1 Zumbe Mnungu nakawenk'ha utondowazi Waizilaeli wose kwa kuwayokola na wank'hondo wawe nt'hendelo zose kwa lupisi lutali. Mwo lupisi ulwo Yushua nakanda na miaka mingi. 2 Yushua nakawetanga Waizilaeli wose hamwenga na vilongozi na wadala wawe, walamuzi na wakulu, akawagamba, Haluse miye hinda mdala vitendese naho miaka yangu igendesa. 3 Nyuwe muwona mbuli zose Zumbe Mnungu azidamanyile isi zose kwajili yenyu. Mnungu ywenyu niye awatoanile. 4 Kauleni hiwenk'hani kunda ukipe wenyu isi zisigale kutahigwa na ziya ziisi zint'huhu zisigale nizibanange, kulawa mto Yolodani kubula bahali ya Meditelania, kwo usweelo wa zuwa. 5 Zumbe Mnungu ywenyu naawahause na kuwakulumbuze pele mwe isi yawe iivi mkaona, nanywe nomwiikale isi yawe enga viya Zumbe Mnungu ywenyu alagane na nyuwe. 6 Ivo mnde mtogile mwo kutoza yose yawandikwe mwe kitabu cha sigilizi ya Musa, mnase mleke hant'hu hohose. 7 Msekuhangana na want'hu watuhu mwa awo wasigale mwenyu. Msekuitambula milungu yawe hegu mse kukelisila mwe mazina ye milungu yawe, msekuidamanyila ndima naho msekuivika. 8 Mna mnde na Zumbe Mnungu enga ivo mwili dyelo. 9 Kwaviya Zumbe Mnungu kawagulusa iivi mkasinya isi zina want'hu wata ludole naho hahali mnt'hu akudaha kuwahiga nyuwe kubula dyelo. 10 Mnt'hu yumwenga du adaha kuwagulusa wank'hondo alufu, kwaviya Zumbe Mnungu ywenyu niye akuwatowanila enga viya alagane na nyuwe. 11 Ivo, mnde na wengele mwo kumuungisa Zumbe Mnungu wenyu. 12 Uneva mnamleka Zumbe Mnungu na kunda na isi izi zisigale mwa nyuwe, na kulombelana, 13 manyeni kwa kindedi kugamba Zumbe Mnungu ywenyu, haagendele kuwagulusa wank'hondo wenyu iivi mkasinya, mna neinde mtego kwenyu. Nazinde kwenyu zingoda za kuwatoani na miwa ya kuwatungani mwa meso aho mkeza kubanangwa na kulawa mwe isi ino yedi iyo Zumbe Mnungu amink'hileni.

14 "Haluse, lupisi lwangu lwa kubanika lubula. Mna nyuwe nyose mmanya kindedi mwe mioyo yenyu kugamba mwe zimbuli zose izedi izo Zumbe Mnungu alagane na nyuwe, hadihali hata dimwenga hedikint'he. Yose yakint'ha enga ivo alagane. 15 Mna enga ivo Zumbe Mnungu ywenyu akint'hize mbuli zose zedi alagane, nivo naho naadahe kuwegaila uwihi wose kubula awabanange nyose kulawa mwe isi ino iyedi awenk'hileni. 16 Uneva mnaibananga Ndagano ya Mnungu ywenyu iyo awagambile muitoze, naho niyo mwagenda kuidamanyila ndima milungu mituhu na kuivika, maya ya Mnungu nayamkimp'hukileni, naho nyuwe nombanangwe pele kulawa mwe isi ino iyedi."