1 Awa nawo maseuta we ziisi wahumwagwa ni Waizilaeli na kuhokwa isi zawe zose, izo zandaga ulailo wa zuwa yo mto Yolodani kulawa kwe dikolongo dya Alinoni, kubula kwo Mnima Helimoni, ne isi yose ya Alaba na nt'hendelo zose za Ulailo wa zuwa. 2 Yumwenga ywawe andaga Sihoni seuta ywa Waamoli ekalaga Heshiboni. Ekailaga isi kukongela Aloela mwo lwega lwe dikolongo dya Alinoni, na kulawa hagati ye dikolongo idyo kuita kwo mto Yaboki umhaka na Waamoli. Nuko kugamba nusu ye isi ya Gileadi. 3 Iviaivia ekailaga uko ulailo wa zuwa wa Alaba kulawa kwe Bahali ya Kineleti, kubula Beiyeshimoti kwe Bahali yo munyu na kugendeela kubula hediwandamo dyo mnima Pisiga.

4 Seuta mtuhu ahumwagwa ni Ogu, yumwenga mwa Walefai wasigalaga, uyo ekailaga uko Bashani na Edulai, 5 naho ekailaga isi ya mnima Helimoni na Saleka na Bashani yose kubula kwe mihaka ya Geshulu na kwe isi ya Wamaaka na kwe nusu ya Gileadi kwe mihaka ya seuta Sihoni ywa Heshiboni.

6 Musa uyo mndima ywa Zumbe hamwenga na Waizilaeli wawahumaga maseuta awo, naho awenk'haga isi iyo dikabila dya Lubeni ne dikabila dya Gadi, kudya kusigale awenk'hagaga inusu ye dikabila dya Manase.

7 Awa nawo maseuta wahumwagwa ni Yoshua na want'hu wose wa Izilaeli uko usweelo wa zuwa wo mto Yolodani kukongela Baali gadi kwe dikolongo dya Lebanoni kuita kwo mnima wa Halaki, uwo wakelavilizaga kuhinga Edomu. Yoshua awapangilaga isi iyo kwa makabila ya Waizilaeli vileke inde yawe. 8 Isi izo zandaga ni hamwenga na isi ye vigulu, mawandamo ya usweelo wa zuwa, Alaba, kwe ziseleza zo mnima, kwe dijangwa, na isi ya Negebu, Isi wekalaga Wahiti, Waamoli, Wakanaani, Wapelezi, za Wahivi, Wayebusi. 9 Naho want'hu wa Izilaeli wawahumaga maseuta we mizi ya Yeliko hamwenga na seuta ywa Ai hagihi na Beseli, 10 seuta ywa Yelusalemu na ywa Hebuloni, 11 seuta ywa Jalimuti hamwenga na ywa Lakishi, 12 seuta ywa Egiloni hamwenga na ywa Gezeli, 13 seuta ywa Debili hamwenga na ywa Gedeli 14 seuta ywa Holimaha hamwenga na ywa Aladi, 15 seuta ywa Libina hamwenga na ywa Adulamu, 16 seuta ywa Makeda na wa Beseli, 17 seuta ywa Tapua na ywa Hefeli, 18 seuta ywa Afeki na ywa Lahsaloni, 19 seuta ywa Madoni na ywa Hazoli, 20 seuta ywa Shimloni meloni na ywa Akishafi. 21 Naho watuhu ni seuta Taanaki na seuta ywa Magido, 22 seuta yumwenga ywa Kadeshi na seuta yumwenga ywa Yokeneamu ywa Kameli, 23 seuta ywa Doli na ywa uko Nafosi doli, na seuta ywa Goimu uko Giligali, 24 na seuta ywa Tiliza. Uwazilo wa maseuta awo wahumigwe ni Yoshua na Waizilaeli wose wabula milongo mitatu na yumwenga.