1 Want'hu we dikabila dya Manase uyo andaga nt'hulasasu ywa Yusufu, naho wenk'wagwa isi kwa kutowa kula. Makili niye nt'hulasasu ywa Manase naho yehe niye ise dya Gileadi. Apangilwagwa kale kwa kutowa kula imizi ya Gileadi na Bashani kwaviya andaga mtowani ywa nk'hodo mta udahi. 2 Ivo upasi uno wandaga ni wa want'hu wasigale wa Manase, zink'holo za Abiezeli, nk'holo za Heleki, nk'holo za Asilieli, nk'holo za Shekemu, nk'holo za Hefeli na nk'holo za Shemida, naho awo wose wandaga ni welekwa wa Manase mwana Yusufu nawo wandaga nawo wakulu we zimp'huga zawe. 3 Mna Selofehadi mwana Hefeli, mwana Geleadi, mwana Makili, mwana Manase, handaga na mwana kilume, yehe andaga na wana kike aawo du, naho awo wana kike wandaga ni, Mahila na Noa na Hogila na Milika na Tiliza. 4 Wanakike awo waitaga kwa Eliyazali mlavant'hambiko, na Yoshua mwana Nuni, ne vilongozi watuhu, niyo wagamba, "Zumbe Munungu amgambaga Musa akipangile naswe isi enga ivo wagosi mwe dikabila dyetu wakupangilwa." Ivo Yoshua awapangilaga isi enga ivo wapangilwe wagosi we dikabila dyawe viligane na ivo Zumbe Mnungu amsigiilaga Musa. 5 Ivo elo Manase apataga kula za hant'hu mlongo kuleka isi za Gileadi na Bashani zi ulailo wa zuwa wa Yolodani, 6 kwaviya wanakike we dikabila dya Manase wapangilwagwa isi enga ivo wapangilwe wagosi we dikabila dyawe. Isi ya Gileadi neinda ya welekwa watuhu wa Manase.

7 Isi ye dikabila dya Manase yakongelaga Asheli kubula Mikimetati ulailo wa zuwa ya Shekemu, umhaka nougendeela Kwa mwenye mzi kubula kwa wakaya wa En Tapua. 8 Isi iyo ya Tapua yandaga ya Manase, mna mzi wa Tapua wandaga kwo mhaka wa Manase wandaga wa welekwa wa Ifulaimu. 9 Naho mhaka waseelaga kubula kwa kazuto ka Kana. Nokunda na mizi yandaga ya Ifulaimu hamwenga na kugamba yandaga mwe isi ya Manase, mna mhaka wa Manase wandaga ni mkoma mahanya ya kazuto, naho niyo waheela kwe bahali ya Meditelania. 10 Kwe nt'hendelo ya Kwa mwenye mzi isi yandaga ya Waifulaimu, Kasikazini nako kwandaga isi ya welekwa wa Manase. Isi ya Manase yabulaga kwe bahali ya Meditelaniani na kuhakana na Asheli kwe nt'hendelo ya mkoma mahanya, Isakali naye kwo ulailo wa zuwa. 11 Uumwo mwa isi ya Waasheli na Waisakali, Wamanase nawenk'higwa mizi ya Beti Sheani na Ibeleamu hamwenga ne zikaya zakwe ne mizi ya Doli na Eni Doli na Taanaki na Megido hamwenga ne zikaya zimnk'handa na imwenga kwa nt'hatu ya Nafati Doli. 12 Hamwenga na ayo welekwa wa Manase hawadahaga kuwagulusa mwe mizi iyo, kwaivo Wakanaani, wegendeelaga kwikala umo. 13 Mna Waizilaeli weze wandilise na udahi wawatigizaga kudamanya ndima Wakanaani mna hawawaguluse wose pele.

14 Welekwa wa Yusufu niyo wamuuza Yoshua, "Nii suwe kukink'ha hant'hu hamwenga du kunda ukipe wetu? Suwe kibindawingi, naho kivikiliswa ni Zumbe."

15 Yoshua awahitulaga akawagamba, "Uneva isi iyo ye vigulu ya Ifulaimu indilisa ndodo kwenyu, kweleni kwe mbago niyo mwakefyekela hant'hu umwo mwe isi ya Wapelezi na Walefai."

16 Welekwa wa Yusufu wamhitulaga naho wakamgamba, "Isi idya ye vigulu haikukikint'ha, hamwenga na ayo Wakanaani wakwikala aho wana mikokoteni yadamanywe na chuma hamwenga na wose wakwikala Beti Sheni ne zikaya zakwe na wadya wakwikala mwe nyika ya Jezileeli."

17 Niyo Yoshua awagamba welekwa wa Yusufu, awo Ifulaimu na Manase, "Ikindedi nyuwe mbinda wingi naho mna ludole, homnde na hant'hu hamwenga du, 18 mna ni hamwenga ne isi ye vigulu neinde yenyu hamwenga nakugamba ikei mbago, nomwiifyeke niyo mwaiguha inde yenyu nt'hendelo zose, kwaviya nomuwakulumbuze Wakanaani hata uneva wana mikokoteni idamanywe na chuma naho wadahi."