo weze wawegale maseuta awo kwa Yoshua, Yoshua awetangaga wagosi wose wa Izilaeli niyo awagamba wakulu we difyo dya watowani wa awo ezaga nawo, "Soni aha mjatangize zisingo za maseuta awa." Ivo wezaga niyo wazijata zisingo za maseuta awo. 25 Yoshua niyo awagamba, "Msekogoha hegu kunda na kiyangayanga, mtoge naho mnde wadahi kwaviya ivi nivo Zumbe Mnungu akuunga awatendele wank'hondo wenyu wose mkutowana nawo." 26 Niyo Yoshua awakoma na kuwahweleza mwe maziti mashano. Awahwelezaga mwa maziti ayo kubula kisingi. 27 Zuwa dize diswe Yoshua asigiilaga waselezwe kulawa mwa maziti akajika waduulwe kwe mp'hanga kudya wakefisile. Wasitaga na maiwe makulu kwe mingiilo ye mp'hanga iyo, ayo yeaho kubula ivi dielo.

28 Mwe dizuwa idyo autahaga mzi wa Makeda naho amkomaga seuta ywakwe na want'hu wakwe wose haheina kusigaza yeyose. Atendaga ivo kwa seuta ywa Makeda enga ivo amtendaga seuta ywa Yeliko.

29 Akajika Yoshua na Waizilaeli wose wagendaga kulawa Makida na kugenda kuitowa Libna. 30 Naho Zumbe awenk'haga uhumi Waizilaeli mwo mzi uwo na maseuta wakwe, niyo wawakoma pele haheina kusigaza yeyose. Wamtendaga seuta ywakwe enga ivo amtendaga seuta ywa Yeliko.

31 Akajika naho, Yoshua na Waizilaeli wose wagendeelaga kulawa Libina kuita Lakishi. Wauzungulukaga niyo waukump'hukila. 32 Zumbe awenk'haga uhumi Waizilaeli mwo mzi wa Lakishi mwe dizuwa dya kaidi. Wawakomaga want'hu wose wo mzi uwo enga ivo watendile kwo mzi wa Libina.

33 Niho seuta Holamu ywa Gezeli akwelaga vileke awambize want'hu wa Lakishi mna Yoshua amkomaga hamwenga na want'hu wakwe wose, hakwasigale mnt'hu yeyose mgima.

34 Weze walawe Lakishi, Yoshua na Waizilaeli wose wabulaga Egiloni niyo wauzunguluka uwo umzi na kuukump'hukila, 35 niyo wautaha mwe dizuwa iidyo na kuwakoma want'hu wose enga ivo atendile kwo mzi wa Lakishi.

36 Nayo Yoshua hamwenga na Waizilaeli wose, walawaga Egiloni na kubula Hebuloni na kuukump'hukila, 37 niyo wautaha. Wawakomaga want'hu wose hamwenga na seuta ywawe, no mizi yose izunguluke. Hasigaze mnt'hu yeyose kunda mgima. Enga ivo atendile uko Egiloni, waubanangaga na kuwakoma pele want'hu wose mwo mzi uwo.

38 Yoshua hamwenga na Waizilaeli wose wauyaga Debili niyo waukump'hukila. 39 Wautahaga hamwenga na seuta ywakwe ne mizi yakwe yose. Wawakomaga pele want'hu wose mwo mzi uwo hawasigaze mnt'hu yeyose kunda mgima, enga ivo watendile Hebuloni na Libina na seuta ywakwe, nivo atendile uko Debili na seuta ywakwe.

40 Ivo Yoshua atahaga isi yose. Yandaga ni hamwenga ne isi ye vigulu na Negebu na is za nt'hindiga na za seleza na maseuta wawe wose. Hawasigaze mnt'hu yeyose kunda mgima, nawakomigwa wose pele enga ivo asigiile Zumbe Mnungu ywa Izilaeli. 41 Yoshua awahumaga wose mwe nk'hondo iyo imwenga kulawa Kadeshi banea kubula Gaza ne isi yose ya Gosheni kubula Gibioni. 42 Yoshua awahumaga maseuta awa wose ne ziisi zawe kwa lupisi lumwenga kwa viya Zumbe Mnungu ywa Izilaeli naakawatowanila Waizilaeli. 43 Yoshua hamwenga na Waizilaeli wose wauyaga kwe nk'hambi yakwe uko Giligali.