1 Kula ya kaidi yandaga ni makabila dya Simioni viligane ne zink'holo zawe. Isi yawe wenk'hwagwa ni mgatigati mwe isi wenk'hwagwa dikabila dya Yuda. 2 Mizi wandaga nayo ni Belisheba na Sheba na Molada, 3 Hazali Shuali, Bala, Ezemu 4 Elitoladi, Betuli, Holima, 5 Zikilagi, Bet Makaboti, Hazali Susa 6 Bet Lebaoti na Shaluheli. Ni mizi mlongo na mitatu hamwenga ne zikaya zawe.

7 Naho kwandaga na mizi ya Aini na Limoni na Eteli na Ashani. Mizi mine hamwenga ne zikaya zakwe, 8 ne zikaya zose zizunguluke imizi ino kubula Baalati Beeli hegu Lama uko Negebu. Ino niyo isi wenk'higwe welekwa we dikabila dya Simioni kunda isi yawe viligane ne zink'holo zawe. 9 Hant'hu he isi wenk'higwe dikabila dya Simioni kulawa mwe isi ye dikabila dya Yuda, kwaviya isi wenk'hagwa dikabila dya Yuda dyandaga kulu kujink'ha ivo nevikaungwa kwawe.

10 Upasi wa katatu wandaga we dikabila dya Zabuloni viligane na zink'holo zawe. Mhaka we isi yawe wabulaga Salidi. 11 Kulawa uko, mhaka waitaga kubula Maleali na kombokela mnk'handa ya Dabesheti na kuita kwa kazuto ke hagihi na Yokeneami. 12 Kulawa Salidi mhaka uwo wahingaga ulailo wa zuwa kubula kwo mhaka wa Kisiloti Taboli. Kulawa uko wombokelaga Debelati kubula Yafia. 13 Niyo wagendeeela ulailo wa zuwa kuita Gati Hefeli na Eti Kazini, niyo wagendeela kubula Limoni na kuhituka kuhinga Nea. 14 Mhaka uhituka kwe nt'hendelo ya mkoma mahanya niyo wahinga Hanatoni niyo waheela kwe dikolongo dya Ifitahi Eli 15 Una ihanganya imizi ya Katasi, Nahalali, shimloni, Yidala na Bete Lehemu, wenk'higwa mizi mlongo na miidi hamwenga ne zikaya zawe. 16 Mizi ino ne zikaya zawe zandaga ukipe wa welekwa wa Zebuloni viligane ne zink'holo zawe.

17 Kula ya kane yandaga kwajili ye dikabila dya Isakali viligane ne zink'holo zakwe. 18 Isi yawe yandaga ni hamwenga na Yezileeli na Kesuloti na Shunemu, 19 Hafalaimu, Shioni, Anahalati 20 Labiti, Kishioni, Ebesi, 21 Lemeti, Eni Genimu, Eni Hada na Beti Pasesi, 22 mhaka uwo uhamp'hikana na Taboli, Shahazumaha na Beti Shemeshi. Naho mhaka uwo uheela Yolodani. Iyo yandaga mizi mlongo na mtandatu hamwenga ne zikaya zakwe. 23 Mizi ino hamwenga ne zikaya zakwe yandaga ya welekwa wa Isakali viligane ne zink'holo zakwe.

24 Kula ya shano yandaga ya nk'holo ze dikabila dya Asheli viligane ne zink'holo zakwe 25 Isi yakwe yandaga ni hamwenga ne mizi ya Helikati, Hali, Beteni, Akishafu 26 Alameleki, Amadi na Mishali nao wabulaga kwo mnima Kalimeli kwe nt'hendelo ya ulaio wa zuwa naho niyo wabula Shiholi Libunati. 27 Naho niyo wahitukila nt'hendelo ya ulailo wa zuwa kuhinga Besi Dagoni na kuhamp'hikana na Zabulon ne dikolongo dya Ifutaha Elina naho nougendeela kwe nt'hendelo ya mkoma mahanya ya Beti Emeki na Neyeli kombokela kubula Kabuli, 28 Ebuloni, Lehobu, Hamoni, Kana na kubula Sidoni Ink'hulu. 29 Aho mhaka wahitukaga na kuhinga Lama na kubula Tilo kwo mzi uzengelwe gomela, aho naho mhaka wahitukaga na kuhinga Hosa niyo waheela kwe bahali ya Meditelania, mwe isi ya Akizibu, 30 Uma na Afeki na Lehobu. Mizi milongo miidi na miidi hamwenga ne zikaya zakwe. 31 Mizi ino ne zikaya zakwe zandaga ukipe wa welekwa wa Asheli viligane ne zink'holo zakwe.

32 Kula ya mtandatu neinda kwajili ye welekwa we dikabila dya Nafutali viligane ne zink'holo zakwe. 33 Mhaka wawe wakongelaga Helefu kwo mti mkulu uko Zaananimu ukombokela Adami Nekebi na Jabineeli kuita Lakumi kubula Yolodani. 34 Ukalawe aho, mhaka wahingaga usweelo wa zuwa kwombokela Azinoti Taboli. Wize ulawe aho waitaga Hukoki na kuhakana na Zebuloni kwe nt'hendelo ya Kwa mwenye mzi na Asheli kwe nt'hendelo ya uswelo wa zuwa naho noubula Yuda naho ihakana na Yolodani nt'hendelo ya ulailo wa zuwa. 35 Mizi yawe iyo yazengelwe gomela ni: Zidimu, Zeli, Hamati, Lakati, na Kineleti. 36 Mituhu ni Adama, Lama, Hazoli, 37 Kadeshi, Edulei, Eni Hazoli 38 Yiloni, Migidali Eli, Holemu, Beti Anatina, Beti-shemeshi. Uwazilo we mizi iyo ni mlongo na kenda, hamwenga ne zikaya zakwe. 39 Imizi ino ne zikaya zakwe yandaga isi ye dikabila dya Nafutali viligane ne zink'holo zawe.

40 Kula ya mfungate yandaga ni ye dikabila dya Dani viligane ne zink'holo zawe. 41 Isi yo ukipe wawe ni hamwenga ne mizi ya Zola na Estaoli na Ili Shemeshi, 42 Shaala Bini, Aijaloni, Atilahi 43 Eloni na Timna na Ekiloni 44 Eliteka, Gibetoni, Baalati 45 Yehudi na Bene Belaki, na Gati limoni, 46 Me Yakolikoni na Lakoni na isi ikuhinga Yopa. 47 Want'hu we dikabila dya Dani hawadahaga kuitaha isi yawe. Ivo wakwelaga na kuutowa mzi wa Leshemu. Wautahaga aho weze wawakome. Wekalaga umwo niyo na kuuhitula dizina dyakwe niyo wawitanga Dani, idizina dyo mkale ywawe. 48 Mizi ino ne zikaya zakwe zandaga ukipe we dikabila dya Dani viligane ne zink'holo zawe.

49 Weze wabinde kuipanga isi yose, Waaizilaeli wamwink'haga Yoshua mwana Nuni ukipe enga yumwenga mwa woho. 50 Viligane na ivo Zumbe asigiile, waizilaeli wamwink'haga umzi udya alombezaga mwenye uwo Tima Sela kwe isi ye vigulu va Ifulaimu. Azengaga mzi niyo ekala aho.

51 Izi nizo isi izo Eliyazali mlavant'hambiko, hamwenga na Yoshua mwana Nuni hamwenga na wakulu we zink'holo za makabila ya Izilaeli wapangaga kwa kuyatweela kula uko Shilo ha Zumbe aho he nk'hili ye dihema dyo kumvika Zumbe. Ivo wandaga wabinda kuipanga isi.